काठमाडौं– नेकपा माओवादी केन्द्र परित्याग गरी नेकपा एमाले प्रवेश गरेका ७ जना गैरसांसद मन्त्रीको नियुक्ति बदरको माग गर्दै सर्वोच्च अदालतमा फेरि अर्को रिट दायर भएको छ।
अधिवक्ता कपिलदेव ढकालले बुधबार सर्वोच्च अदालतमा अर्को रिट दायर गरेका हुन्। यसअघि बरिष्ठ अधिवक्ता चन्द्रकान्त ज्ञवालीसहितले ७ जना गैरसांसद मन्त्रीको नियुक्ति बदरको माग गर्दै आइतबार रिट दायर गरेका थिए।
वरिष्ठ अधिवक्ता ढकालसहितले दायर गरेको रिटमा प्रधानन्यायाधीश चोलेन्द्र शमशेर राणाले अन्तरिम आदेश माग नभएको भन्दै कारण देखाउ (लिखित जवाफ माग गर्ने) आदेश जारी गरेका थिए।
प्रधानन्यायाधीश राणाको इजलासले अन्तरिम आदेश जारी गर्न अस्वीकार गरेपछि गैरसांसद ७ जनाको मन्त्री पद तत्कालका लागि जोगिएको थियो।
अधिवक्ता ढकालले पनि यसअघिको रिटमा जस्तै मागदाबी गर्दै बुधबार अर्को रिट दायर गरेका छन्। ढकालले दायर गरेको रिटमा पनि प्रतिनिधि सभाको एउटै कार्यकालमा गैरसांसद व्यक्तिलाई दोस्रो पटक मन्त्रीमा नियुक्त गरिएकाले नियुक्ति खारेजीको मागदाबी गरिएको छ।
एक पटक मन्त्री भएको, तर संघीय संसद सदस्य नभएको व्यक्तिलाई पुनः मन्त्रीको रुपमा सपथ गराउने कार्य गैरसंवैधानिक भएको जिकिर रिट गरिएको छ।
संघीय संसद्को सदस्य नभएको व्यक्तिलाई मन्त्री बनाउन नसकिने संविधानको व्यवस्थालाई मिचेको जिकिर निवेदनमा गरिएको छ। संविधानको पालना गर्ने र गराउने जिम्मेवारी रहेको सरकारको नेतृत्वमा रहेका प्रधानमन्त्री र संविधानका संरक्षक राष्ट्रपतिको मिलेमतोमा संविधानको धारा ७८ को व्यवस्थाको गलत व्याख्या गरिएको पनि रिटमा दाबी गरिएको छ।
रामबहादुर थापा (बादल) टोपबहादुर रायमाझी, लेखराज भट्ट, प्रभु साह, गौरीशंकर चौधरी, मणिचन्द्र थापा र दावा लामा तामाङलाई संघीय संसदको सदस्यता प्राप्त नगरी वैशाख ३१ गते मन्त्रीमा नियुक्त गरी शपथ ग्रहण समेत गराइएकोले उक्त नियुक्ति बदर गरी पाउन रिटमा मागदाबी गरिएको छ।
यस किसिमका कार्य नगर्नू भनी प्रतिषेध, परमादेश लगायत अन्य जो चाहिने आज्ञा आदेश जारी गरी पाउन पनि रिटमा माग गरिएको छ।
अधिवक्ता ढकालले विवादको अन्तिम टुंगो नलागेसम्मका लागि बादल, रायमाझी, भट्ट, साह, चौधरी, थापा र तामाङलाई मन्त्री पदको कुनै जिम्मेवारी नदिन, मन्त्रीको हैसियतमा कुनै काम कारवाही नगर्न, नगराउनू भनेर अन्तरिम आदेश जारी गर्न पनि माग गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751533150.jpg)
-1751526495.png)
-1749826086.png)
