प्रशान्त ताम्राकार। तस्वीर: निमेषजंग राई/नेपाललाइभ
फेसन कोरियोग्राफर, मोडल तथा कलाकार। नेपाली कलाक्षेत्रमा यी तीनवटै परिचयमा स्थापित छन् प्रशान्त ताम्राकार। उनी नेपाली फेसन क्षेत्रका सुरुआती मोडल हुन्। फेसन मोडलिङका लागि राष्ट्रिय तथा अन्तर्राष्ट्रिय बजार भ्रमणकै क्रममा उनले कोरियोग्राफी सिके। त्यसले उनलाई फेसन क्षेत्रमा उल्लेख्य सफलता दिलायो। त्यसैले त निरन्तर छ उनको यात्रा। यो क्षेत्रमा तीन दशक बिताइसके।
फेसनसँगै चलचित्र क्षेत्रमा पनि जोडिन अइपुगे प्रशान्त। हलिउड फिल्म 'टाटा बाइबाइ'बाट डेब्यू गरेका उनी 'ऐश्वर्या' फिल्मको राघवबाट 'कूख्यात' खलनायकको रुपमा प्रस्तुत भए। उनको त्यो रुपलाई दर्शकले खुब मन पराए। कोरोना भाइरसको महामारी नियन्त्रणका लागि लागू गरिएको लकडाउन सकिएलगत्तै उनले भोजपुरी फिल्मको छायाङ्कन सकाएका छन्।
उनै कलाकार, फेसन कोरियोग्राफर तथा मोडल प्रशान्त ताम्राकारसँग नेपाललाइभका लागि पुष्पा थपलियाले गरेको कुराकानीको सारसंक्षेप:
कोभिड-१९ ले गर्दा झन्डै एक वर्ष ठप्प बनाएपछि कला क्षेत्रमा चहलपहल सुरु भएको छ। पुरानो लयमा फर्किनसकेको भएपनि सबैको व्यस्तता बढ्दै गएको देखिन्छ।तपाईंचाहिँ यतिबेला केमा व्यस्त हुनुहुन्छ?
हो, कोभिडले लामो समय सबै ठप्प बनायो। अहिले विस्तारै सबैको दौडधुप सुरु भएको छ। लकडाउनले जागिर गुमाएकाहरू कामको खोजीमा छन्। त्यही क्रममा म पनि मेरै फिल्डको नयाँ र रोकिएका काममा व्यस्त छु। नेपाली चलचित्र क्षेत्रलाई कसरी चलायमान बनाउने भन्ने छलफल र प्रयासमा लागेको छु। व्यावसायिक रूपमा ठप्प भएको यस क्षेत्रलाई कसरी अगाडि बढाउने भन्ने नै मुख्य ध्येय हो यतिबेला।
चलचित्र क्षेत्रलाई चलायमान बनाउने ध्येय छ भन्नुभयो, अहिलेसम्म के-कस्तो निचोड निस्कियो त?
अहिलेको अवस्थामा चलचित्र क्षेत्रका मानिसहरुलाई कसरी जीविकोपार्जन गर्न सक्ने बनाउने भन्ने नै हो। किनभने चलचित्र क्षेत्र पूर्णरूपमा ठप्प हुँदा र व्यवसाय बन्द हुँदा हजारौँको रोजीरोटी बन्द भएको छ। कुनै पनि नयाँ सिनेमा हलमा लगाउने र चुनौती मोल्ने काम ठूला ब्यानरले गरेका छैनन्। प्रदर्शन मिति तोकिने काम भने जारी छ।
एउटा कलाकारले चलचित्र क्षेत्र चलायमान बनाउन कस्तो योगदान गर्न सक्ला?
