काठमाडौं- नेपाल वायु सेवा निगम (नेपाल एयरलाइन्सल)ले कोरोनाका कालको एक वर्षमा करिब ४ अर्ब घाटा बेहोरेको छ। निगमले २०७६ चैत ११ गतेदेखि २०७७ चैत १० गतेसम्म एक वर्षको सयममा ३ अर्ब ९२ करोड रुपैयाँ घाटा बेहोरेको हो।
सरकारले कारोना नियन्त्रणका लागि भन्दै २०७६ चैत ११ गतेबाट लकडाउन गरेपछि निगमको सबै नियमित उडान बन्द भएको थियो। तर, बीचमा केही चार्टर उडान भने गरेको थियो। लकडाउनसँगै बन्द भएकोे उडान झन्डै ६ महिनसम्म बन्द जस्तै भएको थियो।
तर, निगमले यसबीचमा चार्टर उडानमार्फत् गरेको आम्दानीबाट कर्मचारीलाई तलब र सर्ट लाने भने तिर्न सफल भएको छ।
‘कोरोनाका कारण खुम्चिएको व्यापार लयमा फकिर्दै थियो। तर, दोस्रो लहरले फेरि केही चुनौति थप्ने अवस्था आउने सक्छ। अहिले नगद प्रभावमा कुनै समस्या छैन। कर्मचारीको तलब र सर्ट लोनको ब्याज र किस्ता तिरिरहेका छौं,’ निगम महाप्रबन्ध डिमप्रकाश पौडेलले भने।
उनका अनुसार निगमले जहाज खरिदका लागि लिइएको ऋणको किस्ता र ब्याज भने भुक्तानी गर्न सकेकाे छैन।
‘२ वटा न्यारोबडी र २ वटा वाइडबडी जहाज खरिदका लागि लिइएको ऋणको किस्ता र ब्याज भने भुक्तानी गर्न सकेका छैनौं,’ उनले भने।
पछिल्लो समयमा भारतको दिल्ली उडानबाट निगमलाई केही राहत मिलेकाे थियो। तर, भारतका विभिन्न सहरमा सुरु भएको लकडाउन तथा यात्रामा गरिएको कडाइका कारण दिल्ली उडानमा पनि यात्रु घटनसक्ने अनुमान गरिएको छ।
यसैगरी, कोरोनाका कारण बन्द भएको बैंककको उडान पनि खुल्न सकेको छैन। निगमले अहिले भारतको दिल्ली, मलेसिया, कतार, हङकङ र दुबईका उडान गर्दै आएको छ।
निगमसँग अन्तर्राष्ट्रिय उडानका लागि २ वटा न्यारोबडी र २ वटा वाइडबडी जहाज छन्। साथै आन्तरिक उडानका लागि ३ वटा टीवनअटर जहाज रहेका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।