फाइल तस्बिर।
काठमाडौं- नेपाल कम्युनिष्ट पार्टी (नेकपा)को ओली पक्षका नेता एवं गृहमन्त्री रामबहादुर थापा ‘बादल’ले पुष्पकमल दाहाल ‘प्रचण्ड’ र माधवकुमार नेपालले पार्टीमा फुट पैदा गरेको टिप्पणी गरेका छन्। शनिबार चितवनमा आयोजित सभालाई सम्बोधन गर्दै थापाले उनीहरूलाई केपी शर्मा ओलीले नेतृत्व गरेको नेकपाका फर्किन पनि अपील गरे।
‘तपाईंहरूले जसरी पार्टीमा फुट पैदा गर्ने दुस्साहस गर्नुभएको छ, त्यसबाट पछाडी फर्किनुस्’, गृहमन्त्री थापाले भने, ‘आफ्ना गल्ती स्वीकार्नुस्, आउनुस् पार्टीमा फर्किनुस्। जनता एकता चाहान्छन्।’
उनले गल्ती स्वीकार्दै सरकारले घोषणा गरेको निर्वाचनमा भाग लिएर प्रधानमन्त्री बन्न पनि सुझाएका छन्। ओली नेतृत्वको पार्टीमा आए मतपत्र च्यात्नु नपर्ने उनको टिप्पणी छ।
‘आउनुस्, निर्वाचनमा भाग लिएर प्रधानमन्त्री बन्नुस्, तपाईंहरूलाई मतपत्र च्यात्न जरुरी पर्ने छैन’, बादलले भने। गएको स्थानीय तह निर्वाचनमा चितवनको भरतपुर महानगरपालिका प्रमुखका लागि उम्मेद्वार बनेकी प्रचण्डपुत्री रेणु दाहालका पक्षधरले मतपत्र च्यातेका थिए। पछि फेरि मतदान भएको थियो। त्यसपछि दाहाल मेयरमा निर्वाचित भएकी थिइन्। त्यसैलाई व्यंग्य गर्दै बादलले मतपत्रको प्रसंग ल्याएका हुन्।
गृहमन्त्री थापाले जनताले समृद्धि चाहेको र त्यो नेकपाको नेतृत्वमा मात्र संभव रहेको पनि बताए।
सरकारको कदम संवैधानिक
गृहमन्त्री थापाले प्रतिनिधि सभा विघटन गर्ने सरकारले कदम संवैधानिक भएको आज फेरि पुष्टि भएको दाबी पनि गरे। उनले सरकारले असंवैधानिक कदम चाल्यो भनेर आरोप लगाइएको बताए।
‘सरकारको कदम एकदमै संवैधानिक छ, त्यो एकदमै सही छ भन्ने जवाफ आज यो विशाल जनसमुदायले दिएको छ’, बादलले भने, ‘संविधानको अन्तिम व्याख्याता र निर्माणकर्ता जनता नै हुन्।’
पूर्वमाओवादी समूहका नेता थापा प्रतिनिधि सभा विघटनपछि दुई समूहमा बाँडिएको नेकपाभित्र प्रधानमन्त्री ओली पक्षमा लागेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1765782108.png)
-1764146706.png)
-1763721444.png)
-1765273665.jpg)
