काठमाडौं– राष्ट्रपति विद्यादेवी भण्डारीले नयाँ सरकार गठनका लागि आह्वान गरेकी छन्।
प्रधानमन्त्री केपी शर्मा ओली प्रतिनिधि सभामा विश्वासको मत प्राप्त गर्न नसकेर पदमुक्त भएसँगै राष्ट्रपतिले बहुमतको नयाँ सरकार गठनका लागि आह्वान गरेकी हुन्।
राष्ट्रपतिले संविधानको धारा ७६ को उपधारा २ बमोजिम दुई वा दुई भन्दा बढी दलको समर्थनप्राप्त प्रधानमन्त्रीको नामसहित दाबी प्रस्तुत गर्नका लागि तीन दिनको समय दिएकी छन्।
राष्ट्रपति भण्डारीले वैशाख ३० गते साँझ ९ बजेभित्र नेपालको प्रधानमन्त्री पदमा नियुक्त गर्ने प्रयोजनका लागि दाबी पेस गर्न संसदमा प्रतिनिधित्व गर्ने दल (सांसद)लाई आह्वान गरेकी हुन् ।
यसअघि सोमबार बसेको प्रतिनिधि सभा बैठले विश्वासको मत लिने प्रधानमन्त्री केपी शर्मा ओलीको प्रस्ताव अस्वीकृत गरेको थियो । प्रतिनिधि सभाबाट विश्वासको मत नपाएपछि ओली स्वतः पदमुक्त भएका थिए ।
ओलीले प्रतिनिधि सभाबाट विश्वासको मत लिन नसकेपछि नेपाली कांग्रेस, नेकपा माओवादी केन्द्र र जनता समाजवादी पार्टी (जसपा)ले संयुक्त वक्तव्य जारी गर्दै संविधानको धारा ७६ को उपधारा (२) अनुसार नयाँ प्रधानमन्त्री नियुक्त गर्ने प्रक्रिया शुरु गर्न राष्ट्रपतिलाई आह्वान गरेका थिए ।
प्रतिनिधि सभामा हाल कायम संसस्य संख्या २७१ छ । नयाँ सरकार गठनका लागि बहुमत पु¥याउन १३६ सांसद संख्या आवश्यक पर्छ ।
नयाँ सरकार गठनका लागि नेपाली कांग्रेस, माओवादी केन्द्र र जसपाको डा बाबुराम भट्टराई र उपेन्द्र यादव पक्षबीच गठवन्धन हुने सम्भावना छ ।
कांग्रेसका ६१, माओवादी केन्द्रका ४९ र जसपाको बाबुराम–उपेन्द्र समूहका १६ सांसद छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