हामी कलाकारको एउटै ध्येय हुन्छ, निर्माताको लगानी कहिल्यै नडुबोस्। उनीहरूले लगानी उठाउन सकेमात्रै अरु फिल्म बन्ने हो। र, हामी सबैले काम पाउने हो। अहिले कोभिडले थला परेको बेलामा पनि चलचित्र क्षेत्र चलायमान बनाउन हामी कलाकारले गर्ने भनेको फिल्ममा राम्रो अभिनय नै हो। त्योबाहेक पनि केही आवश्यक परे हामी हरेक कोणबाट यस क्षेत्र चलायमान बनाउन हरदम सहयोग गरिरहनेछौं।
जस्तोसुकै महामारी आए पनि सबैभन्दा अगाडि र लामो समयसम्म चलचित्र क्षेत्रमा प्रभाव पर्ने देखियो। यस्तो छिट्टै प्रभावित हुने यो क्षेत्रमा नयाँ कलाकार आउलान् त?
गाह्रो केमा हुँदैन? सबै काम गर्न गाह्रो हुन्छ। त्यसैले हरेक क्षेत्रमा चुनौती मोल्न जरुरी छ। अरु त छाडाैं न, खाना खानसमेत कति गाह्रो छ? पहिले पकाउनुपर्यो, पस्कनुपर्यो र हातले टिपेर खानुपर्यो। खाइसकेपछि पनि तातो, पिरो नुनिलोले पार्ने असर झेल्नुपर्ने नै भयो। यसो भन्दैमा हामीले खान छाडेका छौं र? छैनौं नि! जुनसुकै काम गर्न गाह्रो छ।
जीवन साँच्चै रोचक छ। भोलि के हुन्छ केही थाहा हुँदैन। जिन्दगीमा पनि फिल्ममा जस्तै कतिखेर ट्विस्ट आउँछ थाहा नभएरै यो रोचक भएको हो।
अनि अर्को कुरा, जहाँ पनि राम्रो र नराम्रो अवस्था आउँछ नै। दुवैलाई सम्हालेर अगाडि बढ्नुपर्छ। नयाँ पुस्ताका कुरा गर्दा, आफूमा ट्यालेन्ट (प्रतिभा) छ, रुचि छ भने जतिसुकै भविष्य असुरक्षित भए पनि असम्भव केही छैन। जीवन साँच्चै रोचक छ। आज के भइरहेको छ र भोलि के हुन्छ केही थाहा हुँदैन। जिन्दगीमा पनि फिल्ममा जस्तै कतिखेर ट्विस्ट आउँछ थाहा नभएरै यो रोचक भएको हो। यत्ति कुरा बुझे नयाँ पुस्तालाई सधैँ यो क्षेत्रमा स्वागत छ।
नयाँ पुस्तालाई त स्वागत छ, तर हलमा दर्शकलाई स्वागत गर्ने अवस्था कत्तिको छ?
अहिलेको अवस्थामा सबैभन्दा सुरक्षित गन्तव्य भनेकै हल हो। हलमा छिर्नुअघि प्रयोग गरिएका सुरक्षाकवचहरू मात्रै हैन, कोभिड नसरोस् भन्नका लागि हरेक सोपछि स्यानिटाइज गरिन्छ। त्यसैले दर्शकले हलमा आएर फिल्म हेर्न डराउनुपर्दैन।
हलदेखि नडराए पनि नेपाली फिल्मदेखि डराइरहेका छन् नि?
त्यो त दर्शकको दिमागमा भरपर्ने कुरा हो। कुनै व्यक्तिलाई मन परेको फिल्म अर्कोलाई मन नपर्न सक्छ। त्यही भएर फिल्म हेर्न जानुअघि आफूलाई मनपर्ने विधामा बनेको हो कि हैन, कुन कलाकारको अभिनय छ जस्ता हल्का जानकारी लिएर दर्शक हलमा जाने हो। हल सुरक्षित छ, दर्शकको भावना, रुचिको सुरक्षा स्वयं दर्शकले नै गर्ने हो।
फेसनको 'राजा', फेसनको 'गडफादर'जस्ता उपनाम पनि दिन्छन् तपाईंलाई। त्यो समयमा नेपाली समाजका लागि विल्कुलै नयाँ काम गर्दा घरपरिवार र समाजको प्रतिक्रिया कस्तो थियो?
