राजविराज– पार्टी एकताको सन्देश प्रवाहका लागि राजविराज आएका नेपाली कांग्रेसका नेता कृष्णप्रसाद सिटौलालाई सप्तरीका कार्यकर्ताले ¥याख¥याख्ती पारेका छन्।
कांग्रेसको जिल्ला पार्टी कार्यालयमा सोमबार आयोजित क्षेत्रीय सभापति, महासमिति सदस्य, महाधिवेशन प्रतिनिधि, भातृ संस्थाका प्रतिनिधिलगायत अगुवा कार्यकर्ताहरुको छलफलमा नेताहरुको कार्यशैली, गुटबन्दी र असमझदारीका विषयमा कार्यकर्ताले प्रश्न र आलोचना गरेका थिए।
कांग्रेसका जिल्लास्तरीय कार्यकर्ता राधेश्याम यादवले पार्टी सभापति शेरबहादुर देउवा ‘सात पटक प्रधानमन्त्री बन्ने योग छ’ भन्दै हिँडेको प्रसंग कोट्याउँदै भने, ‘जनताले कसैलाई प्रधानमन्त्री बन्नका लागि भोट दिने हो की, पार्टीको कार्यशैलीलाई हेर्ने हो?’
यादवले नेताहरु पदमा आसिन भएपछि जनतालाई वास्ता गर्नै छोडेको गुनासो गर्दै सिटौलालाई प्रश्न गरे, ‘तपाईसँग आफ्ना क्षेत्रका कति जना नेता कार्यकर्ताको सम्पर्क नम्बर छ?’ उनले जनतामुखी बन्नुको सट्टा नेताहरु सुविधाभोगी भएको आरोप लगाउँदै त्यसको परिणाम गत निर्वाचनमा पार्टीले भोग्नु परेको दावी गरे। नेता यादवले थपे, ‘कांग्रेस गाउँमा छ भन्ने तर जिल्ला आउँदा कार्यकर्ता कहाँ नबसी सुविधासम्पन्न होटलमा बस्नुको औचित्य के हो?’
यसैगरी, जिल्ला समितिकी सदस्य निलम कर्णले पार्टीका लागि अहोरात्र दिलो ज्यानले खट्ने महिलालाई पाखा लगाएर ‘पैसावाल र चाकडिवाज’लाई अवसर दिने गरिएको आरोप लगाइन्। उनले कार्यकर्ताको चित्त दुखाएर अवसरवादीको पक्षपोषण गर्नेमा माथिल्लो दर्जाका नेताहरु नै रहेको आरोप लगाइन्। ‘दुःख गरेका र पार्टीको हित सोच्नेलाई प्राथमिकतामा राख्ने की पैसा र चाकडिवाजलाई काखी च्याप्ने?’, सिटौला समक्ष उनको प्रश्न थियो।
पार्टीका १ नम्बर क्षेत्रीय सभापति ललनप्रसाद गुप्ताले अन्तिम समयमा आफुलाई कञ्चनरुप नगरपालिकामा मेयरको टिकट दिएपनि नेताहरुले सहयोग नगर्दा पराजीत भएको भन्दै दुःख व्यक्त गरे। गुटबन्दीका कारण चुनावमा उठेका कार्यकर्ताको प्रचार–प्रसारमा जिल्ला नेतृत्व तहबाट आफुलाई उपेक्षा गरिएको उनको आरोप थियो।
क्षेत्र नं. ३ का सभापति महानन्दप्रसाद यादवले पार्टी संगठन सदृढिकरणका लागि कार्यकर्ताहरुको तर्फबाट आन्दोलनकको आवश्यकता रहेको सुझाव दिए।
कर्ताकर्ताको उत्तर दिँदै सिटौलाले व्यक्तिगत स्वार्थ केन्द्रितसँगै पार्टीको आदर्शबाट विचलित भएका कारण नै कांग्रेसले गत निर्वाचनमा पराजय भोग्नु परेको जिकिर गरे। ‘अब स्वार्थपुर्तिका लागि गुट–उपगुटभन्दा पनि कांग्रेसले एकतावद्ध भई अघि बढ्नु आवश्यक छ।’, सिटौलाले भने, ‘सवैले आ–आफनो ठाउँबाट कमजोरीको जिम्मेवारी लिनैपर्छ। सवैभन्दा बढी जिम्मेवारी त नेतृत्व तहले नै लिनुपर्छ।’ आफनो हितलाई प्राथमिकतामा राखी पार्टी हितको वेवास्ता गर्ने प्रवृत्ति झांगिएकाले त्यसलाई आ–आफनो ठाउँबाट सवैले सच्याएर अघि बढ्नुपर्नेमा उनले जोड दिए।
पार्टीको आदर्शबाट विचलित हुँदा व्यक्ति केन्द्रित हुने, व्यक्ति केन्द्रित हुँदा चाकडिवाज बनिने र सामान्ती संस्कार विकसित भएर जानेतर्फ कांग्रेसी कार्यकर्ताले सचेत रहनु पर्ने भन्दै नेता सिटौलाले यसका लागि केन्द्रिय नेताहरुले एकतावद्ध भई अघि बढ्नु जरुरी रहेको जिकिर गरे। उनले भने, ‘मैले जितेँ÷जितिनँ भन्ने कुरा गौण हो। तर पार्टीले जित्यो÷जितेन भन्ने कुरा प्रधान हो।’
पार्टीमा अहिले उत्पन्न चुनौतिको मुकाबिला गर्न बृहत एकता निर्विकल्प रहेको भन्दै उनले पार्टीभित्र कायम रहेका मत–मतान्तरलाई आपसी छलफलबाट टुंग्याउँदै बाहिर भने एकता प्रदर्शन आवश्यक रहेको औँल्याए।
केन्द्रदेखि स्थानीयसम्मका विभिन्न जिम्मेवारीमा रहेका कांग्रेसीजनलाई एकसाथ जोडेर अघि बढ्नु आवश्यक रहेको भन्दै उनले देशका हरेक ठुला परिवर्तनमा अगुवाई गरेको कांग्रेसले एउटा चुनावमा पछि पर्दैमा आत्तिई हाल्नुपर्ने अवस्था नरहेको दावी गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790590624.png)
-1786602170.png)
