काठमाडौं- आन्तरिक हवाई उडान सेवा प्रदान गर्ने एयरलाइन्स कम्पनी (हेलिकोप्टर सहित)को संख्या १८ पुगेको छ। यीमध्ये बुद्ध, यती, श्री, सौर्य, तारा, सिता, समिट र नेपाल एयरलाइन्सले फिक्स विङ सेवा दिँदै आएका छन् भने अन्य कम्पनीले हेलिकोप्टर सेवा दिँदै आएका छन्।
कोरोना भाइरसको संक्रमण न्यूनीकरण गर्नका लागि गरिएको लकडाउन र निषेधाज्ञाका कारण ७ महिना ठप्प भएको आन्तरिक उडानले पछिल्लो समय लय पक्रेको हो।
त्रिभुवन अन्तर्राष्ट्रिय विमानस्थल कार्यालयका अनुसार जनवरी र फेब्रुअरी महिनामा मात्रै आन्तरिक तर्फ ११ हजार ४ सय ९६ वटा उडान/अवतरण भएका छन्। यो सामान्य अवस्थामा भन्दा केही कम हो।
जनवरी महिनामा मात्रै ५ हजार २८० उडान/अवतरणमार्फत् २ लाख २९ हजार ३ सय ८२ जना यात्रुले आन्तरिक हवाई सेवा लिएका छन्।
यसैगरी, फेब्रुअरी महिनामा ६ हजार २ सय १६ उडान/अवतरण भए। फेब्रुअरीमा २ लाख ८६ हजार ४ सय ४८ जना यात्रुले आन्तरिक हवाई यात्रा गरेका छन्।
आन्तरिक उडानमा बुद्ध एयरको बजार हिस्सा सबैभन्दा बढी छ। जनवरीमा मात्रै बुद्ध एयरले कुल १ लाख २६ हजार ३ सय जनालाई आन्तरिक हवाई सेवा प्रदान गरेको छ। यो संख्या कुल हवाई यात्रुको संख्याको आधारमा ५४.९३ प्रतिशत हो।
जनवरीको दोस्रो बढी यात्रु बोक्न एयरलाइन्स यति हो। यतिले ५१ हजार ८ सय ५५ जनलाई आन्तरिक हवाई सेवा दिएको थियो । यो संख्या जनवरीको कुल हवाई यात्रुको संख्यामा २२.६० प्रतिशत हो। यसैगरी, जनवरीमा श्रीले ४० हजार ५ सय ६६ यात्रुलाई सेवा दिएको छ।
श्री एयरलाइन्सको बजार हिस्सा १७.६८ प्रतिशत हो। यसैगरी सौर्यले पनि जनवरीमा ५ हजार ७३१ जनालाई आन्तरिक हवाई सेवा दिएको छ। उसको बजार हिस्सा यात्रुको आधारमा २.४९ प्रतिशत हो।
यसैगरी, फेब्रुअरी महिनामा भने बुद्धले जनवरीको तुलनामा बजार हिस्सा केही विस्तार गरेको छ। जनवरीमा ५४.९३ प्रतिशत बजार हिस्सा ओगेटको बुद्धले फेब्रुअरीमा ५६.१२ प्रतिशत पुर्याएको छ।
बुद्धले फेब्रुअरीमा १ लाख ६० हजार ७ सय ६८ यात्रुलाई सेवा दिएको थियो। यो संख्या कुल संख्याको ५६.१२ प्रतिशत हो। फेब्रुअरीमा आन्तरिक तर्फ २ लाख ८६ हजार ४ सय ४८ जनाले आन्तरिक हवाई यात्रा गरेको थियो।
फेब्रुअरीमा यती र श्रीको बजार हिस्सा भने जनवरीको तुलनामा घटेको छ। यतिले फेब्रुअरीमा कुल ६१ हजार १५ जनलाई हवाई सेवा दिँदै बजार हिस्सा २१.३० कायम गरेको छ। जनवरीमा यतिको बजार हिस्सा २२.६० प्रतिशत थियो।
यसैगरी जनवरीको तुलनामा श्रीको पनि फेब्रुअरीमा बजार हिस्सा घटको छ। जनवरीमा श्रीको बजार हिस्सा यात्रु संख्याको आधारमा १७.६८ प्रतिशत थियो तर, फेब्रुअरीमा यो घटेर १६ दशमलव ४३ प्रतिशत मात्रै कायम रहेको छ। फेब्रुअरीमा श्रीले ४७ हजार ७४ यात्रुलाई सेवा दिएको छ।
साथै सौर्य एयरलाइन्सको बजार हिस्सा भने जनवरीको तुलनामा केही बढेको छ। जनवरीमा २.४९ प्रतिशत बजार हिस्सा रहेको सौर्यले फेब्रुअरीमा बढाएर ३.३४ प्रतिशत पुर्याएको छ। सौर्यले फेब्रुअरीमा कुल ९ हजार ५ सय ७५ जनालाई हवाई सेवा दिएको छ।
जनवरी-फेब्रुअरीमा हवाइ यात्रुको संख्या (आन्तरिकतर्फ मात्र)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
