काठमाडौं- सरकारले नै पर्यटन व्यवसाय चलायमान बनाउन अग्रसर नभएको व्यवसायीले आरोप लगाएका छन्। झन्डै ३ दर्जन पर्यटन क्षेत्रसँग सम्बन्धित संघ संस्थाले सोमबार पत्रकार सम्मेलन गरेर सरकारले नै लाखौं जनता सकडमा उतारेर आमसभा गर्ने तर पर्यटन व्यवसायलाई भने धराशायी बनाउन लागिपरेको आरोप लगाएका हुन्।
कोरोनाका कारण प्रभावित पर्यटन क्षेत्र अझसम्म पनि लयमा फर्कन सकेको छैन। पर्यटन व्यवसायलाई चलायमान बनाउन राज्य उदासीन भएको पर्यटन व्यवसायीको आरोप छ।
कोभिडका कारण नेपालको समग्र पर्यटन उद्योग नै धराशायी भएको कुरा सबैलाई थाहा नै छ,’ नेपाल एसोसिएसन अफ टुर एन्ड ट्राभल एजेन्टसका अध्यक्ष अच्युत गुरागाईंले भने, ‘व्यवसायीले सरकारलाई दर्जनौं पटक बिन्ती पत्र बुझाइसकेको छ। तर, सुन्ने काम भएको छैन। सरकार व्यवसायीको अभिभावक भएको हामीले महसुस गर्न पाएका छैन। अब पनि व्यवसायीको माग सम्बोधन हुँदैन भने सिंहदरबार घेरोउसम्मको आन्दोलन गछौं।’
नेपालको पर्यटन क्षेत्रलाई पुनर्जीवन दिनका लागि व्यवसायीले संयुक्त रुपमा १० मागसमेत अघि सार्दै पूरा नभए सिंहदरवार घेराउ गर्ने माग अघि सारेका छन्।
व्यवसायीले ७२ घण्टाको पिसिआर नेगेटिभ रिपोर्ट लिएर नेपाल भ्रमणमा आउने पर्यटकको हकमा अहिले लागू भएको क्वारेन्टाइनको व्यवस्था पूर्ण रूपमा खारेज हुने पर्ने माग अगाडि सारेको छन्।
यसैगरी, व्यवसायीले अनलाइन र अराइभल भिसा तथा विदेशस्थित नेपाली दूतावास वा नियोगहरूबाट भिसाको लागि कोभिड अगाडिकै व्यवस्था गर्नु पर्ने विषय पनि अगाडि सारेका छन्।
पर्यटन व्यवसायीहरूले त्रिभुवन अन्तर्राष्ट्रिय विमानस्थलमा कोभिड जाँचको मेसिन राख्ने र तोकिएको स्वास्थ्य निकायबाट नमुना संकलन गर्नु पर्ने व्यवस्था गर्दै पर्यटकलाई सहज रूपमा नेपाल आउन सक्ने वातावरण तयार पारिदिनु पर्ने बताएका छन्। पर्यटन व्यवसायी र पर्यटन श्रमिकलाई खोप उपलब्ध गराइदिनु पर्ने विषय पनि अगाडि सारेका छन्।
साथै संयुक्त रुपमा व्यवसायीहरूले नेपाल र चीनबीचको सीमा नाकाहरु तत्काल खुला गर्नु पर्ने विषयलाई पनि आफ्नो एजेन्डा रहेको बताए। व्यवसायीले नेपाल घुम्न आउने पर्यटकहरुले कम्पनीबाट अनिवार्य गाइड तथा पदयात्रा सहयोगी लिएर मात्र नेपाल भ्रमण गर्न र गराउन पाउनुपर्ने व्यवस्था हुनुपर्ने समेत उल्लेख गरे।
यसैगरी व्यवसायीहरुले नेपाल-भारत र नेपाल-चीन सीमा नाकाबाट भित्रिने पर्यटकहरुलाई सवारी साधनसहित सहज रुपमा आउन पाउने व्यवस्था गर्नु पर्ने माग अगाडि सारेको छन्।
नेपाल भ्रमणमा आउने विदेशीले विदेशमै बिमा गरेर आउने हुँदा कम्तीमा ५ हजार डलर बराकरको कोरोना बीमा गर्नु पर्ने व्यवस्था पनि हटाउनु पर्ने माग अगाडि सारेका छन्।
यसैगरी कोरोना विरुद्धको खोपको पूरा मात्रा लगाएर नेपाल आउने पर्यटकलाई कुनै अवरोध बिना नेपाल भ्रमण गर्न दिनुपर्ने माग छ। सरकारले अक्टोबर १७ देखि पदयात्रा तथा पर्वतराहण पर्यटन खुला गर्ने निर्णय गरेको पनि सरकारले जारी गरेको सुरक्षा निर्देशिकाका कारण अझै पनि यो क्षेत्र चलायमान हुने नसकेको ट्रेकिङ एजेन्सिसज एसोसिएसन अफ नेपालका अध्यक्ष खुमबहादुर सुवेदी बताउँछन्।
‘सरकारले व्यवसायीको गुनासो सुनेको छैन। सुन्न चाहेको छैन,’ उनले भने, ‘अब पनि सरकारले व्यवसायीको समस्या समाधानमा तत्परता देखाउँदैन भने हामी कडा आन्दोलनमा जान बाध्य हुन्छौं।’
हामी व्यवसायीले सरकारले जारी गरेको सुरक्षा निर्देशिकाअनुसार सेवा दिन्छौंभन्दा पनि पर्यटक आउने बाटो नै बन्द गराएको सुवेदीले बताए।
‘हामीले व्यवसायीले त क्वारेन्टाइनको व्यवस्थालाई सहज बनाइदिनुस भनेका छौं। खोप लगाएर आउने चाहने पर्यटकलाई आउन दिनुस् भनेका हौं। तर, राज्य सुन्दै सन्दैन। यो अवस्थामा कसरी विदेशी पर्यटक आउँछन?’ उनले भने, ‘प्रधानमन्त्री ज्यू पर्यटनको महत्व उच्च छ भने सुरक्षा निर्देशिका अनुसार सेवा दिने गरी सबै गतिविधि खुला गरिदिनु होस्। सरकार आफै लाखौं जनाता आसोर पोसार गर्दै आमसभा गरिरहेको छ। त्यसबाट कोरोना नसर्ने अनि सबै सुरक्षा निर्देशिका पालन गर्दै नेपाल भ्रमणमा आउने पर्यटकबाट चाँहि कसरी कोराना सर्छ?’ गुरागाँइले भने, ‘सरकार छ भने हाम्रो माग सम्बोधन होस्। नभए हामी आन्दोलनमा जान बाध्य हुन्छौं।’
‘कोभिडले जनता मर्छन्, व्यवसायी मर्छन् भने तपाईंहरुलाई थाहा छैन,’ उनले भने, ‘हामीले राज्यबाट के पाएका छौं? र तपाईंहरूलाई अभिभावक मान्ने।’
पर्यटनको सिजन सुरु भएसँगै होटल बुकिङमा बढ्न थालेको व्यवसायीहरूको भनाइ छ। तर, सुरक्षा निर्देशिकाका कारण उनीहरुलाई नेपाल आउन भन्ने सक्ने अवस्था नरहेको होटल संघ नेपालमा वरिष्ठ उपाध्यक्ष विनायक शाहले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
