काठमाडौं- नेपाल वायुसेवा निगम र लुम्बिनी बौद्ध विश्व विद्यालयबीच नेपालको पर्यटन प्रवर्द्धन र बुद्धदर्शनको विस्तारमा पारस्परिक सहयोगको माध्यमले अगाडि बढ्ने सम्बन्धि समझदारी पत्रमा हस्ताक्षर भएको छ।
निगमको केन्द्रीय कार्यालयमा आज आयोजित एक समारोहमा निगमका महाप्रवन्धक डिमप्रसाद पौडेल र विश्व विद्यालयका उपकुलपति प्रा. डा. हृदय रत्न बज्राचार्यले समझदारीपत्रमा हस्ताक्षर गरेका हुन्।
सम्झौता अनुसार पर्यटन क्षेत्रमा दिगो विकासमा सहयोग पुग्ने गरी उड्डयन तथा पर्यटन क्षेत्रमा उच्च गुणस्तरको जनशक्ति तयार गर्न दुवै संस्थाकाबीच प्रयास हुने छ। लुम्बिनी क्षेत्रका साथै नेपालका अन्य बुद्धिष्ट क्षेत्रहरुमा पर्यटन विकासमा दुवै संस्थाले प्रवर्द्धनात्मक कार्यक्रम संचालन गर्नेछन्।
नेपालको बहुआयामिक विकासका लागि उड्डयन क्षेत्रका साथै पर्यटन क्षेत्रको प्रवर्द्धनमा संयुक्त प्रयास गरिने सम्झौतामा समावेश गरिएको छ। पर्यटन र बुद्ध दर्शनसँग सम्बन्धित विशेष कार्यक्रम बनाउन र त्यसलाई कार्यान्वयन गर्नेबारे पारस्परिक समझदारी र सहयोगको आधारमा गरिने सम्झौतामा उल्लेख छ।
उड्डयन र पर्यटनको क्षेत्रमा अनुसन्धानात्मक क्रियाकलाप अगाडि बढाउन र राष्ट्रिय एवं अन्तर्राष्ट्रियस्तरमा संस्कृति परम्परालाई विस्तार गर्ने लक्ष्य लिइएको समझदारी पत्रमा उल्लेख छ।
लुम्बिनी बौद्ध विद्यालयमा अध्ययन गर्ने विद्यार्थीहरुका लागि पर्यटन सँग सम्बन्धित विषयमा प्रयोगात्मक अध्ययनको अवसर निगमले प्रदान गर्नेछ भने विश्व विद्यालयले आन्तरिक र अन्तर्राष्ट्रिय उडानमा निगमको सेवालाई प्राथमिकता दिनेछ।
लुम्बिनी विश्वविद्यालयमा उच्च शिक्षा लिने निगमका कर्मचारीका सन्तानलाई शुल्कमा विशेष छुट उपलब्ध गराइनेछ। यो सम्झौता हाललाई चार वर्षको लागि गरिएको छ र भविष्यमा नवीकरण गर्न सकिनेछ।
समारोहमा बोल्दै महाप्रबन्धक श्री पौडेलले नेपाल वायुसेवा निगमले बुद्धिष्ट बाहुल्य भएका मुलुकहरुमा उडान संचालन गर्ने अवधारणा राखेको बताए। प्रा.डा. बज्राचार्यले बुद्ध धर्म मात्र नभएर यसले दर्शनको महत्व बोकेको कारण विश्व विद्यालयले त्यसै अनुसार कार्यक्रम संचालन गरेको धारणा व्यक्त गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
