काठमाडौं– बारामा एकै परिवारका दुई दाजुभाइ बालकको हत्या भएको छ। कलैया उपमहानगरपालिका–७ का अब्दुल रसार अन्सारीका दुई छोरा ९ वर्षीय उशमान र ७ वर्षीय अमिनको शव मंगलबार बिहान कलैया उपमहानगरपालिका–११ रंगपुरमा रहेको मदर्शा सल्फिया कन्जुल उलुममा भेटिएको थियो।
मदर्शाको नयाँ बन्दै गरेको भवनभित्र आधा घाँटी काटिएको अवस्थामा बालकको शव भेटिएपछि मंगलबार बिहान स्थानीयले प्रहरीलाई खबर गरेका थिए। प्रहरी घटनास्थलमा पुग्दा घाँटी काटिएको अवस्थामा फेला परेका दुई बालकको शव कलैया–७ का अब्दुल रसार अन्सारीका दुईभाइ छोराको भएको खुलेको थियो।
प्रहरीका अनुसार प्रारम्भिक अनुसन्धानकै क्रममा घटनासँग सम्बन्धित केही महत्वपूर्ण सुराक (क्लु) फेला परेको छ।
राति घरबाट बोलाएर लैजाने को हुन्?
मृतक बालकका बाबु रसार भने वैदेशिक रोजगारीका लागि कतारमा छन्। आमा भने फुपुको छोरा बितेकाले सोमबार फुपुको घर गएकी खुलेको छ। फुपुको छोराको दाहसंस्कार दिउँसो करिब ४ बजे सकिए पनि उनी घर फर्किनन्। राति ९ बजेमात्रै उनी आफ्नो घर फर्किएकी प्रहरी अनुसन्धानबाट खुलेको छ।
घरमा एक छोरी र दुई छोरा छाडेर गएकी उनी घर फर्कँदा दुई छोरा थिएनन्। आमाले ११ वर्षीया छोरीलाई भाइहरु खोइ भनेर सोध्दा एक जना मान्छे आएर बोलाएर लगेको बताएकी थिइन। करिब ७ बजेतिर एक जना मान्छे आएर बोलाएर लगेको भनेर छोरीले बताए पनि राति ९ बजेसम्म छोराहरु उशमान र अमिन नफर्किएपछि उनीहरुको खोजी सुरु भएको थियो।
‘हामीले रातभर खोज्यौं तर केही फेला परेन। बिहान दुई जनाकै लाश फेला पर्यो,’ कलैया उपमहानगरपालिकाका मेयर राजेश राय यादवले नेपाल लाइभसँग भने।
प्रहरीको अनुसन्धानबाट पनि सोमबार बेलुकी करिब ७ बजेतिर एक जना अपरिचित मान्छेले उनीहरुलाई लगेको खुलेको छ। भाइ घरमै भएको, दाइ बाहिरतिर भएको बेला दाइ उशमानसँगै एक अपरिचित व्यक्ति पनि आएको र दाइ उशमानले भाइलाई मेरो साथी हो हिँड एकछिन बाहिर गएर आउँ भनेर भाइ अमिनलाई लिएर गएको उनीहरुकी दिदीले बताएकी छिन्।
७ बजेतिर घरबाटै उशमान र अमिनलाई लिएर गएका ती व्यक्ति को हुन् भन्नेबारे अहिलेसम्म केही खुलिसकेको छैन। बाबु वैदेशिक रोजगारीमा हुनु, आमा आफन्तको मृत्यु भएपछि आफन्तको घरमा जानु र त्यही मौकामा दुई बालकको हत्या हुनुले नजिककै चिनेजानको व्यक्तिबाट हत्या भएको हुनसक्ने प्रहरीले अनुमान गरेको छ।
पुरानो रिसिबिका कारण हत्या भएको हुनसक्ने आशंकाका साथ प्रहरीले अनुसन्धान पक्रिया अगाडि बढाएको छ। यद्यपि उनीहरुलाई राति घरबाटै बोलाएर लैजाने व्यक्ति को हुन् भन्नेबारे प्रहरीले अहिलेसम्म खुट्याउन सकेको छैन।
डग स्निफिङदेखि सीमा नाका जाँचसम्म
दुई बालकको विभत्स हत्या भएपछि अनुसन्धानमा जुटेको प्रहरीले तालिमप्राप्त कुकुर परिचालनदेखि सीमा नाकामा कडा जाँच समेत गरेको छ। घटनास्थललाई सुरक्षित राखेर प्रदेश २ प्रहरी कार्यालय डग शाखा बर्दीबासबाट तालिम प्राप्त कुकुर लगेर प्रहरीले स्निफिङ गराएको थियो। कुकुरले केही महत्वपूर्ण क्लुहरु दिएको प्रहरीको भनाइ छ।
घटनास्थलबाट नजिकै भारतीय सीमा भएकाले बालकको हत्यामा संलग्नहरु सीमा पार गरेर जानसक्ने भन्दै प्रहरीले सीमा नाकामा समेत कडा जाँच गरेको थियो। शंकास्पद व्यक्तिहरुमाथि सोधपुछ र निगरानी तीव्र पारिएको पनि प्रहरीले जनाएको छ।
मृत बालकको शव पोस्टमार्टमका लागि कलैया अपस्पतामा राखिएको छ। शवको पोस्टमार्टम भइसके पनि रिपोर्ट भने आइनसकेको बाराका एसपी दीपेन्द्र शाहीले बताए।
अबोध बालक हुन्, कसैसँग रिसिबि छ जस्तो पनि लाग्दैन– मेयर यादव
हत्या गरिएका दुई बालकका गरिब परिवारका सदस्य हुन्। उनीहरुको छिमेकी समेत रहेका कलैया उपमहानगरपालिकाका मेयर राजेश राय यादवका अनुसार उनीहरुको बस्ने बास बाहेक केही पनि छैन।
‘एकदमै गरिब परिवार हो। बस्नका लागि बास बाहेक १ कट्ठा पनि जमिन छैन। यस्ता अबोध बालकलाई कसले मार्यो होला?’ मेयर यादवले भने। उनीहरुका बाबु विगत तीन वर्षदेखि वैदेशिक रोजगारीका लागि कतारमा छन्।
बालकको हत्या भएपछि छिटोभन्दा छिटो छानबिन गरेर दोषीलाई सार्वजनिक गरिनु पर्ने भन्दै प्रशासनलाई भनिसकेको मेयर यादवले बताए। ‘यो निकै दर्दनाक घटना हो। यस्ता अपराधीलाई चाँडै कानुनी दायरामा ल्याइएन भने भोलि अर्को दुर्घटना निम्तिन सक्छ। चाँडो अपराधी पत्ता लगाएर सार्वजनिक गर्न भनेका छौं,’ मेयर यादवले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
