काठमाडौं- नेपाल वायु सेवा निगमले बोइङ जहाजबाट उडान नगर्ने उद्घोष गरेको २ वर्षपछि मात्रै स्टक तथा काम नलाग्ने पार्टपुर्जा बिक्री गर्ने भएको छ।
निगमका तत्कालीन कार्यकारी अध्यक्ष मदन खरेलले नै बोइङ ७५७ जहाज उडान नगर्ने उद्घोष गरेका थिए। खरेलले २०७६ वैशाखमा बोइङबाट अन्तर्राष्ट्रिय उडान नगर्ने र बाँकी रहेको एउटा ३३ वर्ष पुरानो जहाज बिक्री गर्ने निर्णय गरेका थिए।
बोइङ बिक्री प्रक्रिया अझै सकिएको छैन। कोरोनाका कारण रोकिएको बोइङ बिक्री प्रक्रिया अहिले अन्तिम चरणमा पुगेको छ। तर, बोइङ उडान नगर्ने उद्घोष गरेको निगमका तत्कालीन व्यवस्थापनले पार्टपुर्जा बिक्री गर्ने प्रक्रिया भने थालेको थियो। २ वर्षभन्दा बढी समय लुकाएर राखेको पार्टपुर्जाको विवरण खोज्दै महाप्रबन्ध डिमप्रकाश पौडेलले अहिले पार्टपुर्जा बिक्रीका लागि टेन्डर गरेका हुन्।
निगमले २ अप्रिलमा एउटा इन्जिनसहित विभिन्न पार्ट्स जहाँ जुन अवस्थामा छन् त्यही अवस्थामा बिक्री गर्ने गरी टेन्डर आह्वान गरेको महाप्रबन्ध पौडेलले जानकारी दिए। बिक्रीमा राखिएका इन्जिन र पार्ट्सको मूल्य ३५ करोड रुपैयाँ बराबर रहेको अनुमान गरिएको छ।
बिक्रीलाई टेन्डर भएको एउटा इन्जिन स्पेनमा रहेको छ भने अन्य पार्टपुर्जा विमानस्थलमा रहेको छ। निगमको एउटा बोइङ ४ वर्षअगाडि नै बिबी एयरवजले खरिद गरेको थियो। अर्को बोइङ भने अहिले पोल्यान्डको सिएसबिएस एयरक्राफ्ट सेल्स एन्ड लिजिङ कम्पनीलाई बिक्री गरिने भएको छ। जहाज उक्त कम्पनीले ५७ लाख १० हजार डलरमा खरिद गर्ने भएको छ।
जहाज बिक्रीका लागि द्विपक्षीय सम्झौता गर्ने प्रक्रिया अन्तिम चरणमा पुगको निगमको भनाइ छ। अहिले बिक्री गर्न लागेको बोइङ सन् २०१९ अक्टोबारदेखि उडान बन्द भएको थियो। अक्टोबरमा जहाज मर्मतका लागि मलेसिया पठाइएको थियो।
जहाज मर्मतपछि जनवरीमा काठमाडौं ल्याउँदै गर्दा अवतरणको क्रममा विइङ स्क्रिन बिग्रिएको थियो। त्यसपछि जहाज उडानयोग्य बनाउँदै निगमले उडान बन्द गर्ने उद्घोष गरेकाे थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
