काठमाडौं–अजोड इन्स्योरेन्स लिमिटेडले ५० प्रतिशत हकप्रद सेयर (२ बराबर १) जारी गर्नका लागि संचालक समितिमा प्रस्ताव लैजाने सूचना चुहाएर सेयर बजारमा चलखेल गरेको आंशका गरिएको छ।
कम्पनीको सोमबार बसेकोे संचालक समितिको ८७औं बैठकले ‘हाल कायम रहेको चुक्ता पूँजीको ५० प्रतिशत अर्थात् २ कित्ता सेयर बराबर १ कित्ताको दरले हकप्रद जारी गर्ने’ प्रस्ताव साधारण सभामा लैजाने निर्णय गरेको थियो। संचालक समितिले यस्तो निर्णय गरेको दिन नै कम्पनीको सेयर कारोबारमा पनि वृद्धि देखिएपछि इन्साइडर ट्रेडिङको आंशका गरिएको हो।
सोमबार अजोड इन्स्योरेन्सको सीमित ब्रोकर कम्पनीबाट सीमिति व्यक्तिले मात्रै धमाधम सेयर खरिद गरिरहेको र अरु दिनको औसत भन्दा बढी कारोबार भएको देखिएको छ। यद्यपि, संचालक समितिले हकप्रद जारी गर्ने निर्णय सोमबार अपराह्न अर्थात सेयर बजार बन्द भएपछि गरेको दावी गरे पनि कम्पनीको सेयर कारोबार अस्वाभाविक देखिँदा इन्साइडर ट्रेडिङको आशंका गरिएको हो।
सोमबार नेपाल स्टक एक्सचेन्ज (नेप्से)मा अडोजको सेयर मूल्यमा पोजेटिभ सर्किट लागेर बन्द भएको थियो भने लगानीकर्ताले प्रतिकित्ता ९.९२ प्रतिशतका दरले कमाएका थिए। त्यस्तै मंगलबारको कारोबारमा पनि कम्पनीको सेयर मूल्यमा पोजेटिभ सर्किट लागेको छ।
‘नेप्सेको कारोबार समयमा सञ्चालक समितिको बैठक बसेको भन्ने प्रारम्भिक जानकारी आएको छ,’ धितोपत्र बोर्डका सहप्रवक्ता रूपेश केसीले भने, ‘यस विषयबारे हामी थप बुझ्दै छौं।’
नेप्सेका प्रवक्ता मुराहरी पराजुलीले इन्साइडर ट्रेडिङ भएको भन्ने विषय जानकारीमा आएको र यसबारेमा आवश्यक अध्ययन गर्ने जनाएका छन्। ‘यो विषय हाम्रो नोटिसमा आएको छ। हामी अध्ययन गर्छौं,’ पराजुलीले भने। इन्साडर ट्रेडिङको विषय हेर्न नेप्सेमामा छुट्टै शुद्धीकरण शाखा रहे पनि नेप्सेले सामान्य स्पष्टीकरण सोध्ने बाहेक अरु विस्तृत अनुसन्धानका लागि अधिकार पाएको छैन।
कम्पनीको गोप्य सूचना चुहाएर सेयर बजारमा चलखेल गर्ने विषय बारम्बार उठ्दै आए पनि यससँग सम्बन्धित स्पष्ट कानूनी व्यवस्था भने अझै कार्यान्वयनमा आइसकेको छैन। विनियमावली इन्साडर ट्रेडिङको नियमावली पारित भएर कार्यान्वयनमा आउन सकेको छैन।
इन्साइडर ट्रेडिङसँग सम्बन्धित विषयमा अध्ययन गर्न नेप्सेको खासै भूमिका देखिँदैन। धितोपत्र बोर्ड अर्धन्यायिक निकाय भए पनि बोर्डले पनि अनुसन्धान गर्न पर्याप्त कानूनी आधार नपाउने गरेको विषय विगतदेखि नै उठ्दै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
