काठमाडौं- नेपाल कम्युनिष्ट पार्टी (नेकपा)का उपाध्यक्ष वामदेव गौतमले आफ्ना विषयमा भ्रमपूर्ण समाचार प्रवाह गरिएको बताएका छन्। नेकपा विभाजनको तहमा पुगेपछि ‘पार्टी एकता राष्ट्रिय अभियान’को नेतृत्व गरिरहेका गौतमले ‘जसले अध्यक्ष दिन्छ, त्यही समूहमा जान्छु’ भनेको भन्दै आएका समाचारप्रति आपत्ति जनाएका हुन्।
गौतमका सहयोगी विश्वमणि सुवेदीमार्फत् समाचारको खण्डन गर्दै उनले पार्टी एकताका निम्ति आफूसँग भएका पदहरू गुमाउन वा कसैका निम्ति छोडिदिन तयार रहेको बताएका छन्।
नेकपा केपी शर्मा ओली र पुष्पकमल दाहाल–माधवकुमार नेपाल समूहमा बाँडिएको छ। गौतम भने यी दुवै समूहमा नलागेर एकता अभियान चलाइरहेका छन्।
विगत केही समयदेखि गौतमलाई विभिन्न किसिमले अपमान गर्ने, उनका विचार, अभियान र विधि पक्षधर कार्यशैलीमाथि भ्रम सिर्जना गराउने काम योजनावद्ध रूपमा हुँदै आएका उनको सचिवालयले जनाएको छ।
‘सोमबार केही पत्रकार साथीहरू उहाँलाई भेट्न भैंसेपाटीस्थित् हाम्रो सचिवालयमा आउनुभएको थियो। ती साथीहरू पत्रकार मात्र नभई पार्टी र संगठनमा समेत आवद्ध भएका नाताले अनौपचारिक रुपमा भेट गर्न आउनुभएको हो’, सुवेदीले जारी गरेको विज्ञप्तिमा भनिएको छ, ‘उहाँहरूसँग पार्टी एकता अभियान, विभाजनले निम्त्याएका असर लगायतका विषयमा अनौपचारिक कुरा भएको हो। तर, जसरी समाचारमा आएजस्तो ‘जसले अध्यक्ष दिन्छ, त्यही समूहमा जान्छु’ भन्ने कुरा उहाँबाट व्यक्त भएको छैन।’
गौतमको नेतृत्वमा भोलि, बुधबार पार्टी एकता राष्ट्रिय अभियानको घोषणा हुने पनि बताइएको छ। पहिले एकतामा आउन नसकेका र छरिएर रहेका विभिन्न कम्युनिष्ट तथा वाम–प्रगतिशील समूह एवं व्यक्तिहरूलाई यो अभियानमार्फत् एकतावद्ध गर्ने उद्देश्य राखिएको छ।
‘अध्यक्ष पद दिने समूहमा जाने’ भनी आएका समाचारले एकताको निःस्वार्थ उद्देश्यमाथि प्रहार गरिएको गौतमको सचिवालयको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
