फाइल तस्वीर
काठमाडौं– नेपाल वायुसेवा निगमको घाटा आर्थिक वर्ष २०७५/०७६ को तुलनामा आर्थिक वर्ष २०७६/०७७ मा पौने २ अर्ब रूपैयाँले बढेको छ ।
निगमले गत आर्थिक वर्ष २०७६/०७७ मा कुल ३ अर्ब ८९ करोड ८३ लाख २० हजार ४ सय ६९ रूपैयाँ घाटा ब्यहोरेको थियो । अघिल्लो आर्थिक वर्ष २०७५/०७६ मा निगमको घाटा २ अर्ब ६ करोड ४२ लाख ९९ हजार ४ सय २४ थियो ।
आर्थिक वर्ष २०७५/०७६ को तुलनामा निगमले आर्थिक वर्ष २०७६/०७७ मा १ अर्ब ८३ करोड ४० लाख २१ हजार ४५ रूपैयाँ बढी घाटा ब्यहोरेको देखिएको छ । आर्थिक वर्ष २०७४/०७५ सम्म भने निगम नाफामा नै थियो ।
तर, पछिल्लो वर्ष कोरोना भाइरस (कोभिड १९)को महामारीका कारण घाटा बढेको निगमले जनाएको छ । कोरानका कारण गत आर्थिक वर्षको ४ महिनासम्म निगमका सबै उडान बन्द जस्तै थिए । २०७६ चैत ११ गतेबाट २०७७ का असार मसान्तसम्म निमगले नियमित उडान भर्न पाएको थिएन। उक्त अवधिमा निमगले केही चार्टर उडान भने भरेको थियो ।
निगमले गत आर्थिक वर्षमा १४ अर्ब २४ करोड ६१ लाख ३६ हजार ७ सय ९६ रूपैयाँ सञ्चालन आम्दानी गरेको थियो। तर, सोही अवधिमा १४ अर्ब ३७ करोड ४३ लाख ४४ हजार ८ सय ७६ रूपैयाँ सञ्चालन खर्च भएको निगमले जानकारी दिएको छ ।
यसबाहेक बिमा तथा अन्य खर्चसमेत गरी निगमले कुल ३ अर्ब ८९ करोड ८३ लाख २० हजार ४ सय ६९ रूपैयाँ घाटा बेहोरेको हो।
निगमले अघिल्लो आर्थिक वर्ष २०७५/०७६ मा भने १५ अर्ब ९७ करोड २३ लाख ९३ हजार १ सय ४१ रूपैयाँ सञ्चालनबाट आम्दानी गरेको थियो भने सञ्चालन खर्च १५ अर्ब ३७ करोड २० लाख ६० हजार ५ सय ३१ रूपैयाँ रहेको थियो । यसबाहेक सबै आम्दानी र खर्च गरी निगमले सोही आवमा कुल २ अर्ब ६ करोड ४२ लाख ९९ हजार ४ सय २४ रूपैयाँ घाटा ब्यहोरेको थियो।
‘कोरोनाका कारण खुम्चिएको व्यापार लयमा फकिर्दै थियो, तर दोस्रो लहरले फेरि केही चुनौती थप्ने अवस्था आउन सक्छ', निगम महाप्रबन्ध डिमप्रकाश पौडेलले भने, ‘अहिले नगद प्रभावमा कुनै समस्या छैन। कर्मचारीको तलब र सर्ट लोनको ब्याज र किस्ता तिरिरहेका छौं। तर, २ वटा न्यारोबडी र २ वटा वाइडबडी जहाज खरिदका लागि लिइएको ऋणको किस्ता र ब्याज भने भुक्तानी गर्न सकेका छैनौं।’
पछिल्लो समयमा निगमलाई भारतको दिल्ली उडानबाट केही राहत भएको थियो। तर, भारतका विभिन्न सहरुमा शुरु भएको लकडाउन तथा यात्रामा गरिएको कडाइका कारण दिल्ली उडानमा पनि यात्रु घट्नसक्ने अनुमान गरिएको छ।
यसैगरी कोरोनाका कारण बन्द भएको बैंककको उडान पनि खुल्न सकेको छैन। निगकले अहिले भारतको दिल्ली, मलेसिया, कतार, हङकङ र दुबईका उडान भर्दै आएको छ।
निगमसँग अन्तर्राष्ट्रिय उडानका लागि २ वटा न्यारोबडी र २ वटा वाइडबडी जहाज छन्। साथै आन्तरिक उडानका लागि ३ वटा ट्विनअट जहाज रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
