काठमाडाैं- गृहमन्त्री विष्णुप्रसाद पौडेलले नेपालको अध्यागमन प्रशासनलाई अन्तर्राष्ट्रियस्तरको बनाउनुपर्ने बताएका छन्। सोमबार अध्यागमन विभागले गरेको प्रणाली सिर्जित क्यूआर कोडसहित छपाइ गरिएको भिसाको शुभारम्भ कार्यक्रममा बोल्दै गृहमन्त्री पौडेलले नेपालको अध्यागमनलाई सुधार गर्नुपर्ने आवश्यकता रहेको बताए।
उनले विदेशीको पहिलो आँखा अध्यागमनमै पर्ने उल्लेख गर्दै त्यसको सुधार गर्नुपर्नेमा जोड दिए। अध्यागमन प्रशासनलाई अन्तर्राष्ट्रियस्तरको बनाउन योजना बनाएर अगाडि बढ्नुपर्ने उनको भनाइ थियो।
'नेपाललाई विदेशीले चिन्ने पहिलो दृश्य अध्यागमन हो। एयरपोर्ट हो। हामीले यो भिसा प्रणालीमा त एक प्रकारको सुधार गरेका छौँ र अरु थप सुधार गर्दै जान्छौँ। साथै समग्र अध्यागमन प्रशासनलाई समग्रतामा अन्तर्राष्ट्रियस्तरको बनाउनुपर्ने आवश्यकता छ। हामीले गर्नुपर्ने कामहरुका बारेमा योजनाहरु निर्माण गर्दै जाऊँ,’ गृहमन्त्री पौडेलले भने। उनले अध्यागमन प्रणालीलाई प्रभावकारी बनाउन र यसको प्रतिष्ठालाई माथि उठाउनको निम्ति प्रभावकारी भूमिका निर्वाह गर्न निर्देशनसमेत दिए।
अध्यागमन विभागका महानिर्देशक नारायणप्रसाद भट्टराईले क्यूआर कोडसहितको नेपाली कोडबाट सीधै छपाइ रहने भिसा प्रणालीको सुरुआत गरिएको बताए। यसबाट विदेशी नागरिकहरुले विश्वको जुनसुकै ठाउँबाट पनि भिसाको लागि आवेदन दिनसक्ने उनले बताए। विदेशी नागरिकले विवरण नेपाली पोर्टमा राखिसकेपछि भिसामा चाहिने विवरण कन्भर्ट भएर भिसा स्टिकर छपाइ हुने र नयाँ भिसा स्टिकरमा प्रयोग भएको क्यूआर कोडले यात्रा गर्ने मानिसको गोप्य सूचनाहरु स्टोर गर्ने भएको हुनाले विश्वसनीय, भरपर्दो र अन्तर्राष्ट्रियस्तरमा तुलनायोग्य रहेको उनको भनाइ थियो।
‘हामीले जारी गरेको नयाँ भिसा स्टिकर सानो छ र यसले नेपाली विशेषता बोकेको छ। एउटा पासपोर्टको पेजमा तीन पटकसम्म भिसा लगाउने भनेको तीन वटा भिसा स्टिकर टाँस्न सकिनेगरीको साइजमा निर्धारण गरिएको हुनाले यो मितव्ययी पनि छ,' महानिर्देशक भट्टराईले भने, 'विद्युतीय भिसा लागू गर्नका लागि तयारी पुरा गरेका छौँ। अध्यागमन विभागले प्रयोग गरेको नेपाली पोर्टल नामक सुचना प्रणालीलाई त्यो अनुसार स्तरोन्नति गरिएको छ।’
अन्तर्राष्ट्रिय रुपमा भुक्तानी प्रणाली सुचारु नभएकाले तत्कालै विद्युतीय भिसा जारी गर्न नसके पनि 'इन्टरनेसनल पेमेन्ट गेटवे' (अन्तर्राष्ट्रिय भुक्तानी प्रणाली) सञ्चालन हुनेबित्तिकै विद्युतीय भिसा जारी गर्न सकिने उनले बताए। विदेशीले नेपाली पोर्ट 'लग इन' गरी भिसा एप्लाइ गर्नसक्ने तथा क्रेडिट कार्ड स्वाब गरेर पैसा तिर्न सकिने उनले जानकारी दिए। त्यसरी तिरेको पैसा महालेखा नियन्त्रकको कार्यालयले तोकेको खातामा जम्मा हुने पनि उनले जानकारी दिए।
यसरी एप्लाइ गरेको व्यक्तिलाई अध्यागमन विभागले यहीँबाट हेरेर भिसा स्वीकृत/अस्वीकृत गर्नसक्ने र स्वीकृत भएको खण्डमा विभागले जारी गरेको विद्युतीय यात्रा अनुमतिपत्र बोकेर नेपाल आउनसक्ने महानिर्देशक भट्टराईले बताए। यात्रुको विद्युतीय यात्रा अनुमतिपत्र हेरेर नेपालको प्रवेश विन्दुमा नेपालको भिसा स्टिकर उपलब्ध गराउन सकिने उनले बताए।
विभागको यो सेवाबाट पर्यटकहरुले नेपालमा सहजरुपमा भिसा प्राप्त गर्नसक्ने र पर्यटन क्षेत्रको समेत विकास हुने महानिर्देशक श्रेष्ठको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
