फाइल तस्वीर
काठमाडाैं- संस्कृति, पर्यटन तथा नागरिक उड्डयन मन्त्रालयले नेपाली तथा विदेशी नागरिक नेपाल आउँदा पालना गर्नुपर्ने मापदण्ड सार्वजनिक गरेकाे छ।
मन्त्रालयलले साेमबार एक विज्ञप्ति जारी गर्दै काेराेनाकाे नयाँ भेरियन्ट संक्रमण नियन्त्रण र रोकथाममा प्रतिकूल असर नपर्ने गरी नेपाल आउने नेपाली तथा विदेशी नागरिकहरुको आवागमनलाई व्यवस्थित गर्न मन्त्रिपरिषद्बाट गरिएका निर्णयहरुकाे आधारमा मापदण्ड ताेकिएकाे जनाएकाे हाे।
मन्त्रालयका अनुसार नेपाल आउने यात्रुले पछिल्लो ७२ घण्टाको फोटो एवं बारकोडसहितको पीसीआर रिपोर्ट नेगेटिभ रहेकाे खुलाउनु पर्नेछ। यसबाहेक यात्रुहरुले १० दिनको होटल बुकिङ्ग गरेको प्रमाणका आधारमा मात्र हवाई उडानबाट नेपाल आउन अनुमति प्रदान गरिनेछ।
हवाई उडानमार्फत् विदेशबाट नेपाल आउने यात्रुहरुले नेपाल आइसकेपछि आफ्नै खर्चमा अनिवार्य १० दिन होटल क्वारेन्टिनमा बस्नुपर्ने छ। १० दिन होटल क्वारेन्टिनपञ्चात् कोरोनाको संकेत एवं लक्षण देखिएका व्यक्तिहरुले पीसीआर परीक्षण गर्नुपर्ने मन्त्रालयले जनाएकाे छ।
पीसीआर परीक्षण गर्दा कोराेना रिपोर्ट पोजेटिभ आएमा कम्तीमा १० दिन कोभिड-१९ संकट व्यवस्थापन केन्द्र (सीसीएमसी) ले तोकेको आइसोलेसन सेन्टर वा तोकिएको अस्पताल वा होटल आइसोलेसनमा अनिवार्य बस्नुपर्ने छ।
१० दिन होटल क्वारेन्टिनपश्चात् कोरोनाको संकेत एवं लक्षण नदेखिएका र संकेत एवं लक्षण देखिएकोमा परीक्षण गर्दा काेराेना रिपोर्ट नेगेटिभ आएका व्यक्तिहरुलाई आफ्नो गन्तव्य स्थानसम्म जान अनुमति दिइने मन्त्रालयलले जनाएकाे छ।
नेपाल आएका यात्रुहरुलाई क्वारेन्टिनका लागि होटलसम्म लैजाने र सम्बन्धित यात्रुहरु १० दिनको होटल क्वारेन्टिनमा बसे/नबसेको अनुगमन गरिने जनाइएकाे छ।
होटल क्वारेन्टिनमा बसेका व्यक्तिहरु विरामी भएमा उपचारको व्यवस्था गर्ने,१० दिनको होटल क्वारेन्टिन पूरा गरेका व्यक्तिहरुलाई गन्तव्य स्थानसम्म जान सहजीहरण गर्ने र तोकिएको स्थास्थ्य मापदण्ड पालना नगर्ने होटल सञ्चालक वा यात्रुलाई कोभिड-१९ संकट व्यवस्थापन अध्यादेश, २०७८ बमोजिम तोकिएको
अधिकारी समक्ष कारबाहीका लागि सिफारिस गरिने मन्त्रालयले जनाएकाे छ।
होटल क्वारेन्टिनको लागि होटलको सूचीकरण पर्यटन विभागको समन्वयमा नेपाल पर्यटन बोर्डले गर्नेछ। सुन्धारा, ठमेल, गोंगबु र कलंकी क्षेत्रमा रहेका घना बस्तीलाई ध्यानमा राखी उक्त क्षेत्रमा कोभिड संकमणको सम्भावनालाई नियन्त्रण गर्न यी क्षेत्रमा रहेका होटलहरुलाई क्वारेन्टिन होटलको रुपमा सूचीकृत नगर्ने मन्त्रालयले स्पष्ट पारेकाे छ।
आफ्नो धर्म, रिति, परम्परा अनुसार आफन्तको अन्तिम संस्कार काज-कियामा सहभागी हुन विदेशबाट नेपाल आउने व्यक्तिको हकमा स्थानीय तहको सिफारिसका आधारमा कम्तीमा १० दिनसम्म अनिवार्य होम क्वारेन्टिनमा बस्ने गरी घर/गन्तव्यमा जान अनुमति दिइने छ।
क्वारेन्टिनमा रहँदाको समयमा आफ्नै खर्चमा एघारौ दिनमा पीसीआर परिक्षण गर्नेुपर्ने मन्त्रालयले जनाएकाे छ।
यस्ता छन् सरकारले ताेकेकाे मापदण्डहरु
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
