काठमाडौं– श्रम, रोजगार तथा सामाजिक सुरक्षा मन्त्रालयले २ हप्ताअघि रोजगारको खोजीमा मलेसिया जाने कामदारमाथि स्वास्थ्य तथा अन्य विभिन्न शीर्षकमा आर्थिक भार हुनेगरी लगाइएको सिन्डिकेट बन्द गर्ने निर्णय गरेको थियो।
श्रम मन्त्रालयको उक्त निर्णय राजनीतिक आडमा उल्टाउने चलखेलमा सिन्डिकेटवालाहरु सक्रिय भएर लागिपरेको मन्त्रालय स्रोतले जनाएको छ। स्वास्थ्य व्यवसायी संघका अध्यक्ष कैलाश खड्काको समूहले मन्त्रालयको निर्णय उल्टाउने लबिङ गरिरहेको स्रोतले जानकारी दिएको छ। जसका लागि खड्काको समूह केही नेताहरुको घर–घरसम्म पुग्न थालेका छन्।
प्रहरीको फरार सूचीमा रहेका खड्का र गोविन्द थपलिया प्रक्राउ पर्ने डरले नेपालभित्रै विश्वासयोग्य नेताकै घरमा लुकेर बसेको चर्चा हुन थालेको छ।
मन्त्रालयको पछिल्लो निर्णय विफल पार्न तथा उल्टाउन खड्का र थपलियाले योजना बनाएर काम गरिरहेको एक वैदेशिक रोजगार व्यवसायीले दाबी गरेका छन्। मन्त्रालयको निर्णय उल्टाउनका लागि खड्का र थपलियाले आर्थिक चलखेल समेत गरिरहेको उनी बताउँछन्।
सिन्डिकेटको निर्णय उल्टाउन खड्कासहितको समूहलाई पक्राउ परेका व्यवसायीका परिवारका सदस्यले सहयोग गरिरहेको स्रोतको भनाइ छ। खड्काले नेपाली कांग्रेस र थपलियाले नेपाल कम्युनिष्ट पार्टी (नेकपा) का उच्च नेतासँग सहयोग मागिरहेको स्रोतले जनायो।
खड्का र थपलियासहितको समूह सिन्डिकेट बन्द गर्ने निर्णय उल्टाउन नेपालस्थित मलेसियन राजदूतवासका कर्मचारी मार्फत मलेसियाको उच्च तहसम्म पुग्ने प्रयासमा रहेको बताइएको छ। जसका लागि खड्काले मलेसियाका पूर्व राजदूत, एनआरएनएका नेता लगायतका व्यक्तिसँग सहयोग मागिरहेका छन्।
श्रम मन्त्रालयले मलेसिया जाने कामदारमाथि आर्थिक भार थप्दै आएका अजिएसजी, माइग्राम्स, बायोमेट्रिक, ओएससी, भिएलएन बन्द गर्ने निर्णय गरेको थियो। मन्त्रालयको निर्णयपछि ती संस्थासँग आबद्ध ४० स्वास्थ्य व्यवसायी प्रहरी नियन्त्रणमा छन्। उनीहरूलाई प्रहरीले थुनामा राखेर अनुसन्धान गरिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821304.jpg)
-1786602170.png)
