काठमाडौं– नेपाल वायु सेवा निगम (नेपाल एयरलाइन्स)को जहाज हेभी ल्यान्डिङका कारण बिग्रिएको ल्यान्डिङ गियर बनाउन २२ करोड रुपैयाँ खर्च हुने भएको छ।
ल्यान्डिङ गियर मर्मत गर्न झन्डै आधा अर्ब रुपैयाँ खर्च हुने अनुमान गरिएको थियो। तर, अन्तर्राष्ट्रिय प्रतिस्पर्धाबाट गियर मर्मत गराउँदा २२ करोड रुपैयाँ मात्रै खर्च हुने अवस्था आएको निगम महाप्रबन्धक डिमप्रकाश पौडेलले बताए।
निगमका पाइलटद्वय सुनिल श्रेष्ठ र महेशमान डंगोलले ८ जनवरीमा दोहाबाट काठमाडौं अवतरण गरेको जहाज हेभी ल्यान्डिङ भएको थियो। तर, पाइलटले नियमित फ्लाइट डाटा विश्लेषण कार्यक्रममा जानकारी दिएका थिएनन्।
मासिक रुपमा एयरबसले पठाउने म्यानुयल रिपोर्टमा जहाज हेभी ल्यान्डिङ भएको विवरण पठाएपछि निगमले उक्त विषय छानबिन गरेको थियो। उनका अनुसार निगमले जहाज हेभी ल्यान्डिङ भएको विषय ९ फेब्रुअरीमा थाह पाएको थियो।
छानबिनपछि निगमले २ पाइलटलाई कारबाही गर्ने निर्णय गरेको थियो। निगमले गठन गरेको अध्ययन कार्यादलको रिर्पोटका आधारमा २ जनालाई पाइलटलाई कारबाही गर्ने निर्णय भएको थियो।
निगमले वाइडबडी ए३३० ‘मकालु’ उडान गर्दै हेभी ल्यान्डिङ गरेर सूचना नदिने २ जना पाइलटलाई २ महिनासम्म उडानमा प्रतिबन्ध लगाउने निर्णय गरेको थियो।
साथै निगमले १५ वटा सेक्टरको उडानमा उनीहरुले सिरिनयर क्याप्टेनको साथमा उडान गर्नु पर्ने निर्णय गरेको छ। हेभी ल्यान्डिङ प्रकरणमा क्याप्टेन महेशमान डंगोल र पाइलट सुनील श्रेष्ठलाई निगमले यस्तो कारबाही गरेको हो। यसैगरी, पाइलट श्रेष्ठलाई २ वर्षसम्म उडान कमान्ड गर्ने नपाउने र डंगोललाई ३ वर्षसम्मको तलब नबढाउने निर्णय भइसकेको छ।
सोही क्रममा जहाजको ल्यान्डिङ गियर गएको थियो। अहिले ल्यान्डिङ गियर मर्मतको काम भइरहेका छ।
जहाज अबको केही दिनमा उडान योग्य हुने निगमले जनाएको छ। यो विषयमा नेपाल नागरिक उड्डयन प्राधिकरणले समेत छानबिन गरिरहेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।