काठमाडौं- सरकारले सञ्चालन गरेको विद्यार्थी अभियानका क्रममा ३ लाख ३० हजार २१३ बालबालिका भर्ना भएका छन्। नयाँ वर्षदेखि सुरु गरिएको एक महिने भर्ना क्रममा ६९ हजार ७२३ बालबालिका भने अझै पनि विद्यालयबाहिर रहेका छन्।
प्रथम चरणको भर्ना अभियानमा सबैभन्दा बढी प्रदेश २ मा १ लाख ८६४ बालबालिका भर्ना भएका छन् भने सबैभन्दा कम प्रदेश ६ मा १० हजार ८९२ भर्ना भए। आगामी शैक्षिक सत्रमा दोश्रो चरणको भर्ना अभियान सञ्चालन गर्ने गरी मन्त्रालयले तयारी सुरु गरेको शिक्षामन्त्री गिरिराजमणि पोखरेलले बताए।
आज आयोजित पत्रकार सम्म्मेलनमा पोखरेलले मन्त्रालयको ५ वर्षे मार्गचित्रमा भर्ना अभियानले सकारात्मक फड्को मारेको बताए। अभियान क्रममा ४०४ व्यक्तिबाट ७३१ बालबालिकाको अभिभावकत्व ग्रहण गरिएको थियो।
सार्वजनिक शिक्षालाई गुणस्तरीय बनाउन सार्वजनिक विद्यालय सुधार प्रारुप तयार भएको पोखरेलले जानकारी गराए। विदेशी शिक्षण संस्थाबाट सम्बन्धन लिएर सञ्चालित विद्यालयहरुलाई व्यवस्थित बनाई काम अगाडि बढाउन कार्यदल गठन गरिएको मन्त्रालयले जनाएको छ।
संघीयता कार्यान्वयनसँगै स्थानीय शिक्षाको नमुना कानुन तयार गरिएको पनि उनको भनाइ छ। साथै संघीय शिक्षा विधेयक तर्जुमा गरी मन्त्रिपरिषद्बाट सैद्धान्तिक सहमति पाएको मन्त्री पोखरेलले जानकारी दिए।
यस्तै, मन्त्रालयले उपत्यकामा सञ्चालित विश्वविद्यालयका सम्पर्क कार्यालय असार मसान्तभित्र बन्द गर्न निर्देशन दिइसकेको छ। गैरनाफामूलक सार्वजनिक विश्वविद्यालयहरु आवश्यकता अनुसार खुल्ने पोखरेलले बताए।
शिक्षा मन्त्रालयमा विज्ञान र प्रविधि मन्त्रालय पनि जोडिएकोले बजेट सोही मुताबिक नभएको उनले बताए। 'शिक्षाको लागि विनियोजित बजेट अधिकांश शिक्षक कर्मचारी भत्तामा सकिने गरेको छ,' उनले भने।
विगतका वर्षहरुमा समयमा पुस्तक नपाएको गुनासो आइरहे पनि यस शैक्षिक सत्रदेखि समयमै पाठ्यपुस्तक पुगेको मन्त्री पोखरेलको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790561542.webp)
-1786602170.png)
