फाइल तस्बिर।
काठमाडाैं- नेकपा एमालेको माधवकुमार नेपाल पक्षले शुक्रबार राखेको यो पक्षको स्थायी कमिटी बैठकलाई महत्वसाथ हेरिएको थियो। प्रधानमन्त्री एवं एमाले अध्यक्ष केपी शर्मा ओलीले वरिष्ठ नेता नेपालसहित चारजना नेतालाई साधारण सदस्यबाटै निलम्बन गरेपछि पहिलो पटक बसेको बैठकले यो पक्षको भावी रणनीतिबारे ठोस निर्णय गर्ने अपेक्षा पनि थियो। तर, शुक्रबारको बैठकले ओलीका पछिल्ला कदमबारे कडा टिप्पणी गरेपनि भावी रणनीतिबारे निर्णय गरेन। स्थायी कमिटी सदस्य योगेश भट्टराईका अनुसार शनिबार बैठक पुनः बस्नेछ र एउटा निर्णय गर्नेछ।
यो पक्षका नेताहरुले शनिबार महत्वपूर्ण निर्णय हुनसक्ने बताएका छन्। उनीहरुका भनाइमा अब एमाले पुनर्गठन गरेर जाने तयारी अघि बढाइएको छ। त्यो भनेको अर्को पार्टी गठनसम्म पुग्ने तयारी हो। प्रधानमन्त्री ओलीपक्षले वरिष्ठ नेता नेपालसहित उपाध्यक्ष भीम रावल, उपमहासचिव घनश्याम भुसाल र स्थायी कमिटी सदस्य सुरेन्द्र पाण्डेलाई ‘कारबाही’ गरेपछि नेपाल र झलनाथ खनालले नेतृत्व गरेको समूह पनि ‘एक्सन’को तयारीमा जुटेको हो।
ओलीले नेपालसहित चार नेतालाई सोधिएको स्पष्टीकरणको चित्तबुझ्दो जवाफ नदिएको भन्दै उनीहरुलाई ६ महिनाका लागि पार्टीका सबै जिम्मेवारी र साधारण सदस्यबाट निलम्बन गर्ने निर्णय गरेका थिए। त्यसबाट आक्रोशित बनेको नेपाल पक्षका अब धेरै अलमल नगरी ओलीसँग भिडेर जाने तयारीमा जुटेको एक नेताले बताए।
के यो भनेको अर्को पार्टी गठनको तयारी हो? एमाले पार्टी विभाजन गर्ने भन्दा पनि एमालेमै समानान्तर कमिटी गठन गर्ने वा एमाले पुनर्गठन जस्ता केही शब्द राखेर अघि बढ्ने निर्णय हुन सक्ने ती नेताले बताए। ‘एमालेमा, ओली पक्षसँग एउटै पार्टीमा बस्न सक्ने अवस्था रहेन, त्यही पार्टीमा आफ्नो छुट्टै नामको पहिचान दिएर अघि बढ्ने हुन सक्छ’, ती नेताले नेपाल लाइभसँग भने, ‘तर, एमालेबाट विभाजन गरेर छुट्टै पार्टी घोषणा वा अन्य कुनै पार्टीसँग एकता गरेर जाने स्थिति हुँदैन। एमालेमै बसेर ए –एमाले र बी–एमालेका रुपमा समानन्तर गतिविधि गरेर जाने स्थिति हुनसक्छ।’
शनिबार मात्रै एउटा ठोस निर्णय गरेर जाने रणनीति नेपाल पक्षले तय गरेकाले अहिलेसम्म त्यसबारे कुनै कुरा बाहिर ल्याइएको छैन।
प्रतिवेदन देशभरका कार्यकर्तामाझ पुर्याइने
नेपालपक्षले एमालेमा समानान्तर संगठन र संरचनाको अभ्यास अघि बढाइसकेको छ। जिल्लाहरूमा समानान्तर कमिटी निर्माणले तीब्रता पाएको छ भने जनवर्गीय संगठनहरुमा यसअघि नै त्यो अभ्यास भइसकेको छ। यसअघि नेपाल पक्षले काठमाडौंमा राष्ट्रिय कार्यकर्ता भेलासमेत गरेको थियो।
त्यो भेलामा नेता नेपालले प्रस्तुत गरेको राजनीतिक दस्तावेजमाथि आएका सुझावहरु समेटेर दस्ताबेज नै कार्यकर्तामाझ पुर्याउने तयारीमा समेत नेपाल पक्ष छ। शुक्रबारको बैठकमा नै यसबारे छलफल भएको स्थायी कमिटी सदस्य योगेश भट्टराईले बताए। अर्का एक स्थायी कमिटी सदस्यले दस्तावेज देशभरका कार्यकर्तामाझ पुर्याउने तय भइसकेको जानकारी दिए।
शुक्रबारको स्थायी कमिटी बैठकले एमालेको संगठन सुदृढीकरणसहित राष्ट्रव्यापी कार्यक्रमको स्वरुप तयार गर्ने तय गरेको छ। यसबारे ठोस निर्णय शनिबार हुने बताइए पनि पार्टीको प्रशिक्षण भेला वा गोष्ठीबाट एउटा निष्कर्षमा पुग्ने यो पक्षको तयारी छ।
सर्वोच्च अदालतको गत फागुन २३ गतेको फैसला पुनरावलोकनका लागि माओवादी केन्द्रका अध्यक्ष पुष्पकमल दाहाल ‘प्रचण्ड’ले सर्वोच्च अदालतमा निवेदन दिएका थिए। तर, बिहीबार अदालतले एमाले र माओवादी केन्द्र ब्युँताउँने त्यो फैसलाको पुनरावलोकन नहुने निर्णय सुनाएपछि माओवादी केन्द्रसँग नेपाल पक्ष नजिकिने सम्भावना तत्काल देखिएको छैन। त्यहीकारण पनि नेपाल पक्ष घोषित रूपमै एमालेभित्र समानान्तर अभ्यासमा लाग्न थालेको बताउँछन्। त्यसको स्वरुप भने सम्भवतः शनिबार प्रष्ट हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
