राजविराज– सप्तरीको पुरानो सदरमुकाम हनुमाननगरका व्यापारी दम्पतीको हत्या गरेर फरार भएका व्यक्ति ७ वर्षपछि पक्राउ परेका छन्। हनुमाननगर कङ्कालिनी नगरपालिका हनुमाननगर बजारकी ५२ वर्षीया सरोजदेवी वेगवानी र उनका श्रीमान ५५ वर्षीय प्रेमसुख वेगवानीको हत्यामा संलग्नलाई प्रहरीले पक्राउ गरेको हो।
पक्राउ पर्नेमा सप्तरीको हनुमाननगर कङ्कालिनी नगरपालिका–१ भारदहका ३९ वर्षीय बब्लु मण्डल छन्। हनुमाननगरस्थित पसलसँगै रहेको घरमा सुतिरहेका व्यापारी दम्पतिको २१ जेठ २०७१ को राति हत्या गरिएको थियो।
प्रहरी अनुसन्धानबाट व्यापारी दम्पतीको हत्यामा मण्डलसहितका ६ व्यक्तिको संलग्नता रहेको खुलेको थियो। ५ जना यसअघि नै पक्राउ परिसकेका थिए भने मण्डलसहित २ जना फरार थिए।
प्रहरीले यसअघि सुनसरी जिल्लाको साबिक हरिपुर गाविस–७ भण्टाबारीका २६ वर्षीय मोहम्मद कैजुम मियाँ तथा इनर भनिने इन्द्रदेव कामत, सुनसरी जिल्लाकै साबिक श्रीपुर गाविस–८ का ४० वर्षीय मोहम्मद हैदर अली मियाँ र साबिक श्रीपुर गाविस–३ कुमयाहीका २६ वर्षीय सागिर मन्सुर मियाँलाई पक्राउ गरेको थियो। यस्तै, सप्तरीकै हनुमाननगर कङ्कालिनी नगरपालिका–१ भारदहका ४० वर्षीय दाउद मियाँ २४ पुस २०७४ मा पक्राउ परेका थिए।
प्रहरीले कैजुम मियाँ र हैदर अली मियाँलाई सुनसरी जिल्लाको श्रीपुर जब्दीस्थित कोशी कटान क्षेत्रबाट २०७१ जेठ २९ गते एक थान नल कटुवा पेस्तोल, दुई राउण्ड गोली र गरगहनासहित पक्राउ गरेको थियो। प्रहरीको अनुसन्धानबाट उनीहरु वेगवानी दम्पतीको हत्यामा संलग्न रहेको खुलेको थियो। उनीहरुकै बयानका आधारमा हत्यामा ७ जनाको संलग्नता रहेको खुलेको थियो।
पक्राउ परेकामध्ये कैजुम मियाँलाई सप्तरी जिल्ला अदालतले २०७३ भदौ २६ गते सर्वस्वसहित जन्मकैदको फैसला गरेको सुनाएको थियो। जिल्ला न्यायाधीश कुलप्रसाद शर्माको इजलासले मियाँलाई हत्या आरोपमा सर्वस्वसहित जन्मकैद र डाँका मुद्दामा थप ६ वर्ष गरी २६ वर्षको कैद फैसला सुनाएको थियो।
यस्तै, हैदर अली मियाँलाई हत्या आरोपमा जन्मकैद र डाँका मुद्दामा थप ६ वर्ष गरी २६ वर्ष कैद भएको छ। कैजुम र हैदरलाई जिल्ला न्यायाधीश रामप्रसाद अधिकारीको आदेशले २०७१ असार २९ गतेदेखि पुर्पक्षका लागि थुनामा पठाइएको थियो।
यसैगरी सुनसरी हरीपुर गाविस–७ का २७ वर्षीय इनर भनिने इन्द्रदेव कामत र श्रीपुर गाविस–३ कुमयाहीका २६ वर्षीय सागिर मन्सुर मियाँलाई ११/११ वर्ष कैद फैसला भएको छ। सुनसरी नरसिंह गाविस–९ चिरौनीबाट २०७१ असोज ४ गते पक्राउ परेका कामत र सागिरलाई सप्तरी जिल्ला अदालतले २०७१ असोज ६ गते पुर्पक्षका लागि कारागारमा थुनामा पठाएको थियो।
दाउद मियाँलाई सप्तरी जिल्ला अदालतले २३ पुस २०७७ मा हत्या अभियोगमा ५ वर्ष र डाँका अभियोगमा ६ वर्षको गरी ११ वर्षको कैद सजाय सुनाएको थियो।
हत्यामा संलग्नमध्ये आइतबार मण्डल र सुनसरी हरीपुर गाविस–७ भण्टाबारीका २३ वर्षीय सलिम भनिने अल्लाउद्दिन मियाँ फरार थिए। फरार रहेका उनीहरूको हकमा मुद्दा मुल्तवी राखिएको थियो। सलिम अझै पक्राउ परेका छैनन्।
आरोपितहरूले २०७१ जेठ २१ गते राती हनुमाननगर बजारस्थित पसलसँगै रहेको घरमा वेगवानी दम्पतिको हत्या गरेका थिए। हत्या गरेर उनीहरुले वेगवानीको घरबाट ७७ लाख ६२ हजार रुपैयाँ बराबरको सुनचाँदीका गरगहना र नगद १० हजार रुपैयाँ लुटपाट गरेका थिए।
हत्या गरिएका दम्पतीको शवको धरानस्थित विपी कोइराला स्वास्थ्य विज्ञान प्रतिष्ठानमा २०७१ जेठ २३ गते पोस्टमार्टम भएको थियो। जिल्ला प्रहरी कार्यालयले आरोपितहरूविरुद्ध कर्तव्य ज्यान, डाँका र हातहतियार खरखजाना ऐनअन्तर्गत ०७१ जेठ २३ गते मुद्दा दर्ता गरेको थियो।
आरोपितहरूबाट गरगहना किन्ने सुनसरी ईनरुवा नपा–१ घर भई लौकही गाविस–६ मा सुनचाँदीको पसल गर्ने ३४ वर्षीय सुबोध स्वर्णकारलाई हत्या र चोरीबाट सफाई मिले पनि उनले किनेको चोरीको धनमाल पीडित पक्षलाई फिर्ता दिने फैसला भएको छ।
रुपनी गाउँपालिका–१ बाट २०७१ असार ४ गते पक्राउ स्वर्णकार अदालतको आदेशमा २०७१ असार २९ गते नगद १० लाख धरौटी बुझाई रिहा भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
