काठमाडौं- आवेगमा विवेक गुमाउँदा किरिया बस्नुपर्ने छोराहरुले हिरासतको यात्रा तय गर्नुपर्ने अवस्था आएको छ। अहिले बाबुको किरिया बस्नुपर्ने दुई छोराहरु प्रहरी हिरासतमा पुग्नु परेको हाे।
घटना बाँकेको नेपालगञ्जस्थित भेरी अस्पतालको हो। दाङको तुलसीपुर उपमहानगरपालिका-११ का ५४ वर्षीय डिल्ली रावत कोरोना संक्रमित भएपछि उपचारका लागि उनका परिवारले बाँके पुर्याएका थिए। भेरी अस्पतालमा ल्याउँदा आईसीयू खाली नभएकाले वार्डमा राखेर उनको उपचार सुरु गरिएको थियो।
भर्ना भएको ४ दिनमा आईसीयू खाली भएपछि उनलाई सिफ्ट गरियो। अवस्था ‘क्रिटिकल’ रहेको भन्दै उपचारमा संलग्न डाक्टरले बिरामीका दुई छोरा भरत, लोकराज र बिरामीका भाइ मानबहादुरलाई बेला-बेलामा जानकारी गराइराखेका थिए।
एक्सरे रिपोर्ट पनि राम्रो नभएपछि यसबारे परिवारका सदस्यलाई पहिल्यै जानकारी गराइएको अस्पतालका मेडिकल अफिसर चन्द्रप्रकाश साहु बताउँछन्।
अवस्था बिग्रदै गएपछि उनलाई बिहीबार भेन्टिलेटरमा सारियो। तर, परिवारका सदस्यले भेन्टिलेटरमा नराख्ने भनेपछि फेरि निकालियो। त्यसको एक घण्टामा उनले प्राण त्यागे।
त्यसपछि उनका दुई छोरा र भाइसहित सात-आठ जनाको समूहमा आएका व्यक्तिले स्वास्थ्यकर्मीमाथि अन्धाधुन्द आक्रमण गर्न थाले। कोभिड वार्डमा रहेका नर्सकोसमेत उनीहरुले घाँटी समाउन थाले। कोही ढोका फोडेर एक तलामाथिबाट हाम फाले। कोही ट्वाइलेटको क्याबिनमा लुकेर ज्यान जोगाए।
डाक्टरले सक्दो प्रयास गर्दा पनि बचाउन सकेनन् भनेर चित्त बुझाउनुपर्नेमा उनीहरु आक्रमणमा उत्रिए। उनीहरुको आक्रमणबाट चन्द्रप्रकाश साहु, डा. दीपक गुप्ता, डा. समा अन्सारी, स्टाफ नर्स अस्मिनी गुरुङ, सदीक्षा गैरे र वन्दना श्रेष्ठलाई चोटसमेत लागेको छ।
आवेगमा विवेक गुमाउँदा बाबुको मृत्यु भएपछि काजकिरिया गर्नुपर्ने दुई छोराको अहिले प्रहरी हिरासतको यात्रा तय भएको छ। आक्रमणको चौतर्फी दबाबपछि मृतकका दुई छोरा र भाइ पक्राउ परेका छन्।
ज्यान मार्ने उद्योगमा किटानी जाहेरी दिएपछि उक्त कसुरमा अनुसन्धान गर्न भनेर बाँके जिल्ला अदालतले पाँच दिनको म्याद दिएको छ। योसँगै किरिया बस्नुपर्ने छोराहरु हिरासत बस्नुपर्ने अवस्था आएको छ।
यता, घटनाको चौतर्फी विरोध भएपछि छानविन गर्न बाँकेका सहायक प्रमुख जिल्ला अधिकारी शंकर विष्टको संयोजकत्वमा सात सदस्यीय छानबिन समिति गठन गरिएको छ। ज्यान मार्ने उद्योगमा २५ दिनसम्म हिरासतमा राखेर अनुसन्धान गर्न सकिने प्रावधान छ।
अर्कोतर्फ कोरोना संक्रमित भएकाले बाबुको स्याहारमा खटिएका उनीहरु पनि कोरोनाको उत्तिकै जोखिममा रहन सक्छन्। कोरोना संक्रमित भएर गाह्रो भएको अवस्थामा फेरि उनीहरुले नै आक्रमण गरेका डाक्टरले उनीहरुको उपचार गर्नुपर्ने अवस्था आउनसक्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
