काठमाडौं– प्रमुख प्रतिपक्ष दल नेपाली कांग्रेसका नेता एवम् पूर्व अर्थमन्त्री डा रामशरण महतले सरकारले मुलुकलाई समृद्ध बनाउने लक्ष्य अनुसारको बजेट नल्याएको दाबी गरेका छन्।
बुधबार काठमाडौंमा आयोजित साक्षात्कार कार्यक्रममा बोल्दै नेता महतले बजेटमा लगानी भित्र्याउन, कर्मचारीको क्षमता विकास गर्न आवश्यक कार्यक्रम नै नसमेटिएको पनि टिप्पणी गरे। पाँच वर्षमा मुलुकको आय दोब्बर बढाउने सरकारको लक्ष्य निजी क्षेत्रलाई कर भार थपेर मात्रै नहुने भन्दै उनले सरकारको बजेटको आलोचना समेत गरे।
नेता महतले बाह्य लगानी भित्र्याउने कार्यक्रम पनि बजेटमा नआएको उल्लेख गरे। उनले संघीयताको मर्म अनुसार पनि बजेट विनियोजन नगरिएको दाबी गरे।
कार्यक्रममा बोल्दै अर्का पूर्व अर्थमन्त्री शंकरप्रसाद कोइरालाले भने बजेट सकारात्मक रहेको बताए। उनले बजेटको आकार यथार्थपरक रहेको र त्यसले ८ प्रतिशत आर्थिक वृद्धि गर्ने लक्ष्य लिनुलाई आफूले स्वाभाविक रुपमा लिएको पनि बताए। पूर्व अर्थमन्त्री कोइरालाले ५ लाख रोजगारीको अवसर सिर्जना गर्ने लक्ष्य बजेटमा आउनु पनि सकारात्मक भएको बताए।
पूर्व अर्थमन्त्री कोइरालाले सरकारले सुशासनमा जोड दिएकाले बजेट कार्यान्वयनमा समस्या नआउने विश्वास समेत व्यक्त गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
