काठमाडाैं- राष्ट्रिय गौरवको योजनाअन्तर्गत पोखरा क्षेत्रीय अन्तर्राष्ट्रिय विमानस्थलको निर्माण कार्य अन्तिम चरणमा पुगेको छ।
विमानस्थलको निर्माण कार्य अबको छ महिनाभित्र सम्पन्न हुने बताइएको छ। यही महिनाभित्र निर्माण सम्पन्न हुनुपर्ने भए पनि कोरोनाका कारण आयोजना पर धकेलिएको हो।
गत आर्थिक वर्ष २०७६/७७ मा ६१ प्रतिशत भौतिक प्रगति भएको थियो। गत वर्षसमेत कोरोनाका कारण निर्माणले गति लिन सकेको थिएन। चालु आर्थिक वर्षमा केही गति लिएको निर्माण कार्यले फेरि आएको कोरोनाको दोस्रो लहरका कारण निषेधाज्ञा हुँदा कामले गति लिन सकिरहेको थिएन। मे महिनामै विदेशी जनशक्तिले आएर विमानस्थल अवलोकन गर्ने योजना रहेकोमा कोभिड दोस्रो लहरका कारण रोकिएको थियो। विदेशबाट आउने जनशक्तिहरु जुलाई-अगस्टसम्ममा आउने व्यवस्था मिलाइएको हुँदा काम निरन्तर हुने इन्जिनियर कृष्ण पौडेलले बताए।
निषेधाज्ञमा पनि काम नरोकी निरन्तर भएको उनले बताए। ५०० जनशक्तिको ठाउँमा निषेधाज्ञा २०० हाराहारी जनशक्तिले काम गरिरहेको इन्जिनियर कृष्ण पौडेलले जानकारी दिए। कोभिडको कारण चिनियाँ जनशक्तिमासमेत कमी आएको छ। हाल चिनियाँ जनशक्ति १६६ जना मात्र निर्माणमा आबद्ध रहेका छन्। चिनियाँ जनशक्ति ३०० का हाराहारीमा आवश्यक रहेको बताइएको छ।
अहिले फिनिसिङ, लाइट हाल्ने, इलेक्ट्रिफिकेसन, इक्यूपमेन्ट, पाइपलाइन बिच्छ्याउने तथा भित्री सडकका कामहरु भइरहेको छ। निषेधाज्ञाका कारण निर्माणको एक महिनाको प्रगतिमा कमी आउने उनले बताए। कूल २२ अर्ब रुपैयाँ चिनियाँ ऋण सहयोगमा विमानस्थल निर्माण भइरहेको छ। विमानस्थल निर्माण सन् २०२१ जुलाई १० सम्म सक्नेगरी सम्झौता भएको थियो। यसअघि पोखरा अन्तर्राष्ट्रिय विमानस्थल छ महिनाअघि नै सम्पन्न गर्ने लक्ष्य रहेको थियो। हाल विमानस्थल निर्माणले अपेक्षित गति लिन सकेको छैन। निर्माण सम्पन्न मिति समेत २०२१ डिसेम्बरका लागि सारिएको इनिजनियर पौडेलले जानकारी दिए।
विमानस्थल निर्माण सन् २०१७ को नोभेम्बर महिनादेखि सुरु भएको हो। हालसम्म रन वे, ट्याक्सी पार्किङ, टर्मिनल भवन, एप्रोन (यात्रु जहाजमा चड्ने र ओलेने स्थान), नाला निर्माण, ह्याङ्गर निर्माणलगायतका काम भइसकेका छन्। पोखरा अन्तर्राष्ट्रिय विमानस्थलको टर्मिनल भवन १४ हजार स्क्यार मिटरमा बन्नेछ। आठ हजार स्क्वायर मिटर अन्तर्राष्ट्रिय उडानका लागि र छ हजार स्क्वायर मिटर आन्तरिक उडानका लागि गरी १४ हजार स्क्वायर मिटरको टर्मिनल भवन निर्माण हुन लागेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768049575.png)
-1764146706.png)
