काठमाडाैं- बर्मेली सुरक्षा फौजले म्यानमार रेडक्रस साेसाइटी (एमआरसीएस)का स्वयंसेवकमाथि आक्रमण गरेको भन्दै इन्टरनेसनल फेडेरेसन अफ रेडक्रस एन्ड रेड क्रिसेन्ट सोसाइटीज (आईएफआरसी) आपत्ति जनाएको छ।
आईएफआरसीका एसिया प्रशान्त क्षेत्रका निर्देशक अलेक्जेन्डर म्याथ्युले एक वक्तव्य निकाल्दै प्रदर्शनका क्रममा हताहत भएका प्रदशर्नकारीको उपचार र उद्धारमा खटिएका स्वयंसेवकलाई सुरक्षा फौजले हतोत्साही गराउन खोजेको आरोप लगाएका हुन्।
‘रेडक्रसका प्राथमिक उपचारकर्ता र चिकित्सकलाई धम्क्याइएको छ। केही सहकर्मीलाई सुरक्षा बलले घाइतेसमेत बनाएको छ,’ वक्तव्यमा भनिएको छ,‘रेडक्रसका एम्बुलेन्स र अन्य सम्पत्तिमासमेत आक्रमण गरेर क्षति पुर्याइएको छ।’
यद्यपि, आक्रमण कसले गरेको हो भन्ने वक्तव्यमा खुलाइएको छैन। केहीदिन अगाडि सामाजिक सञ्जालमा भाइरल भएको भिडियोमा सुरक्षाकर्मीले उपचारकर्मीहरुमाथि हातपात गरेको र एउटा एम्बुलेन्समा गोली हानेको देखिएको थियो।
म्यानमारको सेनाले गत फ्रेबुअरी १ मा सत्ता हत्याएपछि प्रजातन्त्र पक्षधरहरुले प्रदशर्न गरिरहेका छन्। जारी प्रदर्शनमा हालसम्म ५२० भन्दा बढीको मृत्यु भएको छ भने हजारौंको संख्यामा प्रदर्शनकारीहरु घाइते भएका छन्।
आईएफआरसीका अनुसार सुरक्षा फाैजले अस्पतालसहित यातायात र बैंकिङ जस्ता आधारभूत सेवालाई प्रभावित पारेका छन्। त्यसैले प्रदर्शनमा घाइते भएका नागरिकहरु उपचारसेवाबाट समेत बञ्चित भइरहेको जनाइएको छ।
‘आधारभूत सेवालाई सुरक्षा फाैजले प्रभावित पार्दा व्यापक स्वास्थ्य जोखिम उत्पन्न भएको छ र यसले मानवीय कार्यक्रमहरूलाई निरन्तरता दिन कठिन बनाउन सक्छ,’ आईएफआरसीले भनेकाे छ।
यता रेडक्रस सोसाइटीले हालसम्म दुई हजारभन्दा बढी घाइतेको उपचार गरिसकेको जानकारी दिएको छ।
म्यानमारमा पछिल्लाे समय काेराेना भाइरस संक्रमितकाे संख्या पनि बढ्दाे क्रममा रहेकाे छ। यसले थप जाेखिम उत्पन्न गरेकाे म्याथ्युले जानकारी दिएका छन्।
‘हामीले म्यानमारमा एक आँधीको सामना गर्न सक्छौं। यहाँ काेराेना संक्रमणको दाेस्राे लहर फैलिरहेको छ। यसले गहन मानवीय संकट निम्त्याएकाे छ,’ उनले भनेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
