काठमाडौं– नेपाल कम्युनिष्ट पार्टी ले स्थायी समिति र संसदीय दलका पदाधिकारीको टुंगो लगाएको छ।
बुधबार पार्टीले ४५ सदस्यीय स्थायी समितिको नाम टुंगो लगाएको हो।
तत्कालीन एमाले पक्षबाट २६ र माओवादी पक्षबाट १९ जनाको नाम टुंगो लगाइएको हो। यसअघि विवादका कारण नाममा निर्णय भएको थिएन।
यसअघि तत्कालिन एमालेको स्थायी समितिमा रहेका २२ जनामा ४ जना थपिएको छ। यसरी थपिनेहरुमा रघुजी पन्त, वेदुराम भुसाल, विष्णु रिमाल र रघुवीर महासेठ छन्।
यसअघि स्थायी समितिमा रहेका अध्यक्ष केपी ओलीसहित नेताहरु झलनाथ खनाल, माधव नेपाल, वामदेव गौतम, युवराज ज्ञवाली, अष्टलक्ष्मी शाक्य, भीम रावल, ईश्वर पोखरेल, विष्णु पौडेल, घनश्याम भुसाल, प्रदीप ज्ञवाली, गोकर्ण विष्ट, पृथ्वीसुब्बा गुरुङ, योगेश भट्टराई, भीम आचार्य, शंकर पोखरेल, सुरेन्द्र पाण्डे, छविलाल विश्वकर्मा र सत्यनारायण मण्डल कायमै छन्।
त्यस्तै तत्कालीन माओवादी केन्द्रबाट अध्यक्ष पुष्पकमल दाहालसहित नारायणकाजी श्रेष्ठ, रामबहादुर थापा ‘बादल’, देव गुरुङ, टोपबहादुर रायमाझी, गिरिराजमणि पोखरेल, हरिबोल गजुरेल, अग्नि सापकोटा, वर्षमान पुन, शक्ति बस्नेत, जनार्दन शर्मा, पम्फा भुसाल, मातृकाप्रसाद यादव, गणेश साह, लेखराज भट्ट, देवेन्द्र पौडेल, चक्रपाणि खनाल, लीलामणि पोखरेल र मणि थापा राखिएको छ।
त्यस्तै केही नेताहरुलाई स्थायी समितिको आमन्त्रित सदस्यका रूपमा राखिएको छ । अमृत बोहोरा, अमिक शेरचन, पुष्प कँडेल, सोमनाथ प्यासी, केशव बडाल र पेशल खतिवडालाई आमान्त्रित सदस्यमा राखिएको छ।
त्यस्तै, नेकपाको बुधबारको संसदीय दलको बैठकले उपनेतामा सुवास नेम्बाङ, प्रमुख सचेतकमा देव गुरुङ र सचेतकमा शान्ता चौधरीलाई चयन गरेको छ। नेकपा संसदीय दलको नेतामा अध्यक्ष एवं प्रधानमन्त्री केपी ओली यसअघि नै चयन भइसकेका छन । राष्ट्रिय सभामा भने दीनानाथ शर्मालाई दलको नेता चयन बनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
