काठमाडौं- शिक्षा, विज्ञान तथा प्रविधिमन्त्री कृष्णगोपाल श्रेष्ठले दक्षिण कोरिया सरकारको सहयोगमा शिक्षा क्षेत्रमा केही महत्त्वपूर्ण परियोजना सम्पन्न गरेकोमा दक्षिण कोरियाली राजदूतमार्फत् कोरिया सरकारको प्रशंसा गरेका छन्।
उनले कोरियाली सहयोग नियोग (कोइका)को सहयोगमा तीनवटा परियोजना कार्यान्वयनमा रहेको बताउँदै यस किसिमको सहयोगबाट दुई देशबीचको मित्रता अझै प्रगाढ हुँदै जाने बताए।
राजदूत पार्क छोङ सुकसँग मन्त्रालयमा भएको शिष्टाचार भेटमा मन्त्री श्रेष्ठले दक्षिण कोरिया नेपालमा लगानी गर्ने पाँच ठूला देशमा परेकोमा खुसी व्यक्त गरे। ‘दक्षिण कोरियाली सरकारले नेपालको शिक्षा र विज्ञान तथा प्रविधि क्षेत्रमा द्विपक्षीय सम्बन्ध र सहकार्यलाई थप सवल बनाउने विश्वास लिएको छु,’ उनले भने।
उनले कोइकाको सहयोगमा निर्मित सीटीईभीटीअन्तर्गतको टीआईटीआईमा सम्पन्न भएको आईटी भवन उदाहरणीय रहेको बताए। प्रधानमन्त्री केपी शर्मा ओलीबाट यही वैशाख १७ गते उद्घाटन गरिने सो भवन सूचना र प्रविधिका लागि महत्त्वपूर्ण हुने मन्त्री श्रेष्ठको भनाइ थियो।
शिष्टाचार भेटका क्रममा राजदूत छोङसुकले दक्षिण कोरियाली सरकार नेपालको शिक्षा क्षेत्रमा थप सहयोग गर्न तयार रहेको बताए। शिक्षा, विज्ञान तथा प्रविधिमन्त्रीसँग भेट्न पाउँदा आफूलाई खुसी लागेको बताउँदै उनले कोइका र राजदूतावासले नेपालको अर्थतन्त्र विकासमा निरन्तर सहयोग गर्ने प्रतिबद्धता व्यक्त गरे।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।