काठमाडौं- नेपाल कम्युनिस्ट पार्टी (नेकपा)का सर्लाही जिल्ला इन्चार्ज डाचाराज वाग्लेको मृत्यु 'शंकास्पद' भएको भन्दै नेकपाले छानबिन समिति गठन गरेको छ। वाग्लेको मृत्युबारे छानबिन गरी पार्टीमा प्रतिवेदन बुझाउन नेकपा केन्द्रीय सदस्य प्रल्हाद बुढाथोकीको संयोजकत्वमा ९ सदस्यीय छानबिन समिति गठन गरिएको हो।
नेकाप स्थायी कमिटी सदस्य गिरिराजमणि पोखरेलले केन्द्रीय सदस्य बुढाथोकीको नेतृत्वमा डाचाराजको मृत्युबारे छानबिन गर्न समिति गठन गरिएको जानकारी दिएका छन्।
वाग्ले मृत भेटिएसँगै नेकपाले घटनालाई शंकास्पद भनेको थियो। वाग्लेको सडक दुर्घटनामा मृत्यु भएको हो वा कुनै सवारी साधनले ठक्कर दिएर दुर्घटना गराइएको भन्ने विषय निर्क्यौल गर्न नेकपाले छानबिन समिति बनाएको हो।
गत माघ २१ गते मसाल जुलुसमा सहभागी भएका उनी घर फर्कने बाटोमा मृत भेटिएका थिए। मोटरसाइकल दुर्घटना परेको अवस्थामा सर्लाहीको मुर्तिया जङ्गलमा उनी मृत भेटिएका थिए। उनी प्रचण्ड-माधवपक्षीय नेकपाका नेता हुन्।
यसैबीच पार्टीका दुवै अध्यक्षहरू पुष्पकमल दाहाल 'प्रचण्ड' र माधवकुमार नेपाल उपस्थित हुने गरी सर्लाहीमा फाल्गुन ६ गते श्रद्धाञ्जली सभा गर्ने निर्णय भएको नेता पोखरेलले जानकारी दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
