माओवादी केन्द्रका अध्यक्ष प्रचण्ड भन्छन्- मूल्य मान्यताले काम गरेन, सेटिङले काम गर्‍यो

राजनीति

नेपाल लाइभ शुक्रबार, चैत २०, २०७७ १८:०२

फाइल तस्बिर

काठमाडाैं- नेपाल कम्युनिस्ट पार्टी (माओवादी केन्द्र) का अध्यक्ष पुष्पकमल दाहाल 'प्रचण्ड'ले नेपाली समाज फासीवादी निरंकुशतातिर जाने खतरा रहेको बताएका छन्।

शुक्रबार वामपन्थी नेता स्व. माणिकलाल श्रेष्ठको श्रद्धाञ्‍जलिसभामा बोल्दै अध्यक्ष प्रचण्डले प्राप्त गरिएका राजनीतिक परिवर्तनहरुलाई उल्ट्याउँदै नेपाली समाजलाई फासिँवादी निरंकुशतातर्फ लैजाने खतरा बढेको बताएका हुन्। देशभित्र र बाहिरका शक्तिहरु संवैधानिक निकायहरु समेतको संलग्‍नतामा सेटिङमा लागेको उनको आरोप छ।

‘समाज चरम फासीवादी निरंकुशतातिर जाने खतरा छ। हामी त्यसका विरुद्ध खबरदारी गरिरहेका छौँ। अहिले तपाईं हामीले सुन्‍ने गरेको शब्द एउटा छ। अलि बढी नै सुन्‍ने गरेका छौँ, सेटिङ,' उनले भने, 'देशभित्रका, बाहिरका विभिन्‍न संवैधानिक निकायका प्रमुखहरुका बीचमा सेटिङ हुने। नियमले काम नगर्ने, संविधानले काम नगर्ने, मूल्यले काम नगर्ने, मान्यताले काम नगर्ने, ऐनले काम नगर्ने, सेटिङले काम गर्ने।'

अध्यक्ष दाहालले थपे, 'त्यो सेटिङ सबै नेपाल राष्ट्र र नेपाली जनताको अधिकारका विरुद्ध, पहिचानका विरुद्ध परिलक्षित हुने यो बिडम्बनाको हामीले सामना गर्नुपर्ने बडो विचित्रको स्थितिमा हामी अहिले छौं।’

उनले वामपन्थी आन्दोलनले हासिल गरेका उपलब्धिहरुमाथि प्रहार हुन थालेको बताए। वर्तमान सरकार अपारदर्शी, अराजक र भ्रष्ट हुँदै गएकोले कम्युनिस्टप्रति जनताको भरोसा टुट्ने खतरा पैदा भएको उनले बताए। ‘कम्युनिस्ट आन्दोलन र वामपन्थी आन्दोलनले हासिल गरेका उपलब्धिमाथि प्रहार हुन थालेको बेला छ यो। जातीय, भाषिक, वर्गीय, उन्मुक्तितिर अगाडि बढेको, लामो संघर्षबाट प्राप्त उपलब्धिमाथि प्रहार हुन लागेको अवस्था छ। राज्य सबैभन्दा बढी सुशासन र पारदर्शिताको प्रतीक हुनुपर्ने हो। सबभन्दा अपारदर्शी, अराजक र भ्रष्ट हुँदै गएको बेला छ यो,' उनले भने, 'कम्युनिस्टहरुको एकता र उनीहरुप्रति जनताको जो भरोसा थियो, त्यो टुट्ने खतरा पैदा भएको बेला छ। कम्युनिस्ट आन्दोलनभित्रैबाट सबैभन्दा वैचारिक ढङ्‍गले विचलन, विसङ्‍गति र विकृति माथिल्लो तहमा नै देखिनु, उनीहरुको नेतृत्वमा रहेको सरकार सबभन्दा अपारदर्शी र भ्रष्ट भएका खबरहरु यत्रतत्र देखिनु आफैंमा ठूलो विडम्बना भएको छ।’

अध्यक्ष प्रचण्डले सडक विस्तारका नाममा सडकनजिकै भएका घरहरु भत्काएर जनतालाई सुकुम्बासी बनाउने अधिकार सरकारसँग नभएको बताए। नेपालका नेवार समुदायलाई राज्यले जे गरे पनि हुन्छ भन्‍ने ठानेर ऐतिहासिक, सांस्कृतिक वैभव र संरचनाहरुलाई विकासको नाममा मिचिदिने प्रवृत्ति बढेको उनको आरोप थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

बेरुतमा भएको इजरायली हमलामा ११ जनाको मृत्यु

धनकुटा र उदयपुरमा प्रहरीद्वारा ६४ हजार गाँजाका बोट फडानी

प्यालेस्टाइनमाथिको आक्रमण रोक्न माग गर्दै काठमाडौंमा प्रदर्शन