काठमाडौं– सत्तारुढ घटक नेकपा माओवादी केन्द्रकी सांसद पम्फा भुसालले नै भारतीय प्रधानमन्त्री नरेन्द्र मोदीको नेपाल भ्रमणका बेलाको सुरक्षा व्यवस्थालाई लिएर प्रश्न उठाएकी छन्। छिमेकी राष्ट्रप्रमुखलाई नेपाल भ्रमणमा बोलाउँदा आफैंले सुरक्षा दिन सक्षम रहेको भन्दै भारतीय सेनाको उपस्थितिप्रति उनले आपत्ति जनाएकी हुन्।
'विगतमा पनि भारतीय प्रधानमन्त्रीहरु आउनुभएको छ। चीनका प्रधानमन्त्री पनि केही घन्टाका लागि आउनुभएको छ। तर अहिले ठूलो संख्यामा भारतीय सुरक्षा कमाण्डो ल्याउने काम भयो र सुरक्षाको पहिलो घेरामा उनीहरु नै भए,' उनले प्रश्न गरिन्, 'हाम्रो सुरक्षा व्यवस्थामा प्रश्न उठाउन खोजिएको हो कि? नेपाली सेनाको सक्षमता र भूमिकालाई न्युनीकरण गरिएको हो?'
हाम्रा मन्त्रीहरु पनि जान नसक्ने गरेर उनीहरुले सुरक्षा घेरा बनाएको भन्दै उनले असन्तुष्टि व्यक्त गरिन्। 'नेपालमा आउने पाहुनालाई सुरक्षा दिन सक्दैनौं भने किन बोलाउने?' उनको प्रश्न थियो।
परराष्ट्र मन्त्रालय कमजोर
भुसालले परराष्ट्र मन्त्रालय कमजोर भएको पनि आरोप लगाएकी छिन्। उनले प्रधानमन्त्री ओलीको भारत भ्रमण र भारतीय प्रधानमन्त्री नरेन्द्र मोदीको नेपाल भ्रमणका बेलामा पनि तिथिमिति र कार्यक्रम निर्धारणमा हाम्रो परराष्ट्र मन्त्रालय पछि परेको बताइन्। 'भारतबाट घोषणा हुने, भारतीय मिडियाले सार्वजनिक गर्ने र पछि त्यही कुरा कार्यान्वयन भएर आउनाले हाम्रो कूटनीतिक पहलकदमी कमजोर भयो कि भन्ने देखियो', उनले भनिन्।
त्यस्तै, भुसालले नरेन्द्र मोदीकै पार्टीका सांसद कीर्ति आजादको अभिव्यक्तिप्रति नेपाल सरकारले गम्भीर ढंगले प्रतिवाद गर्न पनि माग गरिन्।
भुसालले प्रदेश २ का मुख्यमन्त्री लालबाबु राउतले मोदीको उपस्थितिमा दिएको अभिव्यक्तिको पनि आलोचना गरिन्। 'आन्तरिक विषयमा हामी फरकफरक भए पनि हाम्रा विषय आन्तरिक विषय हुन्, घरेलु विषयहरु हुन्', उनले भनिन्, 'कोही पनि विदेशीसामु हाम्रा आन्तरिक समस्याहरुको बिस्कुन फिँजाउने कुरा कदापि पनि सही हुन्न। त्यो जनताको कोणबाट र राष्ट्र राष्ट्रियताको कोणबाट पनि सही हुन्न।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790762422.png)
-1786602170.png)
