काठमाडौं–सरकारले त्रिभुवन अन्तर्राष्ट्रिय विमानस्थलमा विद्युतीय र्याम्प बस सञ्चालन गर्ने योजना अगाडि सारेको छ।
नेपाल नागरिक उड्डयन प्राधिकरणले विमानस्थलको निषेधित क्षेत्रमा हाल वायुसेवा कम्पनीहरुद्वारा सञ्चालनमा रहेका र्याम्प बसलाई विद्युतीय बसबाट प्रतिस्थापन गर्ने निर्णय गरेको थियो। त्रिभुवन अन्तर्राष्ट्रिय विमानस्थल कार्यालयमा पुस २० गते बसेको बैठकले उक्त योजना अगाडि सार्दै वायुसेवा कम्पनीहरुलाई पत्र पठाएको थियो। तर, वायुसेवा सञ्चालकहरुले यसको विरोध गरेका छन्।
वायुसेवा सञ्चालकहरुको छाता संगठन नेपाल वायुसेवा सञ्चालक संघले विज्ञप्ति जारी गर्दै सरकारको निर्णयको विरोध गरेको हो ।
विज्ञप्तिमा भनिएको छ,‘ ‘विमानस्थलको निषेधित क्षेत्रमा हाल वायुसेवाहरुद्वारा सञ्चालनमा रहेका र्याम्प बसहरुलाई बिद्युतीय बसबाट प्रतिस्थापन गर्ने योजनाअन्तर्गत मौजुदा र्याम्प बसहरुको प्रदुषण नाप जाँच, हरेक सवारीको सिट संख्या, खरिद भएको वर्ष, सवारीको प्रकार आदि सम्पूर्ण विवरण खुलाई त्रिभुवन अन्तर्राष्ट्रिय विमानस्थल नागरिक उड्डयन कार्यालयमा पठाउन सबै वायुसेवाहरुलाई पत्राचार गरिएको सम्बन्धमा संघको ध्यानाकर्षण भएको छ ।’
सघंले मौजुदा र्याम्प बसहरुको माग भएको विवरण सम्बन्धित वायुसेवा कम्पनीहरुवाट उपलब्ध हुने तर, विमानस्थलमा र्याम्प बस प्रतिस्थापन गर्ने सम्बन्धमा संघ सहमत नरहेको जानकारी गराएको छ।
संघले ध्यानाकर्षण गराएको ४ विषय
१.हवाई यात्रुहरुलाई छिटो, छरितो, भरपर्दो तथा सुरक्षित किसिमले हवाईजहाजसम्म पुर्याउन र हवाईजहाजबाट टर्मिनल भवनसम्म ल्याउन हरेक वायुसेवा कम्पनीहरुले आवश्यक सवारी साधन तथा उपकरणको व्यवस्था आफैंले गरेका छन्। एयर साइडमा सञ्चालन हुने र्याम्प तथा अन्य सवारी साधनमा यातायात व्यवस्था विभागले तोकेको प्रदुषण मापदण्डको पूर्ण परिपालना गर्नुका साथै तेश्रो पक्षीय बिमासमेत गरिएको छ। मौजुदा र्याम्प बसहरु पुनर्स्थापन गर्ने योजना भएमा यी बसहरु प्रयोगविहीन हुने र वायुसेवाहरुको करोडौं लगानी नोक्सानी हुन जाने हुँदा यसतर्फ गम्भीर ध्यान जान जरुरी छ।
२. कोभिड महामारीका कारण विगत ६ महिनामा नेपालका वायुसेवाहरुले १७ अर्ब ५०करोड रुपैयाँभन्दा पनि बढी आम्दानी गुमाइसकेको व्यहोरा अवगत नै छ। बजार अभावमा कतिपय वायुसेवाहरु सञ्चालनमा आउन सकेका छैनन्। कोरोना महामारीको कारण थला परिसकेका वायुसेवाहरु सामान्य अवस्थामा फर्कन अझ कति बर्ष लाग्ने हो, निश्चित छैन। वायुसेवा कम्पनीहरुको आयश्रोत नै कम भएको अवस्थामा मौजुदा र्याम्प बसको सट्टा थप करोडौं खर्च गरी विद्युतीय बस प्रतिस्थापन गर्नु न्यायोचित देखिँदैन।
३. वायुसेवा कम्पनीहरुले सञ्चालन गरेको र्याम्प बसको सट्टा निजी क्षेत्रबाट बस सञ्चालन गर्न यसअघि पनि २०६० सालमा प्रयास भएको थियो । निजी क्षेत्रबाट सञ्चालन हुने यस्ता बसहरुले वायुसेवाहरुको उद्देश्य र आवश्यकता अनुसारको सेवा दिन नसक्ने हुँदा वायुसेवाहरुको कडा प्रतिवादका कारण सो योजना स्थगन गरी वायुसेवा कम्पनीहरुले ठेकेदारले ल्याएका गाडी खरीद गरी आफैंले सेवा सञ्चालन गरेको व्यहोरा स्मरण गराउन चाहन्छौं।
४. अतः अन्तर्राष्ट्रिय नागरिक उड्डयन संगठनको सिफारिस अनुसार विमानस्थलहरु प्रदुषणमुक्त हुनुपर्नेमा कसैको दुईमत हुन सक्दैन। कोभिड महामारीले ध्वस्त पारिसकेको पर्यटन तथा हवाई उद्योगलाई थप राहत दिनुको सट्टा वायुसेवाहरुलाई करोडौंको व्ययभार थप्नु उचित नहुने भएकाले र्याम्प बस तत्काल प्रतिस्थापन गर्ने विषयमा यस संघको गम्भीर असहमति रहेको व्यहोरा अनुरोध गर्दछौं। सरकारी अनुदानमा र्याम्प बस प्रतिस्थापनको योजना, कार्यविधि स्पष्ट रुपमा आएमा यस संघले छलफल गर्न सक्ने व्यहोरा समेत अनुरोध गछौं।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।