काठमाडौं– एमाले सांसद भीम रावलले २ नम्वर प्रदेशका मुख्यमन्त्री लालबाबु राउतले भारतीय प्रधानमन्त्री नरेन्द्र मोदीको नागरिक अभिनन्दनका क्रममा दिएको अभिव्यक्ति तत्काल सच्याउने र आगामी दिनमा यस्तो अभिव्यक्ति नदिने वाचा गर्न माग गरेका छन्।
रावलले भारतीय जनता पार्टीका सांसद कीर्ति आजादको भनाइ नेपालको राष्ट्रियता विपरीतको कार्य भएको भन्दै उनले भर्त्सना गरे। ‘कीर्ति आजादबाट स्वभिमानमाथि जुनखालको प्रहार भएको छ त्यसलाई तत्काल उनी आफैले सच्याउनुपर्छ,’ सांसदमा बोल्दै रावलले भने, ‘जनकपुरलाई मिथिलाको राजधानी बनाउने र भारतमा फर्काउने भनाइ निन्दनीय छ। मेची-महाकाली जहाँको भए पनि निन्दनीय छ, निजले फिर्ता लिनुपर्दछ। यो नेपालमाथिको निर्लज्ज प्रहार हो।’
मुख्यमन्त्रीको आलोचना
रावलले २ नम्बर प्रदेशका मुख्यमन्त्री राउतको अभिव्यक्ति संविधानविपरीत भएकाले यस्तो कार्य सच्याउन माग गरे।
‘भारतीय प्रमको सम्मानमा जसरी मुख्यमन्त्रीबाट अभिव्यक्ति आयो उहाँले सार्वजनिक रुपमा सच्याउनुर्छ,’ रावलले भने, ‘हामीबीच मतभेद होलान्, मिलाउनुपर्ने होलान् तर त्यसलाई संविधान विपरीत कुनै विदेशी राष्ट्रप्रमुख समक्ष हात पसार्न मिल्दैन।’
चित्त नबुझेको कुरा हुन सक्ने भन्दै रावलले आफू पनि पछि परेको क्षेत्रको मानिस भएको तर यसरी संविधानविपरीत अभिव्यक्ति दिँदै नहिँडेको बताए। ‘संघीय सरकार अन्तर्गत अधिकार रहने संविधानमै उल्लेख गरेका छौं। संविधानको मर्यादालाई नाघेर गर्ने कार्य सह्य हुँदैन,’ उनले आक्रोश व्यक्त गरे।
नेपालको शान्ति प्रक्रिया विश्वमै गर्व गर्नलायक भएको भन्दै रावलले संविधानका मतभेद आपसमा मिलाउनुपर्नेमा विदेशी व्यक्तिका अगाडि हात फैलाउन नहुने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790762422.png)
-1786602170.png)
