दमक– भुटानी शरणार्थीका लागि तेस्रो मुलुक पुनर्वास कार्यक्रममा संलग्न निकाय अन्तर्राष्ट्रिय आप्रवास संगठन (आइओएम)ले झापाको दमक–१ स्थित हिमालय माध्यमिक विद्यालयलाई एक थान बस उपलब्ध गराएको छ।
देशकै उत्कृष्ट शैक्षिक संस्थाका रुपमा मानिने सो सामुदायिक विद्यालयमा अध्ययनका लागि टाढा–टाढाबाट आउने विद्यार्थीलाई लक्षित गरेर विद्यार्थीको सुविधाका लागि एउटा बस निःशुल्क उपलब्ध गराइएको हो। शरणार्थी पुनर्वास कार्यक्रम रोकिएपछि त्यहाँ सञ्चालित भएको एक थान गाडी शरणार्थी प्रभावित विद्यालयलाई उपहारस्वरुप दिइएको विद्यालयले जनाएको छ। विद्यालयमा यसअघि एउटा बसमार्फत विद्यार्थी ओसारिँदै आएको छ।
विद्यालयमा बिहीबार एक कार्यक्रम गरी आइओएमका अधिकारीले विद्यालयलाई बससहित गाडीको साँचो हस्तान्तरण गरेको विद्यालयका प्रधानाध्यापक विष्णुकान्त झाले बताए। उनले दातृ संस्थाले विद्यालयको शैक्षिक सुधारमा सघाउन गाडी उपहार दिएको बताए। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
