काठमाडौं–नेकपा एमालेको माधवकुमार नेपाल समूहको स्थायी कमिटीको बैठक आज पनि बस्दै छ।
आजको बैठकले भावी रणनीतिबारे निर्णय गर्ने स्थायी कमिटी सदस्य योगेश भट्टराईले बताए। आजको बैठकले एमाले पुनर्गठन गरेर जाने घोषणा गर्न सक्ने बताइएको छ।
शुक्रबारदेखि जारी बैठकमा नेताहरुले आआफ्ना भनाइ राखेका थिए। शुक्रबारको बैठकले बोल्ने नेताहरुले एमाले पार्टी अध्यक्ष केपी शर्मा ओलीका पछिल्ला कदमबारे कडा टिप्पणी गरेका थिए।
प्रधानमन्त्री तथा पार्टी अध्यक्ष ओलीपक्षले वरिष्ठ नेता नेपालसहित उपाध्यक्ष भीम रावल, उपमहासचिव घनश्याम भुसाल र स्थायी कमिटी सदस्य सुरेन्द्र पाण्डेलाई ‘कारबाही’ गरेपछि नेपाल र झलनाथ खनालले नेतृत्व गरेको समूह पनि ‘एक्सन’को तयारीमा जुटेको हो।
नेपाल समूहले देशैभर संगठन विस्तार तथा सुदृढीकरणका लागि अभियान घोषणा गर्ने तयारी गरेको छ। त्यस्तै, यस बनाएको राजनीतिक प्रतिवेदनलाई पनि नेपाल समूहले कार्यकर्तामाझ लैजाने नीति लिएको छ।
शुक्रबारको बैठकमा संगठन विस्तार तथा सुदृढीकरण अभियानलाई अगाडि बढाउने विषयमा छलफल भएको थियो।
शुक्रबारको स्थायी कमिटी बैठकले एमालेको संगठन सुदृढीकरणसहित राष्ट्रव्यापी कार्यक्रमको स्वरुप तयार गर्ने तय गरेको छ। यसबारे ठोस निर्णय शनिबार हुने बताइए पनि पार्टीको प्रशिक्षण भेला वा गोष्ठीबाट एउटा निष्कर्षमा पुग्ने यो पक्षको तयारी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773837959.png)
