काठमाडौं- गण्डकी प्रदेशमा पृथ्वी सुब्बा गुरुङ नेतृत्वको सरकार रहेको अवधिभित्र २०० किलोमिटर सडक कालोपत्र भएको दाबी गरिएको छ। भौतिक पूर्वाधार विकास मन्त्रालयबाट गत ३९ महिनामा ३८० किलोमिटर सडक ग्राभेल भएको जनाइएको छ।
भौतिक पूर्वाधार मन्त्री रामशरण बस्नेतको आइतबार विदाइ हुँदै गर्दा कार्यरत अवधिका कार्य सर्वाजनिक गरिएको थियो। स्थानीय तहको केन्द्र जोड्ने सडक र एक निर्वाचन क्षेत्र एक सडक विकास कार्यक्रम अन्तर्गत गरी कूल ६३२ किमि सडक कालोपत्रे गर्ने र ८३ वटा सडक पुलको निर्माण कार्य भइरहेको उल्लेख गरिएको छ।
आधारभूत खानेपानी सेवा विस्तार गर्ने कार्यक्रम अन्तर्गत १०२ आयोजनाहरु सम्पन्न भएको जनाइएको छ। खानेपानी आयोजनाबाट ५ हजार ४९८ घरपरिवारका २९ हजार ५०६ जनसंख्या लाभान्वित भएको प्रगतिमा देखाइएको छ।
बस्नेत मन्त्री हुँदा प्रारम्भ गरिएका ८९६ खानेपानी आयोजना निर्माणाधीन अवस्थामा रहेको जनाइएको छ। प्रदेशभर ४३ हजार ४८५ रोपनी जमिनमा बाह्रै महिना सिँचाई सुविधा पुगेको दाबी गरिएको छ।
विद्युत सेवा पुगेका घर परिवार ८२ प्रतिशतवाट बढेर ९८.९ प्रतिशत पुगेको जनाएको छ। यस आर्थिक वर्षमा लकडाउनका हुँदाहुँदै पनि ९ हजार ६२४ नयाँ लाइसेन्स वितरण गरेको प्रगतिमा उल्लेख गरिएको छ।
भौतिक पूर्वाधारको क्षेत्रमा मुख्यमन्त्री पृथ्वीसुब्बा गुरुङ नेतृत्वको सरकारले गरेका कार्यहरुको पूर्णपाठ यस्तो छ :
• गण्डकी प्रदेश सरकारबाट २०० कि.मि. भन्दा बढी सडक कालोपत्रे तथा ढलान र ३८० कि.मि. सडक ग्राभेल गरिएको छ। ३६ सडक पुलहरुको निर्माण सम्पन्न गरिएको छ। आगामी बर्ष सम्पन्न गर्ने गरी स्थानीय तहको केन्द्र जोड्ने सडक र एक निर्वाचन क्षेत्र एक सडक विकास कार्यक्रम अन्तर्गत गरी कुल ६३२ कि.मि. सडक कालोपत्रे गर्ने र ८३ वटा सडक पुलको निर्माण कार्य भइरहेको छ।
• प्रदेशमा हालसम्म १८ वटा झोलुङ्गे पुल निर्माण सम्पन्न भएका छन् भने आगामी वर्षमा निर्माण सम्पन्न हुने गरी ४४ वटा झोलुङ्गे पुल निर्माणाधीन अवस्थामा रहेका छन्।
• प्रदेशका सबै नागरिकलाई आधारभूत खानेपानी सेवा विस्तार गर्ने कार्यक्रम अन्तर्गत १०२ आयोजनाहरु सम्पन्न भई ५,४९८ घर परिवारका २९,५०६ जनसंख्या लाभान्वित भएका छन्। त्यसैगरी 'एक घर एक धारा' कार्यक्रम अन्तर्गत करीब २१० वटा आयोजना सम्पन्न भई ७६००० वटा निजी धारा जडान गरिएको र यसबाट ३ लाख ३० हजार ७ सय जनता लाभान्वित भएका छन्। हाल ८९६ खानेपानी आयोजना निर्माणाधीन अवस्थामा रहेका छन्।
• नयाँ सिँचाई आयोजनाहरुबाट ४३,४८५ रोपनी जमिनमा बाह्रै महिना सिँचाई सुविधा पुगेको छ। पुराना तथा जीर्ण सिँचाई आयोजनाको स्तरोन्नति र नवीकरणबाट २,०३,६७२ रोपनी जमिनमा बाह्रै महिना सिँचाई सुविधा पुगेको छ। आगामी वर्षसम्म निर्माण सम्पन्न हुने गरी हाल निर्माणाधीन ३४७ सिँचाई आयोजनाहरुबाट २,९७,८७२ रोपनी जमिनमा सिँचाई सुविधा पुग्नेछ ।
• गण्डकी प्रदेश उज्यालो प्रदेश कार्यक्रम प्रारम्भ गर्दा विद्युत सेवा पुगेका घर परिवार ८२ प्रतिशतवाट बढेर ९८.९ प्रतिशत पुगेको छ । सोमध्ये ९२.७९ प्रतिशत घरधुरीमा राष्ट्रिय प्रसारण लाइनमार्फत् र अन्यमा सौर्य ऊर्जा र लघु जलविद्युत आयोजनाबाट विद्युत सेवाको पहुँच पुर्याइएको छ ।
• नदी नियन्त्रण कार्य अन्तर्गत ५६.५ कि.मि तटबन्ध निर्माण गरिएको छ। सो कार्यबाट ३०,५३६ रोपनी जमिन उकास भएको छ। हाल ६५ वटा नदी नियन्त्रणका योजनाहरु कार्यान्वयनको चरणमा रहेका छन्।
• विपन्न तथा लोपोन्मुख समुदायको लागि सञ्चालित जनता आवास कार्यक्रम अन्तर्गत हालसम्म १,३२० वटा भन्दा बढी घर निर्माण सम्पन्न भएका छन् भने २२५ घर निर्माणाधीन छन्।
• सवारी तथा यातायात सेवा प्रवाह सहज बनाउन ७ जिल्लामा ९ वटा कार्यालय स्थापना गरी सेवा प्रवाह भइरहेको छ भने विगतमा ३ जिल्लाबाट मात्र पटके रुट परमिट जारी गरिने गरेको हाल मनाङ र मुस्ताङ जिल्ला बाहेकका ९ वटै जिल्लाबाट पटके रुट परमिट लिन सक्ने व्यवस्था मिलाईएको छ। यस आर्थिक वर्षमा लकडाउनका बाबजुद पनि ९,६२४ नयाँ लाइसेन्स वितरण तथा ३० हजार ६५८ लाइसेन्स नवीकरण गरिएको छ भने करिब ४८००० स्मार्ट कार्ड वितरण गरिएको छ ।
• निर्वाचन क्षेत्र पूर्वाधार विकास कार्यक्रम मुख्यमन्त्री तथा मन्त्रिपरिषद्को कार्यालयको भएपनि कार्यान्वयन भौतिक पूर्वाधार विकास मन्त्रालयबाट हुने भएकोले सो कार्यक्रम अन्तर्गत गत आ.व.मा ७९२ आयोजना सम्पन्न भएका छन् र चालु आ.व.मा ८४२ योजना कार्यान्वयन भइरहेका छन्, जुन योजनाहरु असाढ मसान्तसम्म सम्पन्न हुनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
