फाइल तस्बिर
काठमाडौं– सन् २०२१ को वसन्त ऋतुमा हिमाल आरोहणका लागि ३५ जनाले अनुमति (परमिट) लिएका छन्। पर्यटन विभागमा अनुसार तीन वटा हिमाल आरोहणका लागि अहिलेसम्म चार टोलीका ३५ सदस्यले अनुमति लिएका हुन्।
अहिलेसम्म सगरमाथा आरोहणका लागि भने अनुमति जारी भइसकेको छैन। सगरमाथा आरोहणका लागि बराइनी राजकुमार सहतिको १६ सदस्य नेपाल आइसेका छन्। तर, उनीहरुले अनुमति भने लिइसकेका छैनन्।
विभागमा अनुसार अन्नपूर्ण हिमाल अरोहणका लागि २ दलका ३० जनाले अनुमति लिइसकेका छन्। त्यसमा १३ जना महिला र १७ जना पुरुष छन्। यसैगरी मनास्लु हिमाल आरोहणका लागि १ जना र ४ जनाले नुप्त्से हिमाल आरोहणकमा लागि अनुमति लिएका छन्।
यसबाट विभागले ६७ लाख ४० हजार ५ सय ८३ रुपैयाँ रोयल्टी संकलन गरेको छ। हिमाल आरोहणको अनुमति जारी सँगै पर्यटन विभागले आरोहणलाई व्यवस्थित र सुरक्षित बनाउन भन्दै ११ वटा शर्त समेत जारी गरिसकेको छ। विभागले एजेन्सीका तर्फबाट पर्वतारोहण सम्बन्धी कार्य गर्नका लागि आधिकारिक व्यक्ति तोकेर पठाउनु पर्ने शर्त समेत अगाडि सारेको छ।
यसबाहेक विभागले पर्वतारोही दलले पर्वतारोहण बाहेक अन्य थप गतिविधि गर्ने भएमा पर्यटन विभागमा अनिर्वाय जानकारी गराई स्वीकृत लिएर मात्र थप गतिविधि गर्न भनेको छ। कुनै पनि पर्वतारोही दल तथा दलका सदस्यले फोटो, भिडियो तथा फिल्मिङ सम्बन्धी काम गर्दा आफू सम्बद्ध दल र दलका सदस्यको आरोहण गतिविधि बाहेक अन्यको फोटो, भिडियो खिच्ने तथा फिल्मिङ सम्बन्धी काम गरी त्यसको प्रचार प्रसार तथा प्रकाशन गर्न नपाइने गरी शर्तहरु जारी गरेको छ।
यसैगरी, विभागले पर्वतीय पथ प्रदर्शकलाई परिचय पत्र उपलब्ध गराउने गरी सूचना पनि जारी गरेको थियो। सोही अनुसार पहिलो माउन्टेन गाइटको परिपत्र पनि वितरण भइसेको छ। पहिलो कार्ड भने कामिरिता शेर्पाले लिएका छन्।
हिमाल आरोहणलाई मर्यादित र सुरक्षित बनाउन विभागले आफ्नो क्षेत्रअधिकारभित्र बसेर काम थालेको विभागकी निर्देशक मिरा आचार्य बताउँछिन। ‘विभागले पर्यटन ऐन २०३५ र पर्वतारोहणसम्बन्धी नियमावली २०५९ अन्तर्गत बसेर आरोहणको कार्यलाई व्यवस्थित गर्न लागिपरिरहेका छौं,’ उनले भनिन, ‘आरोहणलाई व्यवस्थित गर्नका लागि फिल्डमा गर्नुपर्ने काम सुरु गरिसकेका छौं। उद्धार टिमहरु आफ्नो कामका लागि जाँदै हुनुहुन्छ। आरोहणको लागि बाटो बनाउने काम पनि सुरु भएको छ। त्यसमा खटिएका व्यक्तिहरु अहिले बाटोमा छन्। काम गर्ने तयारी गरिरहनु भएको छ। सामान जुटाइरहनु भएको छ।’
यो वर्षको स्वास्थ्य अवस्थालाई ख्याल गरेर नेपाल सरकार अन्तर्गत नै कार्यरत रहेका डाक्टर आवश्यक ठाउँमा खटाउने प्रक्रिया सुरु भएको विभागले जनाएको छ। प्रक्रिया पूरा भएपछि खटिएको ठाउँमा गएर डाक्टरहरुले काम गर्ने आचार्य बताउँछिन्। ‘यो चाहिँ विल्कुल नै नयाँ काम भएको छ,’ उनले भनिन्,‘ यसअघि बाहिरबाट भोलेन्टियर गर्न डाक्टर आउने गर्थे। अहिले चाहिँ नेपाल सरकार अन्तर्गतकै डाक्टर जाने छन्।’
यसबाहेक निरन्तर सूचनाहरु लिने र विशलेषण गर्ने कामहरु गरिरहेको उनले बताइन्। साथै अहिले फरक क्षेत्र र अवस्थामा व्यक्तिहरुले पनि हिमाल आरोहणमा चासो देखाइरहेको आचार्यले जानकारी दिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
