काठमाडौं– ३८ सय किलो सुन तस्करी र सनम शाक्य हत्या प्रकरणमा मुख्य व्यक्ति भनिएमा चुडामणी उप्रेती ‘गोरे’को तेस्रो दिनको बयान जिल्ला अदालत मोरङमा शुरु भएको छ। मंगलबार पक्राउ परेका गोरेलाई सोही दिन जिल्ला अदालतमा गोरेलाई पेश गरिएकाले बुधबारबाट अदालतमा थुनछेक बयान सुरु भएको थियो।
दुईदिम्म पनि उनको बयान समाप्त नभएकाले शुक्रबारपनि जारी रहेको जिल्ला अदालतले जनाएको छ। आजबाट थुनछेक बहश सुरु गर्ने तयारीमा सरकारी वकिलहरुलाई रहन भनिएको भएपनि बयानका कारण आइतबार पुग्न सक्ने सम्भावना रहेको जिल्ला अदालतले जनाएको छ।
जिल्ला अदालतले मंगबारमात्र ३० अभियुक्त मध्ये २८ जना पुर्पक्षका लागि थुनामा पठाउने, एक जनालाई १५ धरौटी र एक जनालाई सामान्य तारेखमा राख्ने आदेश गरेको थियो। मंगलबार गोरेलाई प्रहरीले काठमाडौंमा पक्राउ गरेको थियो। सवै पक्षको बहश समाप्त भएर न्यायाधीश नारायाणप्रसाद शर्मा २८ जना प्रतिवादी तत्कालीन प्रमाणवाट दोषी देखिएको भन्दै थुनामा पठाउने आदेश गरेको थियो। जिल्ला न्यायाधीश शर्माको इजलासमा बैसाख २७ गतेदेखि बहश सुरु भएको मुद्दा लगातार सुनुवाई हुदै आदेश भएको थियो । गोरेलाई मुख्य अभियुक्तको रुपमा हेरिएकाले उनले दिने बयानमा थप संलग्न व्यक्तिहरुको खुलासा हुने भएकाले यसलाई अन्य व्यक्तिको पोल खुल्ने रुपमा हेरिएको छ। उनको बयानका आधारमा बिहिबार नै विराटनगरमा सुन पसले रेवन्त आचार्य पक्राउ परिसकेका छन्।
प्रहरीको डेढ महिना लामो अनुसन्धानपछि गत बैसाख २६ गते जिल्ला सरकारी वकिलको कार्यालयले बहालवाला प्रहरी अधिकृतसहित २९ जनालाई पक्राउ गरी आरोपपत्रसँगै अदालतमा पेस गरेको थियो। उनीहरु विरुद्ध संगठित अपराध अन्तर्गत आपराधिक समूह स्थापना गरी सुन चोरी–पैठारी र निकासी गरेको, अपहरण तथा शरीर बन्धक र कर्तव्य ज्यान शीर्षकमा मुद्दा दर्ता भएको थियो।
मिलेमतोमा सुन तस्करी गर्ने चूडामणि उप्रेती ‘गोरे’ समूहले त्रिभुवन अन्तर्रा्ष्ट्रिय विमानस्थलबाट हालसम्म ३८ सय किलो सुन तस्करी गर्दै १७ अर्ब १ करोड ८० लाख रुपैयाँ राज्यलाई नोक्सान पुर्याएको दावी अभियोग पत्रमा गरिएको छ। सरकारी वकिलको कार्यालयले उक्त रकम विगोका रुपमा उनीहरुसँग असुल हुनुपर्ने माग–दावी गर्दै जिल्ला अदालत मोरङमा मुद्दा दायर गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
