काठमाडौं- नेकपा पुष्पकमल दाहाल ‘प्रचण्ड’-माधव नेपाल पक्षका शीर्ष नेताहरूले केन्द्रीय सदस्यहरूलाई परिस्थिति तरल भएको बताउँदै तयारी अवस्थामा रहन निर्देशन दिएका छन्। आफूपक्षीय केन्द्रीय सदस्यलाई ब्रिफिङ गर्दै सर्वोच्च अदालत र निर्वाचन आयोगले 'राम्रो छनक नदेखाएकाले जस्तोसुकै अवस्थाका लागि पनि तयारी रहन निर्देशन दिएका हुन्।
निर्वाचन आयोगले आफ्नो पक्षलाई आधिकारिकता नदिने संकेत पाएपछि प्रचण्ड-नेपाल पक्षले शुक्रबार निर्वाचन आयोग जाने तयारी गरेका थिए। तर आयोगका पदाधिकारीले समय दिन नसक्ने बताएपछि दाहाल, नेपाल र श्रेष्ठले पछिल्लो राजनीतिक घटनाक्रमका विषयमा ब्रिफिङ गरेका हुन्।
प्रधानमन्त्री केपी शर्मा ओलीको अहिले पहिलो पाइला प्रतिगमन भएपनि अझै प्रतिगमनतिर जान उद्यत भएको धारणा अध्यक्षद्वयले राखेको राखेको बैठकमा सहभागी केन्द्रीय सदस्य लेखनाथ न्यौपानेले बताए।
‘ओली राज्य शक्तिको साधन स्रोत दुरुपयोग गरेर आफ्नो पक्षमा पार्ने नभए कसैको पक्षमा निर्णय गराउन नदिने देखिएका छन्,’ न्यौपानले भने, ‘अदालत र निर्वाचन आयोगको फैसला संविधान र कानुनभन्दा बाहिर जाने अवस्था देखिँदैन। यदि कानुन र संविधानअनुसार दुवै संवैधानिक निकायले फैसला नगरे दीर्घकालीन संघर्षका कार्यक्रम बनाउनुपर्छ भन्ने थियो,’ न्यौपानेले भने।
दुवै संवैधानिक निकायले कानुन माने दोस्रो निर्णय गर्ने ठाउँ छैन : प्रचण्ड
कार्यक्रममा सम्बोधन गर्दै प्रचण्डले दुवै संवैधानिक निकाय (सर्वोच्च अदालत र निर्वाचन आयोग)ले संविधान र कानुन माने दोस्रो निर्णय (आफूहरू विरुद्ध हुने) गर्ने अवस्था नरहेको बताए।
आयोगले बहुमतको निर्णय माने आफ्नो पक्ष आधिकारिक पार्टी हुने र प्रतिनिधि सभा पनि पुनःस्थापना हुने प्रचण्डले बताएको न्यौपानेले बताए। प्रचण्डको ब्रिफिङमा अदालत र आयोगप्रति आशंका र विश्वास दुवै देखिएको अर्का केन्द्रीय सदस्य युवराज चौलागाईंले बताए।
‘अहिले अदालतका विषयमा धेरै नबोलौँ। हामीले सोचेकै ढंगले फैसला गर्ला जस्तो लाग्छ। अहिलेसम्म वकिलको बहस र एमिकस क्युरीको राय सुन्दा संविधान हेरेरै अदालतले फैसला गर्छ भन्ने लाग्छ। अदालतले संविधानभन्दा बाहिर गएर फैसला गर्छ भन्नु अदालतको अपमान हो,’ प्रचण्डको भनाइ उद्धृत गर्दै चौलागाईंले भने, ‘हामी अदालतको अपमान गर्न चाहँदैनौं। अदालतका न्यायाधीशहरूले संविधानको सम्मान गरेरै फैसला गर्नुहोला भन्ने लाग्छ।’
निर्वाचन आयोग आफ्नो निर्णय गर्न लर्खराउने हो कि भन्ने आशंका पैदा भएको प्रचण्डले बताए। ‘सत्ताले आयोगलाई प्रभावित पार्ने हो कि भन्ने आशंका छ। निर्वाचन आयोगले त्यसो नगर्ला भन्ने छ,’ प्रचण्डले भने, ‘आयोगप्रति अझै विश्वास टुटिसकेको छैन। सही फैसला गर्ला!’
केपी ओली निकट नेताहरू आफूलाई फकाउन खुमलटार निवासमै भेट्न आउने गरेको प्रचण्डले बताए। ‘माधव नेपाललाई सक्नुहुन्न। कति अप्ठ्यारो मान्छे छ। तपाईंलाई थाहा छैन,’ भन्दै ओली निकट नेताहरुले प्रचण्डलाई भनेको विषयमा समेत उनले उल्लेख गरेका थिए। माधव नेपाल र प्रचण्ड दुवै नेताले आफ्नो बीचमा कुनै खालको समस्या नरहेको बताएको चौलागाईंले बताए।
प्रतिनिधि सभा पुनर्स्थापना भए/नभएपनि ओलीसँग एकता हुँदैन : नेपाल
यस्तै अर्का अध्यक्ष माधवकुमार नेपालले केपी ओली पूर्व एमाले र माओवादी भनेर विभाजित गर्न खोजेको बताए। ‘माधव नेपाल प्रचण्डको पछि लाग्यो माओवादीको पछि लाग्यो। माओवादी हौ भने उतै लाग, एमाले हौ भने यता आऊ भन्दैछन् केपी ओली,’ बैठकमा नेपालले बिफ्रिङ गर्दै भने, ‘मैले ओलीसँग संगत गरेको ४८ वर्ष भयो। केपी ओलीलाई अझै चिनेको रहेनछु। प्रतिनिधि सभा पुनर्स्थापना भए/नभएपनि ओलीसँग कुनै हालतमा एकता हुँदैन।’
ओलीसँग कुनै हालतमा एकता नहुने भन्दै नेपालले सत्यको मोर्चामा दृढतापूर्वक अघि बढ्न सबै नेताहरुलाई आग्रह गरेका थिए। केपी ओली नेताहरूलाई भ्रममा पार्न लागेकाले त्यस्तो भ्रममा नपर्न नेपालले सबैलाई आग्रह गरे।
‘केपी ओलीले मान्छे पठाइराखेका छन् मलाई भेट्न। फकाइराखेका छन्। उनले सामदाम सबै प्रयोग गर्न खोजेका छन्। कोही पनि मान्छे भ्रममा नपरौँ,’ नेपालले भने।
पार्टीको ७७ जिल्लाका अध्यक्ष‚ सचिवको रिक्त भएका स्थानको छिट्टै पुर्ति हुने नेपालले बताए। यस्तै पार्टी प्रवक्ता नारायणकाजी श्रेष्ठले संघर्षका कार्यक्रमलाई व्यवस्थित बनाउँदै पार्टीलाई विधि पद्धतिमा लाग्नुपर्ने बताए। ‘पार्टी संगठन व्यवस्थित भएन। अझै विधि पद्धतिलाई समातौँ,’ श्रेष्ठले भने, ‘केपी ओली यो पार्टीबाट गए। केपी ओली प्रवृत्ति सम्पूर्ण रुपमा गएन। त्यसलाई परास्त गरौँ।’
ओलीलाई गाली गर्नेभन्दा पनि विधिपद्धति लागू गरेर जाने वातावरण बनाउनुपर्ने श्रेष्ठको धारणा थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