कसले के भन्छ भनेर म कहिल्यै सोच्दिनँ। त्यसैमाथि मलाई त घरपरिवार समाज सबैले सम्मान नै गरे। तिमीले राम्रो काम गरिरहेका छौं, अझै राम्रो गर्दै जाऊ भनेर प्रोत्साहन गरेकै कारण मैले तीन दशक यो क्षेत्रमा बिताउन सकेँ। मेरो नजिकका मानिसहरु मलाई देखेर गर्व गर्थे। धेरै माया र सहयोग पाएँ। बजार थिएन, भविष्य थिएन तर पनि सहयोग र हौसला सधैँ मिलिरह्यो।
म कहिल्यै नकारात्मक सोच नराख्ने मानिस परें। यो भएन, यो भयो भनेर सोच्ने काम गर्दिनँ।
त्यो समयमा सोचाइ अलि साँघुरो थियो। त्यसलाई सधैँ सम्मान गर्नुपर्छ। म अहिले पनि नेपाली परम्परालाई सम्मान गर्छु। हाम्रो नेपाली पहिचानलाई अन्तर्राष्ट्रिय बजारमा पुर्याउन मद्दत गर्ने कामलाई विस्तारै नेपाली समाजले पनि बुझिहाल्छ। पहिलेको तुलनामा बुझ्दै आएको पनि छ। हामीले पनि अझै धेरै काम गर्न बाँकी छ।
फेसन क्षेत्रलाई मात्रै निरन्तरता दिएर फिल्ममा नआएको भए बर्बाद हुने रहेछ भन्ने लाग्दैन?
म कहिल्यै नकारात्मक सोच नराख्ने मानिस परें। यो भएन, यो भयो भनेर सोच्ने काम गर्दिनँ। फिल्म क्षेत्रमा नआएको भए अर्को ठाउँमा पुगेर नाम कमाउथेँ होला जस्तो लाग्छ। तीन वर्ष त भयो दर्शकको माया पाउन थालेको। अब भने यही फिल्डमा केही गर्ने सोचमा छु। छिट्टै प्रोडक्सन सुरु गर्ने सोच पनि छ।
तपाईंले त डेब्यू नै हलिउडबाट गर्नुभयो है?
अँ, त्यो समयमा हलिउडका ठूला-ठूला क्यामरा बोकेर ठूलै टोली नेपाल आएको थियो। उनीहरूले अडिसनका लागि बोलाएको थाहा पाएर गएको थिएँ, सहायक पात्रका लागि छनोट भइयो। १५ दिनजति उनीहरूको टिममा बसेर काम गर्न पाइयो। त्यहाँबाट धेरै कुरा सिकियो। अचम्म त के भने, हामीले सुटिङ गर्दा नै 'ड्रेसअप' गरिसकेपछि एकले अर्कोलाई चिन्दैनथ्यौं। फिल्म प्रदर्शनमा आए पनि अरुले त झनै के चिन्नु! नजिक बसेको साथीलाई त्यो म हो भनेर चिनाउनुपरेको थियो।
यतिबेला फेरि देशमा राजनीतिक सरगर्मी बढेको छ। तपाईंलाई यसले कत्तिको प्रभाव पार्छ? कलाकारिता क्षेत्रका मानिसले राजनीति बुझ्न कति जरुरी छ?
मेरो विचारमा राजनीति बुझिरहन जरुरी छ जस्तो लाग्दैन। एउटा कलाकारले उसको कला क्षेत्र बुझे पुग्छ। राजनीति बुझ्ने काम त, देश चलाउन हिँडेकाहरूको हो, हाम्रो होइन। यो मेरो व्यक्तिगत विचार हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791799330.png)
-1786602170.png)
