काठमाडौं- निर्वाचन आयोगले पठाएको पत्रप्रति नेपाल कम्युनिस्ट पार्टी नेकपाको पुष्पकमल दाहाल प्रचण्ड–माधवकुमार नेपाल समूहले आशंका व्यक्त गरेको छ। आयोगले निर्वाचनका सम्बन्धमा छलफल गर्न दुवै पक्षका अध्यक्षलाई सम्बाेधन गरी पत्र पठाएको थियो। विभाजनको निरुपण नगरि पठाइएको पत्रको व्यहोराप्रति उक्त समूहले आपत्ति जनाएको हो।
अध्यक्ष वा अध्यक्षले तोकेका प्रतिनिधिलाई छलफलका लागि बोलाइको थियो। प्रचण्ड–माधव समूहका नेताहरू आयोग पुगेपनि छलफल नगरी फर्किएका छन्। ‘दुवै तर्फलाई अध्यक्ष भनि सम्बाेधन गरेर आयोगले पत्र लेखेको छ। उहाँहरूकै लेखाइमा पनि दुई अध्यक्ष देखियो।’
आयोगमा पुगेका प्रचण्ड–माधव समूहका नेता राजेन्द्र पाण्डेयले भने, ‘विवादको निरुपण नै नगरी दल दर्ताको सूचना जारी गर्ने कसरी हुन्छ?’ आयोगको पत्रको आशय दल दर्ताको सूचना कहिलेदेखि प्रकाशित गरौं भन्ने मनशायको देखिएको उक्त समूहको भनाइ छ। दुई नेकपाको आधिकाररिता विवाद निरुपण नभएकाले सूचना प्रकाशित हुन नसक्ने पाण्डेयको तर्क छ।
‘आयोगको पत्रको काम कारबाहीको प्रक्रिया पनि अधुरो छ’, आयोगको परिसरमा पाण्डेयले भने, ‘हालसम्म आयोगले गरेका काम सुन्नलाई समस्या छैन। दल दर्ताको सूचना प्रकाशन सम्बन्धमा हामी (दुई नेकपा)लाई मात्रै बोलाएर त भएन नि।’
आयोगको निधारमा कालो धब्बा लगाउने कार्य भएको प्रचण्ड–माधव पक्षको बुझाइ छ। नेता पाण्डेयले आयोगको निधारमा धब्बा लगाउने काम कसले गरेको भन्नेबारे खोजीको विषय भएको बताए।
उनले भने, ‘सेटिङ नै भएको भन्ने तहमा त नपुगिहालौं। केही काम कारबाही हेर्दा अप्ठ्यारो छ।’ निर्वाचन आयोग ऐन २०७३ दफा १९ को ५ मा निर्वाचन अवधिभरी सरुवा तथा काजमा खटाउन नपाइने प्रावधान भएपनि त्यसको उल्लंघन गरेको पाण्डेयले बताए।
‘निर्वाचन आयोगका कानून हेर्ने सह-सचिव सरुवा गरिएको छ। सरुवाका लागि आयोगका सदस्यहरूसँग छलफल भएको छैन। एउटा समस्या त्यहाँनेर छ’, पाण्डेयले भने।
राजनीतिक दल सम्बन्धी नियमावली २०७४ उपनियम ६ को प्रावधान समेत स्मरण गराइएको छ। विवाद सुरु भएपछि निरुपण नगरि राजनीतिक दलसम्बन्धी कुनै कार्य नगरिने व्यवस्थालाई कुल्चिएको उनले दाबी गरे।
पार्टी अध्यक्षद्वय पुष्पकमल दाहाल ‘प्रचण्ड’ र अध्यक्ष माधवकुमार नेपाल नै आयोगको बैठकमा उपस्थित हुने चाहेकाले बैठकमा सहभागी नभएको उक्त पक्षको भनाइ छ। माघ १८ सम्म पार्टीको काममा उपत्यका बाहिर रहेकाले त्यसपछि आयोगको बैठकमा अध्यक्षहरू उपस्थित हुने पाण्डेयले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1765273665.jpg)
