उपभोग्य वस्तुको मूल्यवृद्धि ३.०२ प्रतिशत, यस्ता छन् अन्य आर्थिक तथा वित्तीय सूचक

अर्थ समाचार

नेपाल लाइभ सोमबार, चैत ३०, २०७७ १८:२५

काठमाडौं- चालु आर्थिक वर्षको पहिलो आठ महिना अर्थात् फागुन मसान्तसम्ममा वार्षिक विन्दुगत उपभोक्तातर्फको मूल्यवृद्धि (मुद्रास्फिति) ३.०२ प्रतिशत पुगेको छ। सोही अवधिमा थोकतर्फको मूल्यवृद्धि ६.३० प्रतिशत रहेको देखिएको छ।

नेपाल राष्ट्र बैंकले सोमबार सार्वजनिक गरेको देशको वर्तमान आर्थिक तथा वित्तीय स्थितिअनुसार मूल्यवृद्धिको यस्तो अवस्था देखिएको हो। अघिल्लो आर्थिक वर्षको सोही महिनामा उपभोक्ता मुद्रास्फिति ६.५७ प्रतिशत र थोक मुद्रास्फिति ६.७० प्रतिशत रहेको थियो।

यो अवधिमा खाद्य तथा पेय पदार्थ समूहको मूल्यवृद्धि ३.८० प्रतिशत र गैरखाद्य तथा सेवा समूहको मूल्यवृद्धि २.४१ प्रतिशत रहेको छ। राष्ट्र बैंकको तथ्यांकअनुसार २०७६ फागुनको तुलनामा २०७७ फागुनमा घिउ तथा तेल, फलफूल, सुर्तीजन्य वस्तु र दाल तथा गेडागुडी उपसमूहको मूल्यवृद्धि क्रमशः १९.९७ प्रतिशत, १३.६७ प्रतिशत, १०.४१ प्रतिशत र १०.१७ प्रतिशत रहेको छ।

समीक्षा अवधिमा काठमाडौं उपत्यकामा २.५० प्रतिशत, तराईमा ३.२५ प्रतिशत, पहाडमा ३.४० प्रतिशत र हिमालमा १.१४ प्रतिशत मूल्यवद्धि कायम भएको छ। २०७६ फागुनमा यी क्षेत्रहरुमा क्रमशः ७.६१ प्रतिशत, ६.८४ प्रतिशत, ५.५३ प्रतिशत र ५.४२ प्रतिशतले मूल्यवृद्धि भएको थियो।

यस अवधिमा उपभोग्य वस्तु, मध्यवर्ती वस्तु र पुँजीगत वस्तुको थोक मूल्यवृद्धि गत वर्षको सोही महिनाको तुलनामा क्रमशः ८.४५ प्रतिशत, ५.५९ प्रतिशत र ३.४७ प्रतिशत रहेको छ भने निर्माण सामग्रीको थोक मूल्यवृद्धि ४.९२ प्रतिशत रहेको छ।

फागुन मसान्तसम्ममा नेपालले गरेको कूल वैदेशिक व्यापारमा आयात २.१ प्रतिशत र निर्यात ७.८ प्रतिशतले बढेको छ। त्यस्तै विप्रेषण आप्रवाह नेपाली रुपैयाँमा ८.६ प्रतिशतले र अमेरिकी डलरमा ५.० प्रतिशतले बढेको छ।

यो अवधिमा मुलुकको शोधानान्तर स्थिति ६८ अर्बले बचतमा रहेको देखिएको छ भने कूल विदेशी विनिमय सञ्‍चिति १२ अर्ब ३७ करोड अमेरिकी डलर बराबर रहेको छ।

फागुन मसान्तसम्मको बजेट खर्चको अवस्था हेर्दा संघीय सरकारको खर्च पाँच खर्ब ७१ अर्ब दुई करोड र राजस्व परिचालन पाँच खर्ब ७१ अर्ब २० करोड रुपैयाँ बराबर रहेको छ।

त्यसैगरी, यो अवधिसम्ममा बैंक तथा वित्तीय संस्थाको निक्षेप संकलन ११ प्रतिशत र निजी क्षेत्रमाथिको दाबी १७.५ प्रतिशतले बढेको छ। वार्षिक विन्दुगत आधारमा भने निक्षेपको वृद्धिदर २१.९ प्रतिशत र निजी क्षेत्रमाथिको दाबीको वृद्धिदर १८.९ प्रतिशत छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

५८ जिल्लामा भूमि आयोगका अध्यक्ष नियुक्त

विपिन जोशी सकुशल रहेको परराष्ट्रमन्त्रीको दाबी, फर्केर आउने आश्वासन

प्रयागराजमा महाकुम्भ मेला सुरु, ४० करोड सहभागी हुने अनुमान [तस्बिरहरु]