काठमाडौं- गत जेठ २१ गते राति प्रधानमन्त्री केपी ओली शर्मा ओलीले मन्त्रिपपरिषद् हेरफेर गरेर संस्कृति, पर्यटन तथा नागरिक उड्डयनमन्त्री भानुभक्त ढकालको ठाउँमा जनता समाजवादी पार्टी (जसपा)को महन्थ ठाकुर–राजेन्द्र महतो पक्षका उमाशंकर अरगरियालाई मन्त्री बनाए। मन्त्री बनेको एक हप्तामै अरगरियाले नेपाल वायुसेवा निगम सञ्चालक समितिका अध्यक्षलाई राजीनामा दिनेगरी दबाब दिएको तथ्य बाहिर आएको छ।
मन्त्री अरगरियाले निगम सञ्चालक समिति (बोर्डका) अध्यक्ष सुशील घिमिरेलाई पदबाट हट्न दबाब दिएपछि शुक्रबार घिमिरेले राजीनामा दिँदा दिनभर पर्यटन मन्त्रालय र निगममा हलचल पैदा भयो।
‘मन्त्रीज्यूले अध्यक्षलाई ‘तपाईहरुले नै होइन कार्यकारी अध्यक्ष मदन खरेललाई हटाउने गरी निगम सुधार कार्यदलको नाममा रिपोर्ट लेखेको’ भनेर थर्काउनुभो’, निगम उच्च स्रोतले भन्यो, ‘मन्त्रीले यसो भनेपछि उहाँले शुक्रबार बिहान ९ बजे बोर्ड अध्यक्षबाट राजीनामा दिनुभयो।’
घिमिरेको राजीनामाको विषय तत्काल पर्यटन मन्त्रालय हुँदै प्रधानमन्त्री कार्यालयसम्म पुग्यो। प्रधानमन्त्री कार्यालयले तत्काल घिमिरेको राजीनामा स्वीकृत नगर्न पर्यटन मन्त्री र मन्त्रालयललाई समेत निर्देशन दियो।
घिमिरेले राजीनामा दिएकोबारे आफैले पुष्टि गरेका छन्। तर, उनले मन्त्रीसँ जोडिएर आएका विषय असत्य रहेको बताएका छन्। शुक्रबार सामाजिक सञ्जाल फेसबुकमार्फत् जानकारी दिँदै उनले मन्त्रीसँग चिनजान समेत नभएको बताएका छन्।
पूर्वसचिव घिमिरे २०७७ वैशाख ३ गते निगमको कार्यकारी अध्यक्ष नियुक्त भएका थिए। पछि निगममा उनलाई बोर्ड अध्यक्षको जिम्मेवारी दिँदै महाप्रबन्धकमा डिमप्रकाश पौडेललाई नियुक्त गरिएको थियो।
निगमका तत्कालीन कार्यकारी अध्यक्ष मदन खरेलले २०७६ माघमा राजीनामा दिएपछि मन्त्रिपरिषद्ले २०७७ वैशाखमा उनलाई अर्को व्यवस्था नहुँदासम्मका लागि भन्दै कार्यकारी अध्यक्षको जिम्मेवारी दिएको थियो।
घिमिरे पर्यटन मन्त्रालयकै पूर्वसचिव हुन्। २०७६ भदौमा तत्कालीन संस्कृति, पर्यटन तथा नागरिक उड्डयनमन्त्री योगेश भट्टराईले घिमिरेको नेतृत्वमा निगम सुधार कार्यदल गठन गरेका थिए। त्यही कार्यदलले अहिलेको व्यवस्थापनबाट निगम सुधार हुन नसक्ने रिपोर्ट दिएको थियो। घिमिरेको नेतृत्वमा बनेको कार्यदलमा अहिले निगम महाप्रबन्धक रहेका डिमप्रकाश पौडेल पनि सदस्य थिए।
के भन्छन् पर्यटन मन्त्री अगरिया?
पर्यटन मन्त्री अरगरियाले पनि घिमिरेले राजीनामा दिएको बताए। उनले राजीनामा स्वीकृत नभएको बताए। ‘घिमिरेलाई मैले राम्रोसँग चिनेको पनि छैन। उहाँसँग मैले बिफ्रिङ पनि लिएको छैन। उहाँ पूर्व पर्यटनसचिव नै हुनुहुँदो रहेछ,’ मन्त्री अगरियाले भने, ‘उहाँलाई अहिले राजीनामा पत्र फिर्ता लैजान चाहिँ भनिएको हो। पत्र फिर्ता लैजानु भएको छैन। राजीनामा पनि स्वीकृत भएको छैन। यो विषयमा बुझेर मात्रै निर्णय लिन्छु।’
घिमिरेको छोरी अष्ट्रेलिया रहेको र उनले बारम्बार राजीनामा दिँदै उता जाने खोजिरहेको विषय भने आफूलाई जानकारी भएको मन्त्रीले बताए। उनले राजीनामाका लागि आफूले कुनै दबाब नदिएको पनि बताए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।