काठमाडाैं- गण्डकी प्रदेशका मुख्यमन्त्री पृथ्वीसुब्बा गुरुङले राजीनामा दिएपछि प्रदेश सरकार निर्माणमा नयाँ विकल्प सुरु भएको छ।
विपक्षीले ल्याएको अविश्वासको प्रस्तावमा मतदान हुनुअघि नै गुरुङले राजीनामा दिएका हुन्। विपक्षीमा रहेर अविश्वासको प्रस्तावलाई समर्थन गर्ने दललाई आफूतिर तान्न राजीनामा दिएको आकलन गरिएको छ। सरकारमा रहेर विपक्षी गठबन्धन भत्काउन असम्भव रहेपछि गुरुङले राजीनामा दिएका हुन्।
प्रदेश प्रमुख सीता पौडेलले नयाँ सरकार बनाउन तीन दिनको समय उपलब्ध गराएकी छन्। यही बीचमा राष्ट्रिय जनमोर्चाका सांसद तान्ने ध्याउन्नमा गुरुङपक्ष लाग्ने बताइएको छ। बहुमतका लागि ३१ मत आवश्यक पर्ने एमालेलाई २ मतको आवश्यकता थियो। तीन सांसद रहेको जनमोर्चाले एमालेसँग सहकार्य गरेको अवस्थामा पुनः एमाले नेतृत्वमा सरकार बन्ने अवस्था आउँछ।
‘प्रदेश प्रमुखले दिएको समयमा दलहरु एक आपसमा छलफल गर्न स्वतन्त्र भए,’ गुरुङपक्षीय सांसद धनञ्जय दवाडीले भने,‘हामी पनि मुख्यमन्त्री फेरि दाबी गर्न पनि ओपन नै भयौं। अविश्वासको प्रस्तावको औचित्य सकिएपछि त सबैसँग छलफल हुन्छ।’
संसदभित्रका वामपन्थी दलसँग सहकार्य गरी पुन: सरकार बनाउन पहल गरिने उनले बताए। विपक्षीको मोर्चाबन्दी भत्काउनका लागि पनि राजीनामा आएको गुरुङ पक्षको तर्क छ।
वैशाख २ मा संसद्मा दर्ता भएको अविश्वासको प्रस्तावमाथि गत १५ गते मतदान हुने कार्यसूची तय भएको थियो। तर, जनमोर्चाका सांसद खिमविक्रम शाही सम्पर्कविहीन भएपछि सदन स्थगित भएको थियो। अविश्वासको प्रस्तावमाथि मतदान हुने नयाँ कार्यसूची सोमबारका लागि थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
