काठमाडौं– कोरोना भाइरस संक्रमण नियन्त्रण तथा न्यूनीकरणका लागि जारी निषेधाज्ञाको समयमा होटल सञ्चालन गरी होहल्ला गरेको आरोपमा काठमाडौं प्रहरीले ९ जनालाई पक्राउ गरेको छ।
काठमाडौंको त्रिपुरेश्वरस्थित युनाइटेड वर्ल्ड ट्रेड सेन्टरमा रहेको युनाइटेड बिजनेस होटल सञ्चालन गरी मानिसहरु भेला गरेको आरोपमा प्रहरीले होटलका म्यानेजरसहित ९ जनालाई पक्राउ गरेको हो।
महानगरीय प्रहरी परिसर काठमाडौंका अनुसार आइतबार बिहान करिब ३ बजेको समयमा युनाइटेड होटल खुला रहेको देखिएको थियो। होटलमा मानिसहरुको चहलपहल देखेपछि गएको प्रहरीले ९ जनालाई पक्राउ गरेको थियो।
होटलबाट प्रहरीले २ जना विदेशी पुरुष, २ जना महिला (युवती) र १ जना होटेलका सञ्चालक र अन्य ४ जना नेपाली युवकहरुलाई पक्राउ गरेको हो।
पक्राउ पर्नेमा भोजपुर जिल्लाको भोजपुर नगरपालिका–९ घर भएका होटल सञ्चालक आश्विन श्रेष्ठ, धादिङको निलकण्ठ गाउँपालिका–५ घर भएकी २९ वर्षीया एलिशा मगर, सिन्धुपाल्चोकको मेलम्ची नगरपालिका–१ घर भएकी २१ वर्षीया योगिता भनिने सुनी तामाङ, काठमाडौंको बुढानीलकण्ठ नगरपालिका–४ घर भएका छितिज खड्का छन्।
यस्तै, सिन्धुपाल्चोकको लिशंखु गाउँपालिका– ७ घर भएका २९ वर्षीय नबिन लामा, दोलखाको बैतेश्वर गाउँपालिका–१ घर भएका २३ वर्षीय रोहित तामाङ, काठमाडौंको गोकर्णेश्वर नगरपालिका–८ घर भएका १८ वर्षीय सुजन नेपाली छन्।
पक्राउ पर्ने विदेशीमा काठमाडौं महानगरपालिका–११ बस्दै आएका क्रोयसियाका नागरिक ३० वर्षीय विलिम पोसिन्कोविक (०८६०४७०७५ नम्बरको राहदानी वाहक) तथा अजरबैजानका नागरिक २८ वर्षीय नुरलान्जाहिद ओग्लु (सी ०२५४७०२२ नम्बरको राहदानी वाहक) छन्।
पक्राउ परेका ९ जनालाई नै प्रहरीले निषेधाज्ञाको उल्लंघन गरी संक्रामक रोग (कोरोना) फैलाउने कार्य गरेको भन्दै जिल्ला प्रशासन कार्यालय काठमाडौंमा बुझाएको थियो।
जिल्ला प्रशासन कार्यालय काठमाडौंले होटेल सञ्चालक श्रेष्ठलाई ४ लाख र अन्य ८ जना (विदेशी नागरिक समेत)लाई जनही १५–१५ हजार रुपैयाँ जरिवाना तिराएर छाडेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
