काठमाडौं- राष्ट्रिय ध्वजाबाहक नेपाल वायुसेवा निगम (नेपाल एयरलाइन्स)लाई सरकारले अन्तर्राष्ट्रिय हवाई इन्धनमा सहुलियत दिने तयारी गरेको छ। निगमको प्रस्तावमा आयल निगमले अन्तर्राष्ट्रिय हवाई इन्धनमा केही सहजता गरिदने तयारी गरेको हो।
आयल निगमका कार्यकारी निर्देशक सुरेन्द्र पौडेलले वायुसेवा निगमले प्रयोग गर्ने अन्तर्राष्ट्रिय हवाई इन्धनको मूल्यमा केही सहजता गरिदिने विषयमा छलफल भइरहेको बताए। आयल निगमले इन्धनको मूल्य नघटाए वायुसेवा निगमलाई कुनै शीर्षकबाट सहयोग गर्नेगरी छलफल अगाडि बढाएको हो।
वायुसेवा निगमका महाप्रबन्धक डिमप्रकाश पौडलले अन्तर्राष्ट्रिय हवाई इन्धनको मूल्य अन्तर्राष्ट्रिय बजारको तुलनामा नेपालमा मंहगो भएका कारण अन्य देशका जेट एयरलाइन्ससँग भाडामा प्रतिप्रस्पर्धा गर्न नसकेको भन्दै मूल्यमा केही सहजता गरिदिन उद्योग, वाणिज्य तथा आपूर्ति मन्त्री तथा मन्त्रालय, अर्थमन्त्री तथा अर्थ मन्त्रालयल र प्रधानमन्त्रीसँगै बारम्बार आग्रह गर्दै आएका थिए।
अन्तर्राष्ट्रिय उडानमा कुल खर्चको ३५ देखि ४० प्रतिशत खर्च इन्धनमै हुन्छ। जसका कारण निमगले नाफा समेत गर्न नस्कने अवस्था आएको भन्दै हवाई इन्धनको मूल्यमा सहजता गरिदिन पौडेलले लबिङ गरिरहेका छन्।
वायु सेवा निगम अहिले पनि घाटामा नै छ। निगमले गत आर्थिक वर्षमात्रै ४ अर्ब रूपैयाँ भन्दा बढी घाटा खाएको थियो। निगम घाटामा जाँदा आर्थिक संकट खेपिरहेको छ। निगमले जहाज उडाएर कमाएको रकम अहिले कर्मचारीको तलबमा मात्रै ठिक्क भएको छ। निगमको घाटा कम गर्दै संस्थालाई बलियो बनाउने आधार इन्धनको मूल्यमा सहजता दिने विषय पनि प्रमुख हो।
‘नेपाल आयल निगम र नेपाल वायुसेवा निगम दुवै सरकारी संस्थान हो,’ आयल निगमका कार्यकारी निर्देशक पाैडेलले भने, ‘वायुसेवा निगम आर्थिक संकटमा छ। निगमको आर्थिक संकट टार्नका लागि अन्य विदेशी कम्पनीलाई सहुलियत नदिएपनि नेपाल वायुसेवा निगमले भर्ने इन्धनमा त केही छुट दिन सकिन्छ भने विषयमा हामीले पनि सोचिरहेका छौं। तर, निगमलाई सहुलियत दिएपनि अन्य कम्पनीलाई भने दिन सक्दैनौं।’
मूल्य चाहिँ नघटाउने तर, वायुसेवा निगमको हकमा कुनै किसिमले सहुलियत दिने विषयमा सकारात्मक नै भएको आयल निगमका कार्यकारी निर्देशक पौडेल बताउँछन्। ‘हामीले उहाँहरुसँग लिएको रकम फिर्ता गर्ने लगायतको केही विषयमा पनि छलफल चलिरहेको छ,’ पौडेलले भने, ‘निमगको कमजोर आर्थिक अवस्था सुधार गर्नका लागि हाम्रो तर्फबाट गर्न सकिने काम हामी गर्छाैं। यो कामका लागि उद्योग मन्त्रीको समेत निर्देशन भइसकेको छ भने प्रधानमन्त्रीबाट पनि निर्देशन आइसकेको छ।’
निगमलाई बचाउन तेलको विषयमा उहाँहरुबाट राम्रो प्रस्ताव आयो भने आयल निगम तयार रहेको र अरुको हकमा भने यो लागू नहुने पौडेलको तर्क छ।
‘लकडाउनमा हवाई इन्धनको व्यापार नहुँदा नै अहिले हामीलाई असर परिरहेको छ। अझै यसको व्यापार कहिलेसम्म फुल फेजमा नआउने हो यकिन पनि छैन,’ उनले भने ‘ यस्तो अवस्थामा अन्तर्राष्ट्रिय हवाई इन्धनको मूल्य घटाउने भन्ने विषय चाहिँ हुँदैन।’
हवाई इन्धनबाट आएको नाफाले नै उपभोक्तालाई केही सस्तोमा इन्धन व्यापार गरिरहेको कारण पनि अन्तर्राष्ट्रिय हवाई इन्धनको मूल्य नघट्ने पौडेलको भनाइ छ।
‘अन्तर्राष्ट्रिय हवाई उडानको टिकट डिमाण्ड एण्ड सप्लाईमा भर पर्छ। त्यही दिल्लीका लागि कहिले ३० हजार आइसीसम्म टिकटको पर्छ भने कहिले ४ हजार आइसीसम्ममा टिकट पाइन्छ। हवाई इन्धनको मूल्य घट्दैमा ३० हजार मूल्यको टिकट २८ हजार पनि हुँदैन त्यसकारण हवाई सेवा प्रदायकले इन्धनको मूल्य बढी लिँदा टिकट मंहगो भयो भनेर जुन मूल्य घटाउन लबिङ गरिरहेका छन् त्यो म मान्दिनँ। र, हवाई इन्धनको मूल्य घट्दैन,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
