काठमाडौं- पर्यटन विभागले हिमाल आरोहणलाई व्यवस्थित र सहज बनाउने ४ बुँदै शर्त अगाडि सारेको छ। विभागले सन् २०२१ को वसन्त ऋतुको आरोहण व्यवस्था गर्ने सगरमाथा हिमालचुली आरोहणमा नयाँ शर्त ल्याएको हो।
आरोहण अनुमति पत्र लिने व्यक्तिहरुले सगरमाथा हिमालचुलीमा डोरी पुगेको मितिबाट शुरु भएको अनुकूल मौसमका लागि आरोहण अनुमति पत्र नं. ६, ७, ९, १४, १७, १९, २०, २१, २२, २३, २४, २५, २६, २७, ३२, ३४, ३६, ३७, ३८ मार्फत् आरोहण अनुमति लिएका व्यक्तिहरूले आरोहण गर्नु पर्ने शर्त जारी गरेको छ।
यसैगरी, त्यसपछिको अनुकूल मौसममा आरोहण अनुमति पत्र नं. ४०, ४१, ४३, ४५, ४६, ४७, ४९, ५०, ५१, ५२, ५५, ५७, ५९, ६२, ६३, ६७, ६८ मार्फत् आरोहण अनुमति लिएका व्यक्तिहरूले आरोहण गर्नुपर्ने विभागले जनाएको छ।
आरोहण अनुमति पत्र नं. ७२ देखि पछि अनुमति प्राप्त गरेका आरोही दलका व्यक्तिहरूले त्यसपछिको अनुकूल मौसममा मात्र आरोहण गर्नु पर्ने विभागको भनाइ छ।
यस योजनाले आरोहण अनुमति प्राप्त व्यक्तिको आरोहणमा असहज अवस्था सृजना हुने भएमा सम्बन्धित एजेन्सीहरूले आपसी सहमति र समन्वयमा १५० देखि १७० को संख्यामा नबढ्ने गरी र आरोहणमा असर नपर्ने गरी तोकिएका आरोहण अनुमतिपत्रमा उल्लेखित व्यक्तिहरूको आरोहण योजना परिवर्तन गर्न सक्ने विभागले जनाएको छ।
यस्तो योजना परिवर्तन गर्दा स्थानीय आरोहण व्यवस्थापन गर्ने एजेन्सीले व्यवस्थापन गर्ने आरोही दलको सुरक्षित आरोहणको प्रबन्ध गर्नु पर्ने विषय अगाडि सारेको छ।
पर्वतारोहण सञ्चालक संघ नेपालले सगरमाथा हिमाल आरोहणका लागि अनुमतिपत्र लिएका आरोही दलको आरोहण व्यवस्थापन गर्न स्थानीय आरोहण व्यवस्थापन गर्ने एजेन्सीहरूलाई एक आपसमा आपसी समन्वय गरी प्रत्येक अनुकूल मौसममा १५० देखि १७० को संख्यामा नबढ्ने गरी अनुमतिपत्र प्राप्त व्यक्तिहरूलाई आरोहण गराउने प्रबन्ध गर्न/गराउन विभागले अनुरोध गरेको छ।
यसैगरी, विभागले सम्बन्धित एजेन्सीहरूले आपसी समन्वयमा यसै बमोजिम मात्र आरोहणका कार्य गर्ने/गराउने प्रबन्ध गर्नुपर्ने विभागको सूचनामा उल्लेख छ। कुनै एक हिमाल आरोहण गरेर वा कुनै क्षेत्रमा पदयात्रा गरी फर्किएका पर्यटकहरू अर्को कुनै हिमाल आरोहणमा जाने भएमा अनिवार्य रूपमा पीसीआर परीक्षण गरी सोको नेगेभिट प्रतिवेदन पेश गरेमा मात्र हिमाल आरोहण गर्ने अनुमति पत्र उपलब्ध गराउने सकिने विभागले जनाएको छ।
अनुमति प्राप्त हिमालको लस्कर मार्गमा यात्रारत रहँदा, आधार शिविरमा बस्दा साथै सो भन्दा माथिल्लो लस्कर मार्गमा यात्रामा रहँदा आफ्नो समूहमा मात्र रहन भनिएको छ।
अनावश्यक भीडभाड नगर्ने प्रबन्ध सम्बन्धित स्थानीय आरोहण व्यवस्थापन गर्ने एजेन्सी र पर्वतीय पथ प्रदर्शकले मिलाउनु पर्ने विभागको भनाइ छ। कुनै पनि पर्यटकको खोजी तथा उद्धार गर्नु/गराउनु परेमा पर्यटन विभाग र पर्यटन प्रहरी इकाईमा अनिवार्य जानकारी गराएर मात्र खोजी तथा उद्धार सम्बन्धी कार्य गर्न समेत विभागले निर्देशन दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
