धनगढी- बलात्कारपछि हत्या गरिएकी बैतडीको दोगडाकेदार गाउँपालिका-७ चडेपानीकी १७ वर्षीय किशाेरी भागरथी भट्टको शव आफन्तले बुझेका छन्। १५ दिनदेखि जिल्ला अस्पतालमा रहेको भागरथीको शव शुक्रबार आफन्तले बुझेका हुन्।
बलात्का पछि हत्या गरेको अभियोगमा पक्राउ परेका दिनेश भट्टले अभिभावकको रोहबरमा बयान लिने क्रममा आफूले बलात्कार पछि हत्या गरेको स्विकारेपछि भागरथीका परिवारले शव बुझ्न मानेका हुन्।
पक्राउ परेका दिनेशले यअसघि घटना घटाएको भरपर्दो प्रमाण पेश नगरेको भन्दै परिवारले शव बुझ्न मानेका थिएनन्। उनीहरूले घटनामा अरु पनि संलग्न भएको हुनसक्ने आशंका गरेका थिए।
मृतकका दाजु केशव भट्टले १५ दिनदेखि जिल्ला अस्पताल बैतडीको शव गृहमा राखिएको आफ्नो बहिनीको शव बुझेर आजै दाहसंस्कार गरिने बताए। उनले पक्राउ परेका दिनेशले आफ्नै परिवारको सामु बयान दिएपछि शव बुझेको बताए। अस्पतालबाट शव यात्रा गरिने उनले बताए।
बैतडीका प्रमुख जिल्ला अधिकारी मोहनराज जोशीले मृतकका आफन्तहरूसँगको छलफलपछि उनीहरूले शव बुझेको बताए। भागरथीको आजै सेरा आर्यघाटमा दाहसंस्कार गर्ने आफन्तले बताएका छन्।
भागरथी गत माघ २१ गते बुधबार विद्यालयबाट घर फर्केकी थिइनन्। भोलिपल्ट साँझ विद्यालय जाने बाटो नजिकै उनको शव विभत्स अवस्थामा फेला परेको थियो। भागरथीको घटनामा संलग्न रहेको भन्दै प्रहरीले बुधबार अन्दाजी १८ वर्षीय दिनेशलाई सार्वजनिक गरेको थियो।
यद्यपि, उनको उमेर अझै पुष्टि भएको छैन। उमेर सुनिश्चित गर्न प्रहरीले वडा कार्यालय र विद्यालयमा पत्राचार गरिसकेको छ। दिनेश भागरथी पढ्ने विद्यालयको कक्षा ११ का विद्यार्थी हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
