काठमाडाैं- तीन वर्षअघि भारतमा भएका गाडी दुर्घटनामा सिकिस्त घाइते भएकी कलाकार निशा घिमिरेलाई चलचित्र विकास बोर्डअन्तर्गतको चलचित्रकर्मी कल्याणकारी कोषले सहयोग गर्ने भएको छ।
कोषले उनको उपचारका लागि ५१ हजार रुपैयाँ सहयोग गर्ने भएको हो। कमजोर आर्थिक अवस्थाका कारण उनको उपचार गर्न परिवारलाई समस्या परिरहेको थियो।
अभिनय विषय पढ्नका लागि तीन वर्षअघि भारत गएकी निशा दुई महिनामा नै गाडी दुर्घटनामा परेकी थिइन्। उनको लामो समय भारतमै उपचार भयो। तर, अस्पतालको खर्च धान्न नसक्ने भएपछि निशाको परिवारले उनलाई नेपाल ल्याएको थियो।
काठमाडौंको ट्रमा सेन्टरमा तीन महिनासम्म उपचार गर्दा पनि स्वास्थ्यमा कुनै सुधार नभएपछि उनलाई विभिन्न थेरापी सेन्टरमा थेरापी गरइएको थियो। आर्थिक अभावका कारण निशाको परिवारले उनलाई पुनः अस्पताल भर्ना गर्न सकेको थिएन। बिहीवारदेखि भने उनको नर्भिक अस्पतालमा निःशुल्क उपचार सुरु भएको छ।
अस्पतालकी प्रबन्ध निर्देशक मेघा चौधरीले उनको उद्धार गरेकी हुन्। उनको अवस्थामा सुधार आउनेमा चिकित्सकहरु विश्वस्त छन्। पुनः उपचार सुरु भएपछि निशाको मुहारमा पनि खुसी देखिएको छ।
निशाले एक नेपाली फिल्ममा अभिनय गरेकी छन्। फिल्म ‘मधेशीपुत्र २’ मा उनले मुख्य भूमिकामा अभिनय गरेकी थिइन्। उनले ‘डियर जिन्दगी’ नामक टेलिसिरियलसँगै तीन दर्जनभन्दा बढी म्युजिक भिडियोमा पनि काम गरेकी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
