काठमाडौं- राष्ट्रिय ध्वजावाहक नेपाल वायुसेवा निगमले सन् २०२४ सम्ममा ३६ गन्तव्यमा उडान गर्ने महत्वांक्षी योजना अघि सारेको छ। निमगले ८ जहाज पुर्याएर आन्तरिक तर्फ ३६ गन्तव्यमा उडान गर्ने लक्ष्य अगाडि सारेको हो।
निगम महाप्रबन्धक डिमप्रकाश पौडेलले केही समय अगाडि ल्याएको १० वर्षे निगमको व्यावसायिक योजनामा उक्त विषय समावेश छ। निगमले ट्रंक तथा स्टल रुटमा गरी ३६ गन्तव्यमा उडान गर्ने लक्ष्य लिएको हो।
निगमको व्यावसायिक योजना सञ्चालक बोर्डबाट भने अनुमोदन भइसकेको छ। अनुमोदन भएको व्यवसायिक योजना अहिले संस्कृति, पर्यटन तथा नागरिक उड्डयन मन्त्रालय हुँदै अर्थ मन्त्रालयमा पुगको छ। निगमको १० वर्षे योजनामा अर्थले कुनै निर्णय नगरेपनि आगामी वर्षको बजेटमार्फत् पुँजी विस्तारका लागि स्वीकृति दिने आश्वासन दिइसकेको छ।
निगमको चुक्ता पुँजी ३१ करोड रुपैयाँ छ। यसलाई बढाएर ५० अर्ब रुपैयाँ पुर्याउनु पर्ने भन्दै निगमले व्यवसायिक योजना अगाडि सारेको थियो। निगमले महत्वाकांक्षी योजना ल्याएपनि उसको व्यावसायिक योजना भने सरकारबाट स्वीकृति भइसकेको छैन। अर्थ मन्त्रालयबाट स्वीकृत नभएपछि निगमको योजनाअनुसार काम अघि बढेको छैन। निगम स्रोतले बजेटसँगै पुँजी विस्तारको विषय सम्बोधन हुनेमा विश्वास व्यक्त गरेको छ।
निगमको सुरुवाती पुँजी अति नै न्यून रहेको कारण व्यवसायिक योजना अगाडि बढाउने असहज भएको महाप्रबन्धक डिमप्रकाश पौडेल बताउँछन्।
निगमको पुँजी विस्तारको विषय नयाँ भने होइन। निगमका पूर्व महाप्रबन्धक सुगतरत्न कंसाकारले २०७३ सालदेखि नै निगमको पुँजी विस्तारको विषय उठाउँदै आएका थिए। तर सरकारले निगमलाई फाइदामा लैजाने आधारसहित व्यवसायिक योजना माग गर्दै आएको थियो।
कंसाकारपछि निगम कार्यकारी अध्यक्ष बनेका मदन खरेलले पनि पुँजी विस्तारका लागि सरकारसँग अनुरोध गरिरहेका थिए। २०७६ सालमा निगमले वार्षिकोत्सव मनाउँदै गर्दा खरेलले सुरुवाती पुँजी अति नै न्यून भएका कारण निगमले आर्थिक संकट भोग्दै आएको बताउँदै पुँजी विस्तार गरिदिने प्रधानमन्त्री केपी शर्मा ओलीसँग आग्रह गरेका थिए। वार्षिकोत्सव कार्यक्रममा नै प्रधानमन्त्री ओलीले तत्काल निगमको पुँजी विस्तार नगर्ने र निगमलाई फाइदामा लैजाने गरी व्यवसायिक योजना आएको अवस्थामा सरकारले रकम दिने बताएका थिए।
निगमका हरेक काम विवादित बन्दै गएपछि २०७६ माघमा खरेलले कार्यकारी अध्यक्षबाट राजीनामा दिएका थिए। त्यसपछि महाप्रबन्धक भएका पौडेलले व्यवसायिक योजना ल्याएको महिनौँ हुँदा पनि सरकारले पुँजी विस्तारको बाटो नखोलिदिएपछि आर्थिक संकटमा परेको निगमले बताउँदै आएको छ। निगमको ऋण मात्रै ४६ अर्बभन्दा बढी पुगिसकेको छ भने एयरबस ए-३२० र वाइडबडी ए-३३० जहाज खरिदमा लिएको ऋणको ब्याज र किस्तासमेत तिर्न सकेको छैन।
निगमसँग अहिले आन्तरिक उडानमा २ वटा ट्विनअटर जहाज मात्र छन्। एउटा जहाज 'कवाडीमा बिक्री गर्नु पर्ने' अवस्थामा छ। केही समयअघिसम्म आन्तरिक उडानमा प्रयोग भइरहेका ६ वटा चिनियाँ जहाज निगमले सदाका लागि ग्राउन्डेड गरिसकेको छ। निगमले व्यावसायिक योजना ल्याउँदै ट्रंक रुटमा उडान गर्ने २ वटा ठूला जहाज र स्टलमा उडान गर्ने ४ वटा जहाज थपेर आन्तरिक उडानमा ८ वटा हजाज पुर्याई ३६ गन्तव्यमा उडान गर्ने महत्वाकांक्षा लिएको हो।
आन्तरिक उडानतर्फ निगमको बजार हिस्सा २ प्रतिशत हाराहारी मात्रै छ। कोभिडपछि अन्तर्राष्ट्रिय हवाई क्षेत्रमा आएको संकटलाई निराकरण गर्दै निगमलाई चलायमान बनाउन आन्तरिक उडानमा बजार विस्तार गर्ने लक्ष्य लिएको छ।
ट्रंक रुटमा गन्तव्य
१.भरतपुर
२.भैरहवा
३.भद्रपुर
४.विराटनगर
५.धनगढी
६.जनकपुर
७.नेपालगञ्ज
८.पोखरा
९.सिमरा
१०.तुम्लिङटार
११.माउन्टेन
स्टल रुटमा
विराटनगरबाट
१.तामखर्क
२.फाप्लु
३.खानीडाँडा
४.भोजपुर
काठमाडौंबाट
१.लामिडाँडा
२.तामखर्क
३.रुम्जाटार
४.रुकुम
५.फाप्लु
६.ताप्लेजुङ
७.खानीडाँडा
८.भोजपुर
९.लुक्ला
१०.दाङ
नेपालगञ्जबाट
१.साँफेबगर
२.जुम्ला
३.रुकुम
४.चौरजहारी
५.बाजुरा
६.सिमिकोट
७.डोल्पा
८.ताल्चा
पोखराबाट
१.भरतपुर
२.भैरहवा
३.जोमसोम
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
