काठमाडौं- नेकपाको पुष्पकमल दाहाल ‘प्रचण्ड’-माधवकुमार नेपाल पक्षले आकस्मिक रूपमा देशैभर गरेको आमहड्ताल कार्यक्रम कतै शान्तिपूर्ण भएको भएको छ त कतै झडपसमेत भएको छ। शान्तिपूर्ण आमहड्ताल भनेपनि काठमाडौको कंलकी, सामाखुसीसहित जनकपुर, पोखरा, धरान लगायत क्षेत्रमा झडप भएको थियो।
आफूहरूले गरेको शान्तिपूर्ण आन्दोलनका क्रममा सरकारी पक्षले बल प्रयोग गरेको र धरपकडसमेत भएको नेकपा केन्द्रीय सदस्य विष्णु रिजालले बताए। ‘हामीले शान्तिपूर्ण तरिकाले आमहड्तालको घोषणा गरेका थियौँ। त्यस्तो कुनै आगजनी गर्ने हुलदंगा गर्ने कुनै योजना थिएन,’ नेपाल लाइभसँग रिजालले भने, ‘आन्दोलनमा घुसपैठ हुँदा कतिपय क्षेत्रमा तनावपूर्ण भएको छ। नभए अन्य क्षेत्रमा शान्तिपूर्ण सौहार्दपूर्ण वातावरणले आमहडताल सम्पन्न भयो।’
आमहड्तालका लागि कलङ्कीमा युवराज ज्ञवाली र अष्टलक्ष्मी शाक्य,बल्खुः वेदुराम भुसाल, सातदोबाटोमा देव गुरुङ, पुल्चोकमा पम्फा भुसाल, कोटेश्वरमा लीलामणि पोखरेल, चाबहिलमा वर्षमान पुन र हरिबोल गजुरेल खटिएका थिए।
यस्तै महाराजगञ्जमा शक्ति बस्नेत, गोंगबुमा भीम रावल, बालाजुमा रघुजी पन्त र रत्नपार्कमा नारायणकाजी श्रेष्ठ र जनार्दन शर्मालाई जिम्मा दिइएको थियो।
प्रहरीले बिहीबार बिहानै कंलकीबाट स्थायी कमिटी सदस्य अष्टलक्ष्मी शाक्य, केन्द्रीय सदस्य हितमान शाक्य, अमृता थापामगर, कृष्ण केसी लगायत नेता कार्यकर्तालाई पक्राउ गरेको थियो। लगत्तै बागबजारबाट विद्यार्थी नेता रमेश मल्ल, तिलकराज भण्डारी लगायत नेताहरु पक्राउ परे।
उपत्यकाका विभिन्न ठाउँबाट बिहानै नेता कार्यकर्ता पक्राउ परेपछि अध्यक्ष प्रचण्ड नेपाल लगाय नेता समेत सडकमै उत्रिएर धर्ना कसेका थिए। सातदोबाटो सडकमा केही बेर बिताएका प्रचण्ड पुल्चोकको धर्नामा पुगेका थिए।
नेता नेपाल पनि कोटेश्वरको धर्नामा मोटरसाइकलै चढेर धर्ना बसेका थिए। उता सचिवालय सदस्य एवम् प्रवक्ता नारायणकाजी श्रेष्ठ र जनार्दन शर्मा विद्यार्थीको मोर्चामा बिहानै रत्नपार्क पुगेका थिए।
बिहीबार बिहानै बन्दकर्ताले सामाखुशीमा सवारी साधनमा तोडफोड गर्नुका साथै आगजनी गरेपछि प्रहरीले नेता कार्यकर्ता ठूलो संख्यामा पक्राउ गर्यो।
प्रहरीले ठूलो संख्यामा नेता कार्यकर्ता पक्राउ गरेपछि बिहान १० बजेतिर सवारी सधान सामान्य रुपमा चल्न थालेका थिए।
प्रहरीले बन्दकर्ता नबसेको क्षेत्रबाट सवारी साधन चलाउन सहजीकरण गरेका थिए। सबैभन्दा धेरै बन्दकर्ता रत्नपार्क, कोटेश्वर र गंगबु क्षेत्रमा धेरै उपस्थित थियो। अन्य क्षेत्रमा भने बन्दकर्ता सामान्य उपस्थित थियो। आमहड्ताल बन्द गरेर देशलाई नै ठप्प पार्न नहुने भन्दै सर्वसाधरणले विरोध जनाएका छन्।
नागरिकलाई सास्ती दिने गरी यस्ता आमहड्ताल जस्ता कार्यक्रम गरिएको सामाजिक सञ्जालमा तीव्र आलोचना भयो। यस्तै विवेकशील नेपाली दलले समेत नेपाल नै बन्द गरेर संघर्ष कार्यक्रम ल्याउनु गलत भएको टिप्पणी गरेको छ।
प्रचण्ड–नेपाल पक्षले बिहीबार बेलुका एक विज्ञप्ति जारी गर्दै आमहड्ताल शान्तिपूर्ण रुपमा सफल भएको दाबी गरेको छ। 'आमहड्तालमा प्राप्त जनसमर्थनले हामीलाई उत्साहित बनाउनुका साथै संघर्षका माध्यमबाट हरहालतमा प्रतिगामी कदम सच्याउन ऊर्जा मिलेको छ,' विज्ञप्तिमा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
