काठमाडौं– त्रिचन्द्र कलेजमा नेविसंघका दुई गुटबीच भएको आक्रमणमा तीन विद्यार्थी नेता घाइते भएका छन्।
खुकुरी प्रहारबाट कलेजका विद्यार्थी नेता कौशल कौशल दाहाल हित तीन जना घाइते भएका हुन्। घाइते हुने अन्यमा अजय गजुरेल र गोरख रदुले रहेको प्रहरीले जनाएको छ।
प्रहरीले घटनामा संलग्न ३ जनालाई खुकुरीसहित पक्राउ गरेको छ। अनिल लामा, सहदेव नेपाल र सौरभ श्रेष्ठलाई प्रहरीले पक्राउ गरेको हो।
आफैंले ल्याएका ‘केटा’द्वारा खुकुरी प्रहार
दरबारमार्ग वृत्तका डिएसपी दानबहादुर मल्लका अनुसार, त्रिचन्द्रमा नेविसंघका दुई समूहबीच लामो समयदेखि विवाद छ। एउटा समूहको नेतृत्व कौशल दाहालले गरेका छन् भने अर्को समूहको शान सिवाकोटीले गरेका छन्। दाहाल नेविसंघ अध्यक्ष नैनसिंह महर निकट हुन् भने सिवाकोटी महासचिव कुन्दन काफ्ले निकट। यी दुई समूहबीच आधिकारिक इकाइ कमिटीको विषयमा लामो समयदेखि विवाद हुँदै आएको छ।
सोही विवादको क्रममा दाहाल पक्षले केही ‘केटा’ बोलाएर सिवाकोटी पक्षलाई बुधबार आक्रमण गर्ने योजना बनाएका थिए। सोही अनुसार अनिल लामा लगायत गुन्डागर्दीमा संलग्न एक समूह खुकुरी बोकेर कलेज पुगेको थियो। उनीहरुले सिवाकोटी पक्षका नेता चिनेका थिएनन्। हुलमुलमा लामाले सिवाकोटी पक्षका नेता ठानेर दाहालमाथि नै खुकुरी हानेका हुन्।
‘जसले कुट्न भनेर केटाहरु बोलाए, हुलमुलमा उसैमाथि खुकुरी प्रहार भएको जस्तो देखिन्छ’, डिएसपी मल्लले भने।
घाइते तीन जनाकै अवस्था खतरामुक्त रहेको प्रहरीले जनाएको छ।
खुकुरी आक्रमणपछि भाग्दै गर्दा लामासहितका तीन आक्रमणकारीलाई प्रहरीले कमलादी गणेश मन्दिर नजिकैबाट पक्राउ गरेको हो। आक्रमण गर्न उनीहरुले लामाको समूहलाई मोटरसाइकल लगायत सुविधा समेत दिइएको अनुसन्धानमा खुलेको छ।
काफ्ले पक्षले शिवाकोटीलाई इकाई अध्यक्ष दाबी गर्दै आएको छ। तर, अध्यक्ष महरले तीन महिनाअघि कौशल दाहाललाई अध्यक्ष बनाएका थिए। तर, शिवाकोटी पक्षले उनलाई नेविसंघको इकाई कार्यालयमा प्रबेश गर्न दिएको छैन। जसकारण बुधबार उनी गुन्डागर्दीमा संलग्न व्यक्तिहरुसहित कार्यालय प्रबेशका लागि गएको बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
